प्रचण्डले निर्वाचन क्षेत्र सुम्पिएका डाक्टर, को हुन् भोजराज ?

डा. भोजराज अधिकारी ।

A+ A A-

दसैँको बिदा सकिएपछि २२ असोजमा डा. भोजराज अधिकारी पहिलो दिन चितवनस्थित भरतपुर अस्पताल पुगे । ओपीडी भर्खर खुलेकाले होला, बिरामीको भिड बाक्लाे थियो । उनी बिरामी जाँच्दै थिए ।

करिब साढे १० बजे उनकाे मोबाइलमा ट्रिङ ट्रिङ... घन्टी बज्छ । बिरामी जाँचिरहेका उनी फोन उठाउँछन् । उताबाट आवाज आउँछ ‘डा. सा’ब, चितवन ३ मा अध्यक्ष नउठ्ने भएपछि पार्टीले तपाईंलाई टिकट दिने भएछ नि, अब तयारी सुरु गर्नुपर्छ ।’

चुनाव लड्ने सोच नै नबनाएका उनले त्यो कुरालाई खासै महत्त्व दिएनन् । ‘हामी त अन्तिम समयसम्म अध्यक्ष प्रचण्डलाई यही ठाउँबाट उठाउनुपर्छ भनेर बसेका थियौँ । त्यसमाथि मैले त अबको १० वर्षपछि (२०८८ साल) मा भरतपुरको मेयरमा उठ्छु र त्यसको एक वर्षअघिदेखि जनताको घरदैलोमा जान्छु भन्ने योजना बनाएको थिएँ,’ उनले भने ।

फाेन आएकाे केही समयपछि चितवन माओवादीका एक नेताले उनलाई फोन गरेर भेट्न बोलाए । ‘पार्टीको शुभचिन्तक र पार्टीबाहिर पनि सर्वमान्य, स्वच्छ छवि भएको व्यक्ति छान्दा तपाईंकै नाम आयो । यसपालि तपाईं उठ्नुपर्छ भन्नुभयो । यसका लागि म तयार थिइनँ र अर्को कुरा परिवारले पनि मान्नुहुन्न भनेर मैले अस्वीकार गरेँ,’ अधिकारीले भने ।

त्यसपछि उनी सरासर घर गए । उनको मोबाइलमा एउटा सेभ नभएकाे नम्बरको मिस कल देखे । कहिलेकाहीँ देखेकै नम्बरजस्तो त लाग्यो तर उनले कल ब्याक गरेनन् ।

सम्बन्धित समाचार

०७४ का ‘घाइते बाघ’ कोइराला, चितवन-३ बाट यसपटक संसद छिर्लान् ?

त्यसको केहीबेरमा उनलाई भरतपुरकी मेयर रेनु दाहालले फोन गरिन् । ‘मेयर सा’बले बुबाले कुरा गर्न खोज्नु भएको छ भन्नुभयो । मिस कल बनेर बसेकाे नम्बर पनि अध्यक्षकै रहेछ । मैले कल ब्याक गरे । प्रचण्डले नै उठाउनुभयो,’ उनले शिलापत्रसँग भने ।

प्रचण्डले उनलाई सिधैँ चितवन ३ बाट चुनाव लड्न प्रस्ताव गरे । अधिकारीले आफू तयार नभएको भन्दै अरु कोही योग्य व्यक्तिलाई उठाउन भने । ‘अध्यक्ष प्रचण्डले मलाई 'मेरो लिगेसी र स्ट्याण्डर्ड मिट गर्ने मान्छे खोज्दा तपाईंकै नाम आयो । अहिले तपाईं नै हो । सरकारी अस्पतालबाट राजीनामा दिएर अघि बढ्नुहोस् । तपाईं उठ्नुभयो भने मेरो पनि टाउको अलि हलुङ्गो हुन्छ' लगायत धेरै कुरा भनेपछि म तयार भएँ,’ अधिकारीले भने ।

त्यसलगत्तै उनले घरपरिवार साथीभाइलाई आफू चुनाव लड्न लागेको जानकारी दिए । चितवन ३ जस्तो चर्चित ठाउँबाट सत्तारुढ गठबन्धनको साझा उम्मेदवार बनेका अधिकारीले यति छिट्टै सक्रिय राजनीतिमा लाग्छु भनेर कहिल्यै सोचेकै थिएनन् ।

