एमालेकाे 'लालकिल्ला'मा विश्व पाैडेललाई चुनाव जित्न कति सहज ?

A+ A A-

एमालेको बलियो पकड भएको चितवन–१ मा कांग्रेसले नयाँ अनुहारलाई प्रतिस्पर्धामा उतारेको छ । पछिल्लो छिमलबाट राजनीतिमा प्रवेश गरेका राष्ट्रिय योजना आयोगका उपाध्यक्ष विश्वनाथ पौडेललाई कांग्रेसले प्रतिनिधिसभाका लागि एमाले उपाध्यक्ष सुरेन्द्र पाण्डेसँग चुनावी मैदानमा उतारेको हो । पौडेल चुनावी मैदानमा ओर्लिएपछि चितवन–१ मा रोचक प्रतिस्पर्धा हुने देखिएको छ ।

यो क्षेत्रमा पूर्वअर्थमन्त्री पाण्डेसँग अर्थशास्त्री पौडेलको प्रतिस्पर्धाले मात्रै चर्चा भइरहेको छैन, कम्यनुष्टि पृष्ठभूमिका पौडेलले कांग्रेसबाट उम्मेदवार भएपछि चितवन–१ का पुराना कांग्रेस असन्तुष्ट देखिएका छन् । उनीहरूले बागी उम्मेदवारीसमेत दिएका छन् ।

पहिलोपटक चुनवाी प्रतिस्पर्धामा उत्रिएका पौडेललाई कति सहज छ ? अहिले चासोको विषय बनेको छ । विगतको पृष्ठभूमि हेर्दा पौडेललाई यो क्षेत्रमा निकै सकस पर्ने देखिन्छ ।

एमालेको किल्लाकै रुपमा यो क्षेत्रलाई व्याख्या गर्ने गरिएको थियो । २०४८ को चुनावयता लगातारजसो एमालेले यो क्षेत्रमा चुनाव जित्दै आएको छ । एमाले यो क्षेत्रमा २०४८ सालमा जागृत प्रसाद भेटवाललाई चुनावी मैदानमा उतार्दा सफलता हात पारेको थियो । त्यसपछि २०५१ सालमा भएको मध्यावधि निर्वाचनमा पनि एमालेबाट भेटवाल नै निर्वाचित भए ।

एमाले विभाजन भएपछि भएको २०५६ सालको चुनावमा भने यो क्षेत्रबाट कांग्रेसकी सावित्री बोगटी निर्वाचित भएकी थिइन् । तयसैगरी, २०६४ सालमा संविधानसभाको पहिलो निर्वाचनमा माओवादीले देशभरि बलियो उपस्थिति देखाउँदा पनि यो क्षेत्रमा एमालेका उम्मेदवार लालमणि चौधरी निर्वाचित भएका थिए । २०७० को दोस्रो संविधानसभाको चुनावामा पनि एमालेका सुरेन्द्र पाण्डेले जितेका थिए । २०७४ सालमा भएको वामगठबन्धनको तर्फबाट पनि पाण्डेले नै टिकट पाए । गठबन्धनका साझा उम्मेदवार पाण्डेले पाण्डेले ५१ हजार ८० मत ल्याएका थिए । नेपाली कांग्रेसका राजेन्द्र बुर्लाकोटीले ३५ हजार ३ सय ६० मत प्राप्त गरेका थिए । पाण्डेले १५ हजार ७२० मतान्तरले बुर्लाकोटीलाई पराजित गरे थिए ।

अहिले सत्ता गठबन्धनको तर्फबाट चितवन– १ मा पौडेल उम्मेदवार भएका छन् भने एमालेले पुनः पाण्डेलाई नै उम्मेदवार बनाएको छ । यसकारण एमालेले जसरी पनि आफ्ना जनाधार भएको क्षेत्र पुन: जितेर जनमत जोगाउने चुनौती छ । पौडेलले यो क्षेत्रमा गठबन्धनकाे सहयाेगमा जित निकाल्न बढी नै कसरत गर्नुपर्ने देखिन्छ । यद्यपि, एमाले विभाजनको असर पनि यो क्षेत्रमा देखिएको छ ।

