क्यान अध्यक्ष चन्द भन्छन्- दक्षिण एसियामा सरकार चलाउनभन्दा क्रिकेट चलाउन गाह्रो छ

क्यान अध्यक्ष चन्द भन्छन्- दक्षिण एसियामा सरकार चलाउनभन्दा क्रिकेट चलाउन गाह्रो छ

A+ A A-

पहिलो संस्करणको नेपाल टी–२० क्रिकेट लिग प्रतियोगिताको विजेताले ५५ लाख नगद पुरस्कार पाउने भएको छ ।

शुक्रबार काठमाडौंमा नेपाल क्रिकेट संघ (क्यान) ले पत्रकार सम्मेलन गरी यसबारेमा जानकारी गराएको हो । प्रतियोगिताको उपविजेताले ३० लाख रुपैयाँ नगद पुरस्कार प्राप्त गर्नेछ भने तेस्रो स्थान हासिल गर्ने टिमले १० लाख र चौथोले ५ लाख रुपैयाँ पुरस्कार पाउने क्यानले जनाएको छ ।

प्रतियोगिताको प्लेयर अफ द सिरिजले ५ लाख प्राप्त गर्दा उत्कृष्ट बलर र उत्कृष्ट ब्याटरले २ लाख ५० हजार पाउने क्यानले जनाएको छ ।

इमर्जिङ प्लेयरले १ लाख ८० हजार पाउनेछन् । त्रिभुवन विश्वविद्यालयको क्रिकेट मैदानमा आयोजना हुने प्रतियोगिता शनिबारबाट सुरु हुनेछ । पहिलो संस्करणको प्रतियोगितामा ६ टोलीको सहभागिता रहनेछ ।

पत्रकार सम्मेलनमा क्यानका अध्यक्ष चतुरबहादुर चन्दले खेलाडीहरूलाई आत्मनिर्भर बनाउने नियतबाट नेपाल टी २० को आयोजना गरिएकाले लिग पूर्ण रूपमा सफल हुने बताए । उनले दक्षिण एसियाका देशहरूले लिग सञ्चालन गर्दा धेरै कठिनाइ भोग्नुपर्ने अनुभव आफूले गरेको उल्लेख गरे ।

‘खेलाडीहरूलाई आत्मनिर्भर बनाउनुपर्छ भनेर सही नियतले नेपाल टी २० लिग सञ्चालन गर्न भनेर घोषणा गरिएको थियो । एसोसिएट देशले धेरै कठिनाइ भोग्नुपर्ने रहेछ,’ चन्दले भने, ‘सबै विदेशी खेलाडी आइसकेका छन्, क्यान तयार छ, यो लिग रोक्नु ठीक छैन, क्रिकेट शुभचिन्तकका लागि ।’

व्यक्तिवादी स्वार्थका लागि क्रिकेटमा असर पर्नु दिनु नहुने उनको भनाइ थियो । नेपाली क्रिकेटलाई ध्वस्त बनाउन कुनै तत्त्व लागेकाले त्यसलाई सफल बन्न दिन नहुने चन्दले बताए । दक्षिण एसियामा सरकार चलाउनुभन्दा गाह्रो कुरा क्रिकेट संघ चलाउन छ भन्ने कुरा आफूले अनुभव गरिरहेको उनको भनाइ छ ।

‘व्यक्तिवादी स्वार्थका लागि क्रिकेटमा असर पर्नु हुँदैन । प्रतियोगिता भोलिदेखि सुरु हुन्छ नै । क्रिकेटलाई ध्वस्त बनाउन कुनै तत्त्व लागेको छ, उनीहरूले कुनै निकाय छोडेका छैनन्,’ क्यान अध्यक्ष चन्दले भने, ‘दक्षिण एसियामा सरकार चलाउनुभन्दा गाह्रो क्रिकेट चलाउन छ । हो पनि, मैले देखिरहेको पनि छु । गुट, उपगुट चिरेर अघि बढ्नुपर्छ ।’

नेपाल टी २० लिगको पहिलो संस्करणमा काठमाडौं नाइट, पोखरा एभेन्जर्स, फार वेस्टर्न युनाइटेड, जनकपुर रोयल्स, विराटनगर सुपर किङ्ग्स र लुम्बिनी अल स्टार सहभागी रहनेछन् । प्रतियोगिताको उद्घाटन खेलमा शनिबार पोखरा एभेन्जर्स र काठमाडौं नाइटसँग प्रतिस्पर्धा गर्नेछ । शनिबार नै हुने दोस्रो खेलमा लुम्बिनी अल स्टार्स र फार वेस्टर्न युनाइटेडबीच प्रतिस्पर्धा हुनेछ ।

प्रकाशित मिति: शुक्रबार, पुस ८, २०७९ १४:३५