कञ्चनपुर–गड्डाचौकी–चिसापानी राजमार्ग स्तरोन्नतिको काम सुरु

A+ A A-

पूर्व-पश्चिम राजमार्गअन्तर्गत कञ्चनपुरको गड्डाचौकीदेखि कैलालीको चिसापानीसम्म राजमार्ग स्तरोन्नतिको काम सुरु भएको छ । सडक डिभिजन कार्यालय महेन्द्रनगरले प्रत्येक वर्षको कार्यक्रमअनुसार यस वर्ष गड्डाचौकीदेखि चिसापानीसम्मको क्षेत्रलाई मर्मत तथा स्तरोन्नति गर्ने कार्यलाई सुरु गरेको हो ।

कार्यालयले हाल ठेक्का प्रक्रिया अगाडि बढाएर स्तरोउन्नतिको कार्य सुरु गरेको जनाएको छ । कार्यालयका अनुसार सडक क्षेत्रमा भएका खाल्डाखुल्डी पुर्ने, सडक भासिएको ठाउँमा मर्मत गर्ने, साँघुरो