भेल्लु बाजेलाई दुई हजार दिएर भोट मगाएकाे आरोपबारे के भन्छन् सूर्य थापा ?

तस्वीर- सूर्य थापाकाे फेसबुकबाट ।

A+ A A-

गत आइतबार प्युठानको जुम्रिकाँडामा एमालेको चुनावी कार्यक्रम थियो । हिजो सोमबार सत्ता गठबन्धनको त्यहीँ चुनावी कार्यक्रम भयो । दुवै कार्यक्रममा देखिए भाइरल भेल्लु बाजे, जो आफ्नो बोल्ने शैली र अन्टसन्ट संवादका कारण सामाजिक सञ्जालमा चर्चित छन् ।

उनले आइतबार प्युठान- ५, ठूलोगाउँमा भएको कार्यक्रममा एमाले उम्मेदवार सूर्य थापालाई भोट मागिदिए । यसअघि आफूलाई माओवादी र प्रचण्डको समर्थक बताउने उनले सूर्यमा भोट हालौँ भनेको भिडियो एमालेजनले सोसल मिडियामा रमाइरमाइ शेयर गरे । भिडियोमा एमालेबाट प्रतिनिधिसभा सदस्य उम्मेदवार सूर्य थापा पनि देखिएका छन् । 'सूर्य थापा र हामी यहाँ सँगै छौँ अहिले र हेर्नोस् त, सूर्यमा सूर्य थापालाई झ्याम्म भोट हालेर जिताइदिनुहोला भनेर अनुरोध गर्छु', भेल्लु बाजेले भनेका छन् । फेसबुकमा थापाले पनि केही तस्वीर शेयर गर्दै भाइरल भेल्लु बाजेले आफूलाई खुलारूपमा साथ दिएको लेख्न भ्याए ।

तर हिजो युट्युबमा एकाएक अर्को भिडियो आयो, जहाँ भेल्लु बाजेले आफूलाई २ हजार रुपैयाँ दिएर जबर्जस्ती एमालेका लागि भोट माग्न लगाइएको दाबी गरेका छन् । त्यो भिडियोलाई एमालेइतरले उसैगरी रमाइरमाइ शेयर गरिरहेका छन् । स्थानीय युट्युबर तेजेन्द्र परियारलगायतले कुराकानी गरी भिडियो युट्युबमा राखेका छन् । 'चोरेको होइन, ढाँटेको होइन । दुई हजार दिए खाएँ । अब कांग्रेसले दियो भने पनि खाइदिने हो । भोट हाल्ने बेला जेलाई मन लाग्छ हाल्छु', भिडियाेमा उनले भनेका छन् ।

खासमा भएको के थियो ?

गाउँमा कार्यक्रम हुनुअगाडि एमालेका स्थानीय नेता, कार्यकर्ताले भाइरल म्यानका रूपमा स्वागत र सम्मान गर्ने भन्दै कार्यक्रममा लगेको भेल्लु बाजेको दाबी छ । ‘म गाउँकै हाेटलमा बसिरहेकाे थिएँ । उनीहरू आएर सम्मान गर्ने भन्दै ठूलोगाउँ लगे । त्यहाँ पुग्दा बैठक (कार्यक्रम) रै'छ, मलाई फूला, माला, अबीर लगाइदिए’, भेल्लु बाजेका रूपमा चर्चित मीनबहादुर बुढाले भने, ‘अनि दुई हजार रुपैयाँ दिएर सूर्यमा भोट हालौँ भन्न लगाए ।’

बुढाको दाबी सही हो भने, एमालेले पैसा दिएर भोट मगाउनु निर्वाचत आचारसंहिताविपरीतको काम हो । निर्वाचन आयोगले उम्मेदवार थापालाई स्पष्टीकरण सोध्न सक्छ । तर थापाको दाबी अर्कै छ । भेल्लु बाजे आफूलाई स्वागत गर्न पहिल्यै कार्यक्रममा पुगेको उनले बताए । ‘म त्यहाँ पुग्नुअघि नै स्वागत गर्न फूल, माला लिएर बसेका थिए’, थापाले भने ।

‘दुई हजार लिएर सूर्यमा भोट हाल्न लाउनुभाको भनेर भेल्लु बाजेकै अर्को भिडियो आएको छ त ?’

जवाफमा उनले भने, ‘दुई हजारमा त्यसरी भन्ने मान्छे रैछ त भैगो नि !’ उनले दुई हजार दिएको भन्ने आरोपको शक्त खण्डन पनि गरेनन्, स्वीकार पनि गरेनन् ।

युट्युबर तेजेन्द्र परियारका अनुसार, खासमा भेल्लु बाजेले प्रचण्ड, केपी ओली र शेरबहादुर देउवाबाहेक अन्य नेतालाई चिन्दैनन् । 'सूर्य थापालाई स्वागत गर्न जानलाई चिन्नु पनि पर्‍यो नि', लामाे समययता भेल्लु बाजेकाे भिडियाे बनाइरहेका परियारले भने, 'माओवादीले समर्थन गरेको उम्मेदवार वा भनौँ सत्ता गठबन्धनकै उम्मेदवारलाई त चिन्दैनन् ।'

बुढालाई भ्याइनभ्याइ

चुनावसँगै प्युठानमा ६२ वर्षे बुढालाई भ्याननभ्याइ भएको छ । सत्तापक्ष र विपक्षी पार्टीका नेता कार्यकर्ताले उनलाई प्रयोग गरिरहेका छन् । यसअघि सत्ता गठबन्धनकी साझा उम्मेदवार जनमोर्चाकी दुर्गा पौडेलका लागि भोट मागेको भिडियो फेसबुकमा नेता मोहनविक्रम सिंहका छोरा अशोकविक्रमले राखेका थिए । त्यसपछि एमाले समर्थकले सूर्यमा भोट हालौँ भन्न लगाएर भिडियो शेयर गरिरहेका छन् । गरिबी र रक्सी खाने कमजोरीका कारण चाहे युट्युबर हुन् वा राजनीतिक दल प्रलोभनमा पारेर मीनबहादुर बुढाको प्रयोग गरिरहेका छन् ।

एक मात्र निर्वाचन क्षेत्र रहेको प्युठानमा एमालेका थापा र गठबन्धनकी पौडेलबीच मुख्य प्रतिस्पर्धा हुनेछ ।

सम्बन्धित समाचार