गोरखामा माओवादीको दुःख: छोडौँ कार्यकर्ता रुष्ट हुने, नछोडौँ बाबुरामसँगै गठबन्धन टुट्ने डर

गोरखामा माओवादीको दुःख: छोडौँ कार्यकर्ता रुष्ट हुने, नछोडौँ बाबुरामसँगै गठबन्धन टुट्ने डर

A+ A A-

नेकपा माओवादी केन्द्रले स्थानीय तहमा राम्रो परिणाम ल्याएको जिल्ला हो- गोरखा । गोरखाका ११ स्थानीय तहमध्ये ९ पालिका मा‌ओवादी केन्द्रले जितेको छ । बाँकी दुई पालिका भने कांग्रेसले जितेको छ । गोरखामा अघिल्लो निर्वाचनमा कांग्रेससँग मिलेर क्षेत्र नम्बर २ मा बाबुराम भट्टराई विजयी भएका थिए । त्यतिबेला बाबुरामले एमाले-माओवादी केन्द्रको गठबन्धनबाट उठेका माओवादीका नारायणकाजी श्रेष्ठलाई पराजित गरेका थिए । क्षेत्र नम्बर १ मा कांग्रेसका चिनकाजी श्रेष्ठलाई पराजित गर्दै माओवादी केन्द्रका हरिराज अधिकारी निर्वाचित भएका थिए ।

अहिले भने गोरखाको राजनीतिक स्थिति फरक छ । अघिल्लो चुनावमा माओवादी र एमालेबीच गठबन्धन भएको थियो भने यो पटक एमालेविरुद्ध पाँचदलीय गठबन्धन चुनावी मैदानमा उत्रिँदैछ । अघिल्लो पटक कांग्रेससँग मिलेर जितेका बाबुराम यो पटक माओवादी केन्द्रको चुनाव चिह्नमा लड्ने भएका छन् । भट्टराई माओवादीको चुनाव चिह्नमा लड्ने भनेपछि नेतृत्व तह खुसी भए पनि गोरखा माओवादीमा भने अन्योल बढ्न थालेको छ ।

पार्टी केन्द्रले निर्णय गरे पनि गोरखामा त्यो सह्य नहुने पालुङटार नगरपालिकाका मेयर तथा पालिका कमिटी अध्यक्ष विवश चिन्तकले भने, ‘गोरखा क्षेत्र नम्बर २ मा बाबुरामलाई टिकट दिने निर्णय गरेमा हामी मान्न बाध्य हुनेछौँ । तर, जनता स्वतन्त्र हुन्छन् । आफ्नो विवेकले भोट हाल्छन् । कसैले पार्टीको निर्णय नमान्न सक्छन् । जुन माओवादीका लागि पनि प्रत्युत्पादक हुनसक्छ । त्यही भएर माओवादीले नै टिकट पाउनुपर्छ ।’

पाँचदलीय भागवण्डा हुँदा माओवादीले गोरखामा संघको निर्वाचन क्षेत्र पाउँछ कि पाउँदैन भन्ने दुविधा छ । तर, जिल्लामा नौवटा स्थानीय तह जितेकाले माओवादीले संघका दुवै क्षेत्र पाउनुपर्ने चिन्तक बताउँछन् । गठबन्धनमा भएको सहमतिअनुसार जसले जुन क्षेत्र जितेको छ त्यो क्षेत्र त्यही पार्टीले पाउने छ । त्यसैले गोरखा क्षेत्र नम्बर २ र १ प्रदेशसभा जनता समाजवादी पार्टीले पाउने आधार भएको गोरखाका जनता समाजवादीका अध्यक्ष यानप्रसाद भट्ट बताउँछन् ।

उनले भने, ‘गठबन्धनमा भएको सहमतिअनुसार गोरखा २ हामीले पाउनुपर्ने हो । माओवादीका साथीहरू पनि लगभग सबै सहमत छन् । तर, कांग्रेसले पनि गोरखा २ मै दाबी गरेकाले कुरा नमिलेको भन्ने सुनेको छु । सहमतिअनुसार हाम्रो भागमा नै हो यो निर्वाचन क्षेत्र ।’

मतका आधारमा कांग्रेस माओवादीभन्दा अलिकति मात्र कम भएकाले गठबन्धनको मर्मअनुसार प्रतिनिधिसभाको एउटा क्षेत्र र प्रदेशतर्फ दुई क्षेत्र कांग्रेसले पाउनुपर्ने कांग्रेस जिल्ला सभापति नन्दप्रसाद न्यौपाने बताउँछन् ।

उनले भने, ‘गोरखामा मतका आधारमा माओवादी र कांग्रेसबीच धेरै फरक छैन । स्थानीय तहको मत परिणामा नौवटा स्थानीय तह माओवादीले जितेको हो । तर, चारवटा पालिकामा कांग्रेसको कार्यपालिकामा बहुमत छ, जसमा दुई पालिका जितेको छ । यही आधारमा हामीले प्रतिनिधि र प्रदेशसभामा दाबी गरेका छौँ ।’

