भोट माग्दै आएका सिलवाललाई मतदाताको आग्रह- खानेपानीको समस्या हल गरिदिनोस्

A+ A A-

मंगलबार आफूकहाँ भोट माग्दै आएका एमाले उम्मेदवार नारायण सिलवाललाई पूर्वमन्त्री तथा कूटनीतिज्ञ डा. रमेशनाथ पाण्डेले आगामी दिनमा गर्नुपर्ने कामबारे ध्यानाकर्षण गराए । काठमाडाैं महानगरपालिका- ५ विशालनगरस्थित घरमै आइपुगेका सिलवाललाई उनले मतदाताकाे भावनाअनुसार काम गर्ने सर्तमा जितकाे शुभकामना पनि दिए । नीतिगत सुधारसँगै जनतासँग प्रत्यक्ष जोडिएका विषयवस्तुतिर ध्यान दिनुपर्ने पाण्डेको सुझाव थियो ।

सिलवालले पनि पाण्डेजस्ता विज्ञले दिएका सुझाव र आम मतदाताकाे भावनाअनुसार काम गर्ने बाचा गरे । काठमाडाैं निर्वाचन क्षेत्र नम्बर- ५ (१) मा एमालेका तर्फबाट प्रदेशसभा सदस्य उम्मेदवार सिलवालले घरदैलाेका क्रममा अन्य मतदाताले पनि विभिन्न सुझावहरू दिएकाे बताए । ०७४ सालमा चुनाव जितेका उनी यसपालि दाेहाेरिने दाउमा छन् ।

सिलवालका स्वकीय सचिव लक्ष्मण शर्माका अनुसार आज सिलवालले काठमाडाैं महानगरपालिकाको वडा नम्बर ५ का मतदातासँग भेटघाट गरे । यस क्रममा सिलवालाई खानेपानीको समस्या यथावत रहेको भन्दै त्यसको समाधान गर्न आग्रह गरेका छन् । उनले खानेपानी समस्या हल हुने चरणमा रहेकाे र चाँडै समाधान गर्ने प्रतिबद्धता जनाए ।

'२०७४ को निर्वाचनमा निर्वाचित भएपछि उहाँकाे पहलमा वडा नम्बर- ५ मा सम्पदासँग सम्बन्धित धेरै काम सम्पन्न भइसकेका छन्', शर्माले भने, 'गोरखनाथ मन्दिरको सत्तल, पञ्चेधारा, हाँडीगाउँस्थित सत्यनारायण मन्दिरको सत्तल र चारतैतिरको पर्खाल पुनर्निमाण, गहनापोखरीस्थित सत्तल निर्माण, हाँडीगाउँ कोटालटोलस्थित त्रिशक्ति क्लबको भवन पुनर्निर्माण, कोटालटोलस्थित कोटागुठी घरको पुनर्निर्माण, हाँडीगाउँ ओरालोमा रहेको ढुंगेधारा पुनर्निर्माण, रुद्रमतिस्थित नमोबुद्ध विहारसँगैको पार्क निर्माण, भीमसेनथानस्थित भीमसेन मन्दिरको पर्खाल तथा सोही स्थानमा बासकेटबल कोर्ट निर्माण लगायतका काम उहाँको अघिल्लो कार्यकालमा सम्पन्न भइसकेको छ ।'