ह्याट्रिक जितकाे खाेजीमा रहेका कृष्णभक्त र डेब्यू गर्न आतुर उमेशलाई राेक्लान् रविले ?

ह्याट्रिक जितकाे खाेजीमा रहेका कृष्णभक्त र डेब्यू गर्न आतुर उमेशलाई राेक्लान् रविले ?

A+ A A-

राष्ट्रिय स्वतन्त्र पार्टीका संयोजक रवि लामिछानेले दसैँअगाडि चितवन पुगेर चितवन– ३ मा प्रचण्डसँग चुनावी प्रतिस्पर्धा गर्ने आशय व्यक्त गरेका थिए । चितवनमा त्यसो भन्नु केहीपहिला काठमाडौंको खुलामञ्चमा आयोजित कार्यक्रममा पनि लामिछानेले ठूला नेताहरूमध्ये एक जनासँग प्रतिस्पर्धा गर्ने इच्छा व्यक्त गरेका थिए ।

अर्थात्, केपी ओली, शेरबहादुर देउवा र प्रचण्डमध्ये एक जनासँग प्रतिस्पर्धा गर्ने आशय उनको थियो । तथापि, उनको टार्गेटचाहिँ प्रचण्डप्रति देखिन्थ्यो । त्यही भएर चितवन दौडधुप बढ्ता थियो । लामिछानेले चितनव–३ मा प्रतिस्पर्धा गर्ने तयारी गरेपछि प्रचण्ड पनि दबाबमा देखिन्थे । तर, अन्तिम समयमा लामिछाने पूर्व भनाइअनुसार चितवनमा त उम्मेदवारी दिए तर क्षेत्र परिवर्तन गरे । अनि, उनकै भाषाको ठूला भनिएका नेतासँग प्रतिस्पर्धा पनि गरेनन् ।

अहिले चितवनको चुनावी सरगर्मीमा लामिछाने फ्याक्टर निकै रोचक देखिएको छ । नेकपा एमाले र वाम–लोकतान्त्रिक गठबन्धनको कडा प्रतिस्पर्धा हुने आँकलन गरिएको यो क्षेत्रमा रविको इन्ट्रीले नयाँ मोड लिएको छ ।

एमालेको बलियो पक्कड भएको चितवन– २ मा लामिछानेले किन उम्मेदवारी दिए ? अहिले चासोको विषय बनेको छ । एमालेका नेता कृष्णभक्त पोखरेल चितवनमा लोकप्रिय मानिन्छन् । व्यक्तिगत लोकप्रियताका कारण पनि उनले ०७० को दोस्रो संविधानसभा चुनावमा सहजै जित हासिल गरेका थिए । वाम गठबन्धनको साथ पाएका पोखरेलले ०७४ मा पनि जित निकाले । एमालेको दशौँ महाधिवेशनमा केन्द्रीय सदस्यमा मनोनित हुन नसकेका पोखरेल अहिले संसदीय राजनीतिमा ह्याट्रिक गर्ने सोचमा छन् । त्यसका लागि लामिछाने तगारो बन्न सक्ने विश्लेषण पनि हुन थालेको छ । त्यसैले, एमालेका लागि चितवन– २ महत्त्वपूर्ण त छँदैछ, यो पटक साख जोगाउने बाध्यता पनि छ ।

पोखरेल मात्र होइन, अर्का ह्याभिवेट उम्मेदवार चुनावी मैदानमा छन् । कांग्रेसबाट व्यापारी तथा प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठ पहिलोपटक चुनावी मैदानमा छन् । ह्याट्रिक जित निकाल्ने प्रयासमा रहेका पोखरेलसँग लामिछाने र श्रेष्ठ पहिलो अनुभवसहित मैदानमा उत्रिएका हुन् ।

यद्यपि, पोखरेल र श्रेष्ठका लागि चितवन–२ मा सांगठानिक मत बलियो आधारका रूपमा रहेका छन् भने श्रेष्ठका लागि त अझ माओवादी केन्द्र र एकीकृत समाजवादीको बलियो साथ रहेको छ । तर, लामिछानेले भने व्यक्तिगत लोकप्रियताका आधारमा प्रतिस्पर्धा गर्नुपर्नेछ ।