चितवनमा सबैभन्दा बढी एमाले विभाजनको असर यही क्षेत्रमा परेको थियो । त्यसले पौडेललाई राहत दिएको छ । कांग्रेस, माओवादी केन्द्र र एकीकृत समाजवादीको मतले जित निकाल्न सहज हुन सक्छ, त्यसका लागि सत्ता गठबन्धनमा विश्वासको वातवरण बन्नुपर्ने बाध्यता पनि देखिएको छ ।

कांग्रेसभित्र देखिएको असन्तुष्टिको प्रभाव भने पाण्डेको पक्षमा देखिन्छ । त्यसलै, पौडेललाई पनि त्यति सहज देखिएको छैन । यद्यपि, कांग्रेस नेताहरू पाण्डेभन्दा पनि नयाँ अनुहकारका पौडेलप्रति बढ्ता आशावादी रहेको बताइरहेका छन् । नेपाली कांग्रेस चितवनका उपसभापति राजीव काेइरालाले पाैडेल नयाँ मान्छे नभएको र उनको क्षमता जनताले देखिसकेकाले पौडेललाई जिताउने दाबी गर्छन् ।

उनले भने, ‘पहिलो कुरा त कुनै ठाउँ कसैको किल्ला हुँदैन । जनताले सधैँ नयाँ चिज खोजेको हुन्छ । विश्व पौडेल नयाँ चिज हो, पौडेल राष्ट्रियस्तरको विज्ञ व्यक्ति भएको र सुरेन्द्र पाण्डेलाई यही ठाउँका जनताले पाण्डेलाई चुनाव जिताएर अर्थमन्त्री बनाउँदा पनि जनताले केही नपाएको कारणले पनि विश्व पौडेलले नै चुनाव जित्नुहुन्छ ।’ पौडेलले चुनाव जित्नुको अर्को मुख्य आधार गठबन्धन भएको काेइरालाको तर्क छ ।

एमालेबाट छुटेको नेकपा समाजवादीको समेत सर्मथन गठबन्धनलाई छ । 'समाजवादीका प्रभावशाली नेता तथा बहालबाला मन्त्री कृष्ण खनाल – १ (ख) मा लड्दै हुनुहुन्छ । सिङ्गो माओवादी त हाम्रो साथमा छँदै छ । विश्व पौडेलले भारी मतले जित्नुहुन्छ,’ काेइराले भने ।

तर एमाले आफू जित्नेमा ढुक्क छ । चितवन १ मा एमालेले सहज जित निकाल्ने नेकपा एमाले चितवनमा अध्यक्ष राम प्रसाद न्यौपानेको दावी छ । कांग्रेसभित्रकै असन्तुष्टि र माओवादीभित्र पनि असन्तुष्टि रहेकाले एमालेलाई समस्या नहुने उनले बताए । ‘माओवादी केन्द्रले त्यहाँ कुनै पनि सिट पाएको छैन । माओवादी केन्द्रले के गर्छ भन्ने आफैँ बुझ्नुहोला,’ उनले भने, ‘२ पटक सुरेन्द्र पाण्डेसगँ प्रतिस्पर्धी रहनु भएका कांग्रेसका राजेन्द्र बुर्लाकोटी बागी हुनुहुन्छ । अर्को एक जनाले पनि बागी हाल्नुभएको छ । प्रदेशमा पनि बागी उम्मेदवार छन् ।’ कांग्रेसभित्रै संगठित विद्राेह भएकाले एमालेलाई सहज हुने उनको तर्क छ । ‘यो परिस्थितिमा हामीलाई चुनाव जित्न गाह्रो होला र मलाई त त्यस्तो लाग्दैन । बडो सहजताले जितिन्छ,’ उनले शिलापत्रसगँ भने ।

प्रकाशित मिति: सोमबार, असोज २४, २०७९ १९:३०