ओखाे भेल्लु बाजे, बेल्कुल बेल्कुल

A+ A A-

वडा सदस्यमा चैँ चुनाव जित्नुहुन्छ ?
ओखो, जानकारी हामीसित छ भनेर तेसरी अनुरोध गरेर हामी हिँड्दैछम् अझै पनि... ।
ग्यारेन्टी चुनाव जित्नुहुन्छ ?
बेल्कुल, बेल्कुल, बेल्कुल, सही कुरो ।

६१ वर्षे 'भेल्लु बाजे'को बोल्ने शैलीलाई धेरैले रुचाए । माथि उल्लेखित संवादले उनलाई प्युठानको विकट जुम्रिकाँडाबाट काठमाडौंसम्मको यात्रा तय गरायो । यति मात्र कहाँ हो र, उनले नेपाल टेलिभिजनबाट प्रसारण हुने हास्य टेलिसिरियल ख्यालठट्टामा खेल्ने मौकासमेत पाए ।

अनि भेटिए भेल्लु बाजे

युट्युबर गनबहादुर पेस्ताेल र भेल्लु बाजे ।

तीन महिनाअघि प्युठानकै युट्युबर तेजेन्द्र परियार र गनबहादुर पेस्तोललाई एक विवाहमा फोटो भिडियो खिच्न बोलाइयो । प्युठान नगरपालिका- ५, विजुवर बस्ने उनीहरू जुम्रिकाँडा गए । फोटो, भिडियो खिचेर उनीहरू जन्ती लागे । त्यो भिडमा देखिए मीनबहादुर बुढा अर्थात् भेल्लु बाजे । प्युठान नगरपालिका- ४ का उनको बोल्ने शैलीमा युट्युबरद्वयले दर्शक तान्ने आकर्षण पाए ।

स्थानीय लवज र हक्की स्वभावका उनी ख्यालठट्टा गर्नमा पनि कम छैनन् । तर, गाउँतिर प्राय:ले यस्तै बोल्छन् भनेर तेजेन्द्र र गनबहादुरले झाेलाबाट भिडियो क्यामेरा नै झिक्ने कष्ट गरेनन् । तर माेबाइलचाहिँ निकाले ।

खाना खाँदै गरेका बेला भेल्लु बाजेसित गरेको कुराकानी उनीहरूले मोबाइलमा खिचे । केही क्लिप्स टिकटकमा हाले भने विजुवर फर्केपछि क्लिप्सहरू जोडेर गाम्बेसी अपडेट र लिस्ने मिडिया नामका दुई युट्युब च्यानलमार्फत भेल्लु बाजेलाई देखाए ।

टिकटकमा भाइरल भएकाले युट्युबमा भेल्लु बाजेको खोजी हुन थालिसकेको थियो । यही बेला गनबहादुर र तेजेन्द्रले भिडियो हालेपछि भेल्लु बाजे थप चर्चित बने । धेरैले उनलाई 'बेल्कुल बाजे' भनेर पनि चिन्छन् ।

दर्शकले रुचाएपछि दुई युट्युबर भेल्लु बाजेको गाउँ जुम्रिकाँडा पुगे । उनको घर, आर्थिक अवस्था भिडियाेमा देखाइदिए । देशविदेशबाट केही सहयोग मिल्यो । त्यो लिएर उनीहरूले केही दिनलाई रासन अनि घरमा चाहिँ आवश्यक कुराहरू लगिदिए ।

बोल्ने रोचक शैलीकै कारण भेल्लु बाजे हिट भए । जीवनमा एकपल्ट काठमाडौं टेक्ने चाहना थियो उनको । त्यो पनि यसै हप्ता पूरा भएको छ । यति मात्र होइन नि, उनी त टेलिफिल्म नै खेलेर फर्केका छन् । उनले चौतारामा बसेर अब जुम्रिकाँडामा आफ्नै उमेरका पाकाहरूलाई टेलिसिरियल अनुभव सुनाउनेछन् ।

टिकटक र युट्युबमा हिट भएपछि गत साता ख्यालठट्टा टेलिसिरियलका निर्देशक नेत्रराज क्षेत्रीले तेजेन्द्रलाई फोन गरी भेल्लु बाजेलाई काठमाडौं ल्याउन अनुरोध गरे । 'बाजे पनि काठमाडौं जाने रहर गरिरहनुभएको थियो । हवाईजहाजबाट जाने उहाँको चाहना थियो । तर, आर्थिक समस्याले हामीले बसमै हालेर उहाँलाई काठमाडौं लग्यौँ,' तेजेन्द्रले भने ।

काठमाडौं टेकेदेखि भेल्लुबाजेकाे व्यस्तता कुनै स्टार कलाकारभन्दा कम थिएन । कलंकीमा उनलाई ख्यालठट्टा टिमका दुई जना कुरिरहेका थिए । उनीहरूले सुटिङका लागि सिधै काभ्रेको भकुण्डेबेसी लिएर गए । दिनभर सुटिङपछि भेल्लुबाजेको टोली काठमाडौंको गोंगबुस्थित एक गेस्ट हाउसमा बस्याे ।

