०७४ का ‘घाइते बाघ’ कोइराला, चितवन-३ बाट यसपटक संसद छिर्लान् ?

A+ A A-

२०७४ सालको स्थानीय चुनावमा कांग्रेस नेता दिनेश कोइराला भरतपुर महानगरपालिकाको पहिलो मेयर बन्ने तयारीमा थिए । तर मेयरमा लड्न चाहने कांग्रेसमा तीन दर्जनजति थिए । यी सबैलाई पछि पार्दै कोइरालाले टिकट फुत्काए ।

उम्मेदवारी दिइसकेका काेइरालाकाे उम्मेदवारी सभापित शेरबहादुर देउवाले केन्द्रबाटै खारेज गराइदिए । १९ वैशाख २०७४ मा कांग्रेस सभापति देउवाले चितवन जिल्ला निर्वाचन कार्यालयमा चिठी पठाएर भरतपुर महानगरपालिकामा कोइरालाको उम्मेदवारी फिर्ता गराएका थिए । माओवादी केन्द्रका अध्यक्ष पुष्पकमल दाहाल प्रचण्डकी छाेरी रेनु दाहाललाई समर्थन गर्न देउवाले उम्मेदवारी खारेज गरेर उनलाई 'घाइते बाघ' बनाइिदए ।

२०७४ सालमै भएको संसदीय निर्वाचनमा माओवादी केन्द्रका अध्यक्ष प्रचण्डले गठबन्धनको तर्फबाट चितवन- ३ बाट उम्मेदवारी दिए । गठबन्धनको निर्णय मानेका कोइराला प्रदेशमा उठ्न चाहन्थे । तर उनले टिकट पाएनन् ।

दुई पटक ब्याक भएका कोइरालाले गठबन्धनकै कारण २०७९ जेठमा भएको स्थानीय चुनावमा पनि रेनु दाहालकै झोला बोकेर हिँड्नुपर्‍याे । यसपल्ट पनि प्रतिनिधिसभा चुनावमा चितवन-३ माओवादीकै भागमा परेकाे छ । यो क्षेत्रबाट माओवादी अध्यक्ष प्रचण्ड उठ्न खाेजेका थिए । तर अन्तिम समयमा उनी गोरखा गएपछि माओवादीले फिजिसियन डा. भोजराज अधिकारीलाई अघि सारेकाे छ ।

गठबन्धनका कारण पटकपटक पार्टीबाट टिकट खाेसिएर 'घाइते बाघ'जस्तै भएका कोइराला योपटक भने चुप लागेर बसेनन् । उनले चितवन-३ बाट स्वतन्त्र उमेदवारी दिएका छन् ।

चितवन-३ मा तुलनात्मक रूपमा कमजोर एमालेले यो ठाउँमा आफ्नो उम्मेदवारी फिर्ता लिएर राप्रपाका विक्रम पाण्डेलाई समर्थन गर्ने धेरैको आकलन थियो । एमालेले उम्मेदवारी फिर्ता त लियो तर कांग्रेसका बागी उम्मेदवार कोइरालालाई सर्मथन गर्ने निर्णय गरेर रणनीतिक मुभ गर्‍याे । एमालेको यो निर्णय गठबन्धनलाई कमजोर बनाउने चालबाजी हुन सक्छ । तर यसले कोइरालालाई भने प्रत्यक्ष फाइदा पुग्नेछ ।

हुन त, चितवन ३ मा कांग्रेसबाट कोइरालाबाहेक तारानाथ पौडेल र जगन्नाथ पौडेलले पनि बागी उम्मेदवारी दिएका छन् । जसकाे काेइरालालाई नै असर पर्ने देखिन्छ । पाैडेलद्वयले काेइरालालाई आउने भाेट नै काट्नेछन् ।

तथापी एमालेको सर्मथनपछि कोइराला सशक्त उम्मेदवारका रूपमा देखा परेका छन् । शिलपत्रसँग कुरा गर्दै काेइरालाले गठबन्धनविरुद्ध उम्मेदवारी जनताको माग भएको बताए । भन्छन्, ‘हामीले पार्टीको निर्णय मानेकै थियौं । पटक-पटक मओवादीलाई जितायौं । एकपटक त मेरो टिकट पनि खोसियो । अहिले प्रचण्ड गोरखा गएपछि गैरराजनैतिक व्यक्तिलाई प्रचण्डको खराउको रूपमा चितवन- ३ मा राखेको त कसरी सहनु ?’