शिलापत्रसँगको कुराकानीमा पोखरेलले चितवन– २ मा पुनः आफू निर्वाचित हुने बताए । चितवन–२ मा एमाले आफैँमा मजबुत रहेको र गठबन्धन हुँदा पनि एक्लै एमाले बलियो भएको पोखरेलको दाबी छ । पोखरेलले भने, ‘म यही भूमिमा जन्मेँ, यही भूमिमा हुर्कें र यही भूमिमा राजनीति गरेँ । यहाँका जनताले व्यक्तिगत रूपमा मलाई चिन्नहुन्छ र म पनि उहाँहरूलाई व्यक्तिगत रूपमा चिन्छु । उहाँहरूको माया र सद्भाव पनि मैले जित्ने बलियो आधार हो ।’

२ पटकसम्म संसदमा रहेर गरेको योगदानलाई कदर गरेर पनि चितवनवासीले आफूलाई नै निर्वाचित गराउने उनको विश्वास छ । ‘संसदमा गएर मैले जुन भूमिका निर्वाह गरेको छु, जनताले त्यसको कदर पक्कै गर्नुहुनेछ । झण्डै १ सय ७८ वटा भन्दा धेरै कानुन नीति निर्माणमा महत्त्वपूर्ण भूमिका निर्वाह गरेको छु । संविधान मस्यौदाको मूख्य भूमिका निर्वाह गरेको छु,’ पोखरेलले भने ।

यता, सत्ता गठबन्धनबाट उम्मेदवार बनेका उमेश श्रेष्ठ पनि जित निकाल्न सहज रहेको बताउँछन् । कांग्रेसको बलियो आधार रहेको यो क्षेत्रमा थप ५ दलको साथ रहेकोले चुनाव जित्ने श्रेष्ठको दाबी छ । शिलापत्रसँग श्रेष्ठले भने, ‘अघिल्लो चुनावमा हामी गठबन्धनमा थिएनौँ, अहिले ५ दलको गठबन्धनमा छौँ । गठबन्धनको कारण चुनाव जित्ने आधार धेरै बलियो बनेको छ । म आफैँ यो क्षेत्रमा लामो समयदेखि बसेको र यो क्षेत्रको प्रगति उन्नति र समृद्धीको लागि काम गरेको मान्छे हो,’ उनले भने ।

उनले थप भने, ‘यो चुनाव उमेश श्रेष्ठ लडेको होइन, गठबन्धन लडेको हो ।’

दुई ठूला पार्टीका प्रभावशाली उम्मेदवारलाई पराजित गर्ने आत्मविश्वासहित लामिछाने मैदानमा रहेका छन् । व्यक्तिगत लोकप्रियतामा भर परेका उनीहरूले चितवनका नागरिको सचेतना नै जितको आधार मान्छन् । शिलापत्रसँग कुरा गर्दै राष्ट्रिय स्वतन्त्र पार्टीका चितवन जिल्ला सभापति धर्बेन्द्र भन्छन्, ‘यहाँका जनमानसमा म यो पार्टीको मान्छे हो, अरुलाई भोट दिन हुन्न भन्ने सोच छैन । यहाँका जनताको उदार सोच नै रवि लामिछानेले चुनाव जित्ने बलियो आधार हो ।’

लामिछाने हिरासतबाट छुट्दा यो क्षेत्रको जनताले देखाएको सद्भाव हेर्दा पनि रवि लामिछानेको जित सुनिश्चित रहेको उनको तर्क छ । उनले भने रवि लामिछाने उठे भोट उसैलाई दिन्छु भन्ने युवा जमात ठूलो छ । त्यस्तै, रविको विगतका काम देखेर उहाँलाई मन पराउने बृद्ध–बृद्धा पनि धेरै हुनुहुन्छ । चुनाव जित्न पुरानो पार्टी र ठूलो सञ्जाल मात्रै भएर हुँदैन । चितवन- २ मा स्वतन्त्र पार्टीले नै चुनाव जित्छ,’ उनले भने ।

प्रकाशित मिति: मंगलबार, असोज २५, २०७९ १९:५५