नवौँ राष्ट्रिय खेलकुदः हक्कीमा गण्डकी र आर्मीको विजयी सुरुआत

A+ A A-

नवौँ राष्ट्रिय खेलकुद प्रतियोगिताअन्तर्गत हक्कीको महिलातर्फ घरेलु टोली गण्डकी प्रदेश र पुरुषतर्फ विभागीय त्रिभुवन आर्मी क्लबले विजयी सुरुआत गरेका छन् ।

गण्डकी बोर्डिङ स्कुल लामाचौर पोखराको मैदानमा बिहीबारदेखि सुरु भएको हक्की प्रतियोगिताको उद्घाटन खेलमा गण्डकीले प्रदेश १ लाई ७–० अन्तरले पराजित गरेको हो ।

गण्डकीकी सोनु बरालले १३औँ मिनेटमा गोल गरिन् । त्यसको दुई मिनेटपछि सबिना पुन रानाले गोल गर्दै अग्रता दोब्बर पारिन् । गण्डकीले दोस्रो क्वार्टरमा थप आक्रामक खेल्दै २ गोल थप्यो । कमला पुनले गोल दुई गोल गर्दै गण्डकीलाई ४–० को अग्रता दिलाइ्न । तेस्रो क्वार्टरमा गण्डकीले थप दुई गोल थप्दै फराकिलो अग्रता बनायो । ३४औँ मिनेटमा सोनु बरालले पुनः एक गोल गरिन् । कमलाले ४२औँ मिनेटमा खेलमा व्यक्तिगत तेस्रो गोल गरिन् । अन्तिम क्वार्टरमा गण्डकीको तर्फबाट दिपशिखा पौडेलले ५५औँ मिनेटमा गोल थप्दै टोलीको जित पक्का गरिन् ।

यसअघि उद्घाटन खेल बागमती प्रदेश र सुदूरपश्चिम प्रदेशबीच हुने भनिए पनि जर्सी नआईपुगेपछि गण्डकी र प्रदेश- १ बीच प्रतिष्पर्धा गराइएको हो ।

पुरुषतर्फ आर्मीले गण्डकी प्रदेशलाई ४–० गोल अन्तरले पराजित गर्दै विजयी सुरुआत गरेको छ । पोखराको हेमजास्थित गौरीशंकर खेल मैदानमा आर्मीका लागि राजेन्द्र कार्कीले गोल गर्दै अग्रता दिलाए । २८औँ मिनेटमा कार्कीले नै दोस्रो गर्दै आर्मीलाई २–० को अग्रता दिलाए । खेलको ३७ औँ मिनेटमा प्रदीप राजवंशीले तेस्रो गोल गरे भने ४२ औँ मिनेटमा रोमन रानाले गोल गर्दै आर्मीलाई ४–० को फराकिलो जित दिलाएका हुन् ।

मैदान ढिलो तयार हुँदा प्रतियोगिताको उद्घाटन पनि निर्धारित समय भन्दा केहिबेर ढिलो भएको थियो । उद्घाटन खेल सुदूरपश्चिम प्रदेश र प्रदेश नं. १ बीच हुने भनिएपनि पहिलो खेलको समय गुज्रिएपछि नेपाल आर्मी र गण्डकी प्रदेशबीच भएको थियो । प्रतियोगिताको युवा तथा खेलकुद मन्त्री महेश्वरजंग गहतराजले गरेका थिए ।

प्रकाशित मिति: बिहीबार, असोज २७, २०७९ १८:०२