त्यही दिन बेलुका विभिन्न रोधीघरमा उनले स्वागत सम्मान थापे । भोलिपल्ट बिहानदेखि बुलुकासम्म उनलाई अन्तर्वार्ता दिएर फुर्सदै भएन । करिब १८ देखि २० जना युट्युबरले अन्तर्वार्ता लिएका तेजेन्द्र बताउँछन् । साँझमा उसैगरी रोधी घरवालाले बोलाए, स्वागत सम्मान गरे । १५ गते बिहानै उनीहरू प्युठान फर्किए ।

भेल्लु बाजे नाम पाएछन्

नामपछाडि एकलख थप्ने चलन अक्सर गाउँमा हुन्छ । जुम्रिकाँडाका मान्छेले पनि मीनबहादुर बुढा मगरलाई 'मीने बुढा' भन्थे । तर, केही वर्षअघि जिल्ला प्रशासन कार्यालय पुगेर फर्केपछि उनको बोलाइने नाम बदलियो ।

बोल्ने क्रममा मीनबहादुरले अपाच्य शब्द मिसाए भनेर जिप्रकाका हाकिमले भनेछन्- तपाईं अलि छाडा शब्द बोल्नुहुँदो रहेछ, यस्तो बोलियो भने समाजमा केही भ्यालु हुँदैन है ।

छेउछाउका अरु मान्छे हाँसेछन् । भोलिपल्ट ती छेउछाउका मान्छेले मीनबहादुरलाई भेल्लु बुढा भनेर जिस्क्याएछन् । कालान्तरमा गाउँभरि उनलाई भेल्लु बाजे भनेर बोलाउन थालेछन् । अहिले देश, विदेशमा रहेका धेरै नेपालमाझ उनी यही नामले चिनिएका छन् ।

रमाइलो गर्ने दुखी

भेल्लु बाजे रमाइला छन् । जोसित पनि ख्यालठट्टा गर्छन् । उनको यही स्वभाव मान्छेले मन पराएका छन् । उनी बाहिर जति खुसी देखिन्छन्, उनका भित्री दुःख त्योभन्दा कैयौँ गुणा ज्यादा छन् ।

गाउँनजिकै विवाह गरेकी छोरी आफ्नै घरव्यवहारमा व्यस्त छिन् । उनी आफ्नै परिवारको पेट भर्ने जाेहोमा जेलिएकी छन् । जुम्रिकाँडामा भेल्लु बाजेकाे आफ्नै जमिन छैन । सम्पत्तिकाे नाममा टाट्नाेमा एउटा बाख्राे छ । करिब आफ्नै उमेरकी श्रीमती रोगी छिन् । उनका हातखुट्टा सुन्निएको महिनौँ भइसक्यो । उपचार गर्न सकेका छैनन् । अस्पतालसम्म जान आयस्रोत केही छैन । रोगी शरीर लिएर उनी बनिबुतो गर्न जान्छिन् । भेल्लु बाजे पनि केही वर्ष अघिसम्म गाउँमै मजदुरी गर्थे । हिजोआज उनी काम गर्दैनन् । बिहानैदेखि मदिराको नशामा हुन्छन् । श्रीमतीले अर्काको घरमा काम गरेर ल्याएकै पैसामा चलिरहेका थिए भेल्लुबाजे । 'चर्चित भएपछि चाहिँ अलिअलि सहयोग पाउन थालेका छन्', तेजेन्द्रले भने ।

एउटा विपन्न र बेसहारा व्यक्तिलाई चिनाएर उनको जीवनयापनमा सहयोग पुर्‍याउन भूमिका खेलेकोमा तेजेन्द्र र गनबहादुरलाई धेरैले धन्यवाद भनेका छन् । तर, सबै टिप्पणी प्रशंसाका लागि मात्र छैनन् । कसैले भनिरहेका छन्, 'एउटा मगर बाजेको सोझोपनको फाइदा उठाएर डलर कमायाै, भ्युज बटुल्न अपाच्य संवाद युट्युबमा हाल्याै ।'

५ वर्षजति मलेसिया बसेर प्युठानकै बिजुवरमा सिलाइबुनाइ व्यवसाय गर्दै आएका २८ वर्षे तेजेन्द्रले डेढ वर्षदेखि युट्युब चलाउन थालेका हुन् । उनी अनजानमा केही कमीकमजोरी भएका भए दर्शककाे सुझावअनुसार सुधार्दै लैजाने बताउँछन् ।

'काम गर्दै सिकिने रहेछ । होला, भेल्लु बाजेको हकमा हामीले नगर्नुपर्ने कति कुरा गर्‍याैँ होला, नसोध्नुपर्ने प्रश्न र नदेखाउनुपर्ने दृश्य देखायौँ होला । त्यो अनजानमा थियो', उनी भन्छन्, 'जेजस्तो भए पनि उहाँको आगामी जीवन अलि सहज बनाउने वातावरण त बन्यो ।'

उनी युट्युबरले राम्रोसँग काम गर्ने हो भने समाजमा परिवर्तन ल्याउन, असाहयलाई सहयोग गर्न सकिने रहेछ भन्ने कुरा आफूले थाहा पाएको बताउँछन् । (तस्वीरहरूः तेजेन्द्र परियार र गनबहादुर पेस्ताेल, प्युठान)

प्रकाशित मिति: बिहीबार, चैत १७, २०७८ १४:४०