राष्ट्रिय नेता भएकाले बाबुराम गोरखामा नभई अन्य जिल्लामा गएर पनि चुनाव लड्न तयार हुनुपर्ने माओवादी केन्द्रका जिल्ला इन्चार्ज तथा केन्द्रीय सदस्य कृष्ण धितालले बताए । उनले भने, ‘न्यायपूर्ण तरिकाले भागवण्डा हुन्छ होला । गोरखाका विषयमा अध्यक्ष प्रचण्डले बुझ्नु भएको छ । हामीले धेरै दुःख गरेर पार्टीलाई फेरि पहिलाको अवस्थामा पुर्‍याएका छौँ । त्यही भएर दुःख गरेर संगठन बनाएकाले गोरखा माओवादीले नै लिनुपर्छ ।’

स्थानीय तहका प्रमुख माओवादीले जिते पनि मतलाई आधार मान्दा बराबरजस्तै भएकाले माओवादी र कांग्रेसले बराबर सिट बाँडफाँट गर्नुपर्ने कांग्रेस सभापति न्यौपाने बताउँछन् । माओवादीको चुनाव चिह्नबाट चुनाव लड्ने बाबुराम नेतृत्वको नेपाल समाजवादी पार्टीले निर्णय गरेपछि सबैभन्दा अप्ठ्यारो गोरखाका माओवादीलाई भएको माओवादीकै एक नेता बताउँछन् ।

माओवादीका स्थानीय तहका नेता-कार्यकर्तादेखि केन्द्रीय सदस्यसम्मले गोरखामा प्रतिनिधिसभाको दुवै निर्वाचन क्षेत्र पाउनुपर्ने बताउँछन् । माओवादीका क्षेत्र नम्बर २ का इन्चार्ज परशुराम रम्तेल पनि गोरखामा प्रतिनिधिसभाका दुवै निर्वाचन क्षेत्र माओवादीले नै पाउनु पर्ने बताउँछन् । उनले भने, ‘क्षेत्र नम्बर २ बाट नारायणकाजी श्रेष्ठले पनि उठ्ने भन्नुभएको छ । अहिले उहाँ राष्ट्रियसभामा हुनुहुन्छ । यदि उहाँ उठ्नु भएन भने अर्को माओवादी नेताले टिकट पाउनुपर्छ ।’

माओवादीको गण्डकी प्रदेशमा सबैभन्दा राम्रो संगठन भएको जिल्ला पछिल्लो समयमा गोरखा बनेको छ । माओवादीलाई गोरखा छोडौँ कार्यकर्ता रुष्ट हुने, नछोडौँ बाबुराम र कांग्रेससँगको गठबन्धनमा असर पर्ने डर छ ।

माओवादी र का‌ंग्रेसकाे मत झण्डै बराबरी !

माओवादी केन्द्रले बारपाक सुलिकोटकाे अध्यक्षमा ५ हजार ७ सय १९ मत ल्याएर विजयी भयो । कांग्रेसले ४ हजार ८ सय ६४ मत ल्याएको छ । शहीद लखनकाे अध्यक्षमा माओवादीले ५ हजार ४ सय ७४ मत ल्याएर विजयी हुँदा कांग्रेसले ४ हजार ४ सय ३२ मत ल्याएको छ । भीमसेन थापा गाउँपालिकाको अध्यक्षमा माओवादीले ५ हजार ६ सय ५१ मत ल्याएर विजयी हुँदा कांग्रेसले ५ हजार १ सय ७६ मत ल्याएको छ ।

पालुङटार नगरपालिकामा माओवादीबाट जितेका अध्यक्षले ६ हजार ७२ मत ल्याउँदा जनता समाजवादीले ५ हजार ७ सय १७ मत ल्याएको छ । कांग्रेसले भने ४ हजार ९ सय ९७ मत ल्याएको छ । धार्चेमा माओवादीले अध्यक्षमा ३ हजार ७ सय ७१ मत ल्याउँदा कांग्रेसले १९४६ मत ल्याएको छ ।

चुमनुव्री गाउँपालिकामा माओवादीले १६२४ मत ल्याउँदा कांग्रेसले १३११ मत पायो । गोरखा नगरपालिकाको मेयरमा माओवादीले ८९६४ मत ल्याएर विजयी हुँदा कांग्रेसले ७१०८ मत पाएको छ । गण्डकी गाउँपालिकामा माओवादीका अध्यक्षले ६३२६ मत पाउँदा कांग्रेसले ४६५५ मत पाएको थियो । अजिरकोटमा अध्यक्षमा माओवादीले ३७८७ मत पाउँदा कांग्रेसले ३२८९ मत पाएको छ ।

कांग्रेसले जितेका दुई पालिकामध्ये आरुघाटको अध्यक्षमा कांग्रेस ५५५६ मतका साथ विजयी हुँदा माओवादीले ४८३३ मत पायो । सिरानचोक गाउँपालिका अध्यक्षमा कांग्रेसले ५४०३ मत पाउँदा माओवादीले ४१६८ मत पाएको थियो ।

प्रकाशित मिति: बुधबार, असोज ५, २०७९ ०७:३१