२०३६ चितवनको पहाडी भू-भाग कुरिनघाटको कमेरे भन्ने ठाउँमा जन्मिएका भोजराजलाई उनका आमाबुबाले ९ महिनाको उमेरमा डोकोमा बसाइ सारेर पश्चिम चितवनको पटियानी (साविक भरतपुर महानगरपालिका-२२) ल्याए । निम्न वर्गीय उनको परिवार १० वर्ष त अरुकै घरमा बस्यो ।

‘हामी बस्ने घरको मालिक काठमाडौं बस्थे । हामी उनीहरूको घरमा बसेर जग्गा अधिया कमाएर, खेतीपाती, ज्यालादारी गरेर १० वर्ष बितायौं,’ उनले भने । बुवाआमाले दु:खसुखले हुर्काएका भोजराज पढाइ लेखाइमा भने अब्बल थिए । त्यसैले उनले सधैँ छात्रवृत्तिमा पढ्न पाए । २०५३ सालमा एसएलसीमा ८० प्रतिशत अंक ल्याएर पास भए । त्यसपछि उच्च शिक्षाका लागि भोजराज काठमाडौं हानिए । शिक्षा मन्त्रालयको कोटामा छात्रवृत्तिमा पोखराको मनिपाल टिचिङ अस्पतालमा एमबीबीएस पढ्ने अवसर पाए ।

मनिपालबाट एमबीबीएस सकेपछि लोकसेवामा नाम निकालेर पूर्वी चितवनको जुटपानी उप-स्वास्थ्य चौकीको प्रमुखका रूपमा २०६३ देखि २०६५ सम्म काम गरे । ‘यो २ वर्षमा मैले धेरै काम गरेँ । उप-स्वास्थ्य चौकीलाई स्वास्थ्य केन्द्र बनाएँ । नयाँ अस्पताल भवन बनाएँ । प्रशासनिक सुधारहरू गरेँ,’ उनले भने ।

दुई वर्ष सरकारी काम गरेपछि उनले चितवनको पुरानो मेडिकल कलेजबाट काठमाडौं विश्वविद्यालयमा एमडी पढ्ने छात्रवृत्ति पाए । एमडी सकेपछि उनी भरतपुर अस्पतालमा आबद्ध भए । ‘मैले भरतपुर अस्पतालमा ९ वर्ष फिजिसियनका रूपमा काम गरेँ । त्यहीबीचमा स्वास्थ्य अनुसन्धान परिषद्को उपाध्यक्ष, नेपाल चिकित्सक संघको चितवनको अध्यक्ष, भरतपुर अस्पतालको अध्यक्षलगायतका जिम्मेवारी सम्हालेँ,’ उनले भने ।

सम्बन्धित समाचार

एमालेकाे 'लालकिल्ला'मा विश्व पाैडेललाई चुनाव जित्न कति सहज ?

यहीबीचमा संसारभर कोरोना महामारी फैलियो । महामारीबाट चितवन पनि अछुतो रहन सकेन । कोभिडका बिरामीको व्यवस्थापन गर्ने जिम्मेवारी डा. भोजराजले पाए । ७२ घण्टामै भरतपुर कोरोना विशेष अस्पताल बनाउने नेतृत्व गरे । ‘महामारीमा मैले गरेको योगदानको कदर भयो । १७ चैत २०७६ भरतपुर अस्पतालको अध्यक्ष बन्ने अवसर पाएँ,’ उनले भने ।

भरतपुरमा उनले सामाजिक काममा पनि हात हालेका थिए । भरतपुर अस्पतालमा उनको कार्यकाल आगामी चैतमा सकिँदै थियो । तर, कार्यकाल नसकिँदै उनी राजीनामा दिएर गठबन्धनको साझा उम्मेदवार बने । गठबन्धनको साझा उम्मेदवार भएकाले माओवादी केन्द्रको भोटले सजिलै जित्ने उनी दाबी गर्छन् ।

‘आजको राजनीतिले मागेको आवश्यकता युवा, नयाँ सोच र विज्ञहरू राजनीतिमा आउनुपर्‍याे, अहिलेको राजनीतिले समाधान दिएन भन्नेछ । त्यो कुराको सम्बोधन गर्ने उम्मेदवार चितवन ३ मा म मात्र हो,’ अधिकारीले भने । नेपाली कांग्रेसका बागी उम्मेदवार दिनेश कोइरालालाई एमालेले समर्थन गरेर आफूलाई झन् सजिलो भएको उनको तर्क छ ।