गठबन्धनले गैरराजनीतिक व्यक्तिलाई राजनीतिमा घुसाएकोमा उनको गुनासो छ । ‘डा भोजराज अधिकारी निकै राम्रो डाक्टर हुनुहुन्छ । उहाँलाई डाक्टरी पेशा नै सुहाउँछ । राजनीतिक दलले चुनाव लड्ने मान्छे नपाएर राजनीतिमै नलागेका डाक्टरलाई उठाउनु कति उचित हो ?,’ उनले भने, ‘प्रचण्डको आदेशमा मर्न र मार्न तयार भएका, घरबार त्यागेका नेताहरू थिएनन् र !’

‘जनताको भावना बोकेर जनतासामु जाँदैछु, त्यही आधारमा चुनाव जित्छु । एमालेले सहयोग गरिसकेको छ, कांग्रेसको सहयोग पनि मलाई हुन्छ । माओवादीलाई पनि मलाई जिताउन आग्रह गर्छु किन भने २ वटा चुनावमा मैले माओवादीमा लगानी गरेको छु । दिनरात नभनी माओवादीका उम्मेदवारलाई जिताएको छु,’ कोइरालाले भने । न्यायका लागि लड्दा चुनाव हारे पनि कुनै दुखेसो नहुने उनी बताउँछन् ।

‘चुनाव हार्ने सवालै छैन । हारे पनि के हुन्छ र कारवाही भए ५ वर्ष कुरौँला । त्यही पनि पार्टीले कतिलाई कारवाही गर्दै जाने । नेताहरूले अन्याय गरिरहने, परिवारवादमा जाने अनि सही काम गर्नेलाई कारवाही गरिरहने । सबैलाई कारवाही गरे पार्टीमा २ नेताको परिवार मात्रै रहने हो र ?,’ उनले भने । अरु कांग्रेस नेतालाई कारवाही गरेकोमा समेत कोइरालाको असन्तुष्टि छ ।

‘हँसिया हथौडामा भोट हालेन भनेर मलाई कांग्रेस बनाउनेहरूलाई मैले पार्टीबाट निकाल्नुपर्ने अनि उमेश श्रेष्ठ जस्ता, योजना आयोगका उपाध्यक्ष विश्व पौडेलजस्ता र प्रचण्डका खराउ उम्मेदवार डाक्टर भोजराज अधिकारीजस्तालाई बोक्नुपर्ने अवस्था आयो,’ उनले भने । पार्टीको गलत निणर्य मानेर ठूलो मान्छे बनिरहनुभन्दा, पार्टीको कारवाही भोगेर भए पनि दास प्रवृति अन्त्य गर्न लागेको कोइरालाको तर्क छ ।

पार्टीले दिनेश कोइरालालाई समर्थन गर्ने निर्णय गरिसकेकाले एमाले चितवनले खुला हृदयले उनको सर्मथन गर्ने नेकपा एमाले चितवनका अध्यक्ष रामप्रसाद न्यौपाने बताउँछन् । गठबन्धनको गलत क्रियाकलापविरुद्ध कोइरालाले आवाज उठाएकाले उनलाई एमाले कार्यकर्ताले साथ दिने उनको तर्क छ । ‘बफादार कार्यकर्ताको हैसियतले हामी पार्टीको निर्णय मान्छौं । हाम्रो उदेश्य पनि गठबन्धनको गलत गतिविधिविरुद्ध नै हो । त्यसकारण पार्टीको निणर्य बमोजिम मेरो उम्मेदवारी फिर्ता भएको हो,’ न्यौपानेले भने ।

प्रकाशित मिति: शनिबार, असोज २९, २०७९ १४:४०