कांग्रेसका बागीलाई समर्थन गर्ने एमालेको 'चालबाजी'ले रोचक मोडमा चितवनको चुनावी प्रतिस्पर्धा

कांग्रेसका बागीलाई समर्थन गर्ने एमालेको 'चालबाजी'ले रोचक मोडमा चितवनको चुनावी प्रतिस्पर्धा

A+ A A-

चितवन- ३ बाट नेकपा एमालेका रामप्रसाद न्यौपानेले उम्मेदवारी फिर्ता लिएसगैँ चितवनको चुनावी प्रतिस्पर्धाले रोचक मोड लिएको छ । कांग्रेसको 'गढ' मानिएको यो क्षेत्रमा एमालेले कांग्रेसकै बागी उम्मेदवार दिनेश कोइरालालाई सघाउँदै छ ।

धेरै अनुमानचाहिँ एमालेले राप्रपाका उम्मेदवार विक्रम पाण्डेलाई सहयाेग गर्छ भन्ने थियाे । विभिन्न निर्वाचन क्षेत्रमा तालमेल गरेका कारण उक्त अनुमान अस्वभाविक थिएन । पाण्डे स्वयंले पनि एमालेकाे समर्थनका लागि प्रयास गरेका थिए ।

तर, अन्तिम समयमा एमाले का‌ंग्रेसका बागी उम्मेदवारलाई सहयाेग गर्ने निर्णयमा पुगेकाे छ । यो क्षेत्रमा तुलनात्मक रूपमा कमजोर एमालेले रणनीतिक रूपमा आफ्नो दाउ चालेको देखिन्छ । एमालेलाई पाँच दलीय गठबन्धनका उम्मेदवार डा. भोजराज अधिकारी र राप्रपाका विक्रम पाण्डेलाई पाखा लगाएर चुनाव जित्न 'महाभारत' थियो । तर, चुनावी गणितमा 'किङमेकर' को भूमिका निभाउने रणनीति लिएकाे छ ।

अब कांग्रेसका बागी उम्मेदवार कोइरालालाई जिताउने एमालेको प्रयास हुनेछ । एमालेकाे याे निर्णयले अन्य क्षेत्रका कांग्रेसकाे असन्तुष्ट पक्षको मत आफूतिर तान्ने रणनीति रहेको बुझ्न गाह्रो छैन । अर्थात्, कोइरालालाई समर्थन गरी चितवनका कांग्रेस कार्यकर्ताहरूको सहानुभूति बटुलेर क्षेत्र नम्बर १ मा सुरेन्द्र पाण्डे र क्षेत्र नम्बर २ मा कृष्णभक्त पोखरेलका लागि भोट तान्न खोजेको जस्तो पनि देखिन्छ ।

यद्यपि, गठबन्धनमा अन्तर्घात नभए भोजराज अधिकारीले जित्ने सम्भावना छ । त्यस्तै राप्रपाका विक्रम पाण्डे पनि सशक्त प्रतिस्पर्धी हुन् । एमालेको समर्थन पाएकाे भए पाण्डेले जित्ने सम्भावना पनि थियो ।

त्यसो त चितवनमा कांग्रेस निकै बलियो मानिन्छ । सोहीकारण २०७० को दोस्रो संविधासभाको चुनावमा कांग्रेसका तत्कालीन सभापति सुशील कोइराला चुनाव लड्न चितवन- ४ पुगेका थिए । उनले निकटतम प्रतिद्वन्द्वी माओवादीका चित्रबहादुर श्रेष्ठलाई १० हजारभन्दा बढी मतान्तरले पराजित गरेका थिए ।

सोही चुनावमा चितवन- ५ बाट राप्रपाका विक्रम पाण्डेले एमालेका दानबहादुर तामाङलाई २ हजारभन्दा धेरै मतान्तरले पराजित गरेका थिए । निर्वाचन क्षेत्र परिर्माजनसगैँ यी दुई क्षेत्र चितवन- ३ बन्यो । निर्वाचन क्षेत्र मर्ज भएसगैँ यहाँ माओवादी केन्द्रको इन्ट्री भयो ।

२०७४ को चुनावमा एमालेको सहयोगमा प्रचण्डले विक्रम पाण्डेलाई ९ हजारभन्दा बढी मतान्तरले पराजित गरे । पाण्डेलाई त्यसबेला कांग्रेसले सघाएको थियो । कांग्रेसको समर्थन पाएर पनि त्यसबेला चितवन- ३ बाट पाण्डेले प्रचण्डको जित रोक्न सकेनन् ।