‘कांग्रेस मत दिनेश कोइराला र जगन्नाथमा पौडेलमा बाँडिन्छ । इमानदार कांग्रेसहरू स्थानीय तहको निर्वाचनभन्दा अहिले बढी खुलेर आएको अवस्था छ । अध्यक्ष प्रचण्ड उठ्दा बरु राजनीतिक प्रतिशोध साँध्ने मान्छेहरू पनि थिए । म हुँदा त राजनीतिक प्रतिशोध किन साँध्नु र । डा. साबको १७ वर्षदेखिको योगदान हामीले देखेकै हो भनेर धेरै जना कांग्रेसी साथीहरू खुल्नुभएको छ,’ अधिकारीले भने ।

नेकपा एमाले चितवनका अध्यक्ष रामप्रसाद न्यौपानेले आफ्नो उम्मेदवारी फिर्ता लिने वित्तिकै वामपन्थी धारणा राख्ने र ग्राउण्ड लेबलमा बस्ने एमालेका कार्यकर्ता चुप लागेर डा. भोजराजलाई भोट हाल्नुपर्छ भनेर बसेको उनी बताउँछन् । ‘विक्रम पाण्डेको समानुपातिक भोट १० देखि १२ हजार मात्र हो । उहाँ सधैँ गठबन्धनमा हुनुहुन्थ्यो, अहिले एक्लै हुनुहुन्छ । उहाँलाई अर्को १२ हजार पपुलर भोट आयो भने पनि २५ हजार त भयो नि,’ उनले भने ।

सम्बन्धित समाचार

ह्याट्रिक जितकाे खाेजीमा रहेका कृष्णभक्त र डेब्यू गर्न आतुर उमेशलाई राेक्लान् रविले ?

चुनावका बेलामा आफूलाई राजनीतिमा कुनै योगदान नै नगरेको व्यक्ति भनेर गलत प्रचार गरिएको उनको गुनासो छ । ‘म ८ कक्षादेखि मसाल क्रन्तिकारी विद्यार्थीको आन्दोलनमा लागेँ । २०६२ सालमा माओवादीको सक्रिय कार्यकर्ताको सदस्यता लिएँ, माओवादीको स्वास्थ्य विभागको केन्द्रीय उपाध्यक्षसम्म भएँ । त्यसकारण म राजनीतिमा पनि नयाँ मान्छे होइन । अर्को कुरा माओवादीका हरेक गतिविधिमा मेरो साथ छ । हरेक कम्युनिस्ट नेताहरूसँग हातेमालो गरेर काम गरेको छु,’ उनले भने ।

चुनाव जितेपछि आफूले ६ 'स' को एजेण्डामा काम गर्ने अधिकारी बताउँछन् । सेवा, स्वास्थ्य, शिक्षा, सामाजिक सुरक्षा, स्वरोजगार, सडक सञ्जाल र भौतिक निर्माण प्रमुख एजेण्डा रहेको अधिकारी बताउँछन् । यसका लागि २८ वटा वडामा 'एक वडा एउटा योजना' ल्याउने उनले बताए । त्यस्तै चितवन ३ लाई सम्भाव्यताका आधारमा कृषि, स्वास्थ्य, शिक्षा र पर्यटन जोन निर्माण गर्ने उनको योजना छ ।

आफू राजनीतिमा उत्रिए पनि स्वास्थ्य क्षेत्रबाट नभागेको अधिकारी बताउँछन् । ‘म सांसद हुन खोजेको यहीँ बसेर सेवा दिन हो । म संसद गएँ भने स्वास्थ्यको नीतिगत तहमा काम गर्छु । स्वास्थ्य बीमामा समस्या छ, चिकित्सा शिक्षामा समस्या छ, निजी र सरकारी मेडिकल कलेजमा विभिन्न ग्याप छन् । यसलाई समष्टिगत समाधान गर्न मैलेभन्दा धेरै कसले गर्न सक्छ?,’ अधिकारीले भने ।

ग्राउण्ड लेबलबाट उठेर १७ वर्ष जनताको सेवा गरेर राजनीतिमा लागेकाले जनताले पनि साथ दिने उनको विश्वास छ । ‘म महिनाको ८-१० लाख कमाइरहेको डाक्टर, करियरको पिकमा हुँदा जनताको सेवा गर्न मैदानमा उत्रेको छु । मलाई सबैको साथ मिल्छ भन्ने विश्वास छ,’ उनले शिलापत्रसँग भने ।

प्रकाशित मिति: शुक्रबार, कात्तिक ४, २०७९ १८:२२