चितवनका कांग्रेस नेता-कार्यकर्ता पहिल्यैदेखि गठबन्धनको विरोधमा छन् । मा‌ओवादी केन्द्रका अध्यक्ष प्रचण्डले कहिले कांग्रेस र कहिले एमालेसँग गठबन्धन गरी यो क्षेत्रमा आफ्नो प्रभाव विस्तार गरिरहेका छन् । पछिल्लो समय चितवनमा आफ्नो पार्टीको पक्कड निकै बढेको माओवादीका जिल्ला नेताहरू बताउँछन् । चितवनमा माओवादी बढेकै कारण ३० वैशाखकाे स्थानीय तहकाे चुनावमा रेनु दाहालले त कांग्रेसकाे समर्थनबिना पनि मेयरमा लड्ने हिम्मत गरेकी थिइन् ।

त्यसलाई रोक्न कांग्रेस नेताहरूले चितवन- ३ मा बागी उम्मेदवारी दिँदै आएका छन् । गत स्थानीय चुनावमा कांग्रेसका बागी उम्मेदवार जगन्नाथ पौडेलले १४ हजार ७२८ मत प्राप्त गरे । स्थानीय चुनावमा पौडेलले पाएझैँ कोइरालाले मत पाउने र त्यसमा एमालेको पनि भोट थपिएमा भने परिणाम कोइरालाको पक्षमा पर्न सक्ने सम्भावना पनि छ ।

अर्कातर्फ राप्रपाका पाण्डे पनि बलिया प्रतिस्पर्धी हुन् । चितवनको माडी क्षेत्रमा उनको राम्रो पक्कड छ । माडीबाट राम्रो भोट ल्याएर कांग्रेस र एमालेको भोट तान्न सके यसपटकको परिणाम उनको पक्षमा पर्न सक्ने सम्भावनालाई पनि नकार्न सकिन्न ।

गठबन्धनका उम्मेदवार अधिकारीविरुद्ध कांग्रेस नेता कोइरालाले बागी उम्मेदवारी दिएपछि एमालेले रणनीतिक चाल चालेर कोइरालालाई समर्थन गर्ने निर्णय लिएको छ । यसका लागि कोइरालाले पनि लामै प्रयास गरेको देखिन्छ । एमालेको समर्थन लिनका लागि कोइरालाले केही दिनअघि एमाले अध्यक्ष केपी ओलीसँग लामो संवाद गरेका थिए । काठमाडौं आएर ओलीको वचन पाएर कोइराला चितवन फर्किन नपाउँदै एमालेका उम्मेदवार न्यौपाने पनि काठमाडौं आएका थिए । न्यौपानेको जोडचाहिँ उम्मेदवारी फिर्ता नलिने भन्ने थियो ।

न्यौपानेसहितको जोडका कारण एमाले र राप्रपाको तालमेल हुन सकेको थिएन । आफ्नो उम्मेदवारी कायम राख्न न्यौपानेले राप्रपाका पाण्डेलाई सहयोग गर्ने अडान राखेकै कारण अहिले कांग्रेस नेता कोइरालाका लागि पछाडि हट्ने मनसायमा न्यौपाने थिएनन् । चितवनका एमाले नेताहरूको भनाइमा न्यौपानेले त्यही सन्देश अध्यक्ष ओलीसमक्ष पुर्‍याएका थिए । तर, ओली त्यसमा सहमत देखिएनन् । र, कोइरालाको पक्षमा निर्णय लिएर न्यौपानेलाई उम्मेदवारी फिर्ता गर्न निर्देशन दिए ।

अहिले न्यौपाने पनि असन्तुष्ट रहेको एमालेका एक नेताले बताए । ती नेताका अनुसार एमालेले कोइरालालाई समर्थन गर्ने निर्णय गरे पनि असन्तुष्ट एमालेले उनलाई साथ नदिन सक्छन् । त्यसो त, गठबन्धन भएकै कारण कांग्रेस एउटा पङ्क्तिले माओवादीका उम्मेदवार अधिकारीको पक्षमा मतदान गर्न सक्छन् । अनि, ती एमालेका असन्तष्टको मत अधिकारी वा पाण्डेको पक्षमा खस्न सक्छ । जसले गर्दा, चितवन– ३ को चुनावी परिणाम फरक पर्न सक्छ । त्यसो त, रवि लामिछानेले चितवन–३ छोडेर २ मा जानुमा राप्रपाका उम्मेदवार पाण्डेलाई सहयोग पुर्‍याउनका लागि भएको विश्लेषण पनि भइरहेको छ ।

राप्रपाका पाण्डे रवि लामिछानेका सुसुरा उद्धव पौडेलको साथी र पौडेलकै पार्टीको नेता पनि भएका कारण लामिछानेले पूर्व निर्णयविपरीत क्षेत्र परिवर्तन गरेको चर्चा भइरहेको छ । त्यसैले, एमालेको पछिल्लो निर्णयले पनि चितवनको तीनवटै निर्वाचन क्षेत्रको चुनावी नतिजा रोचक आउन सक्ने देखिएको छ ।

प्रकाशित मिति: बुधबार, असोज २६, २०७९ १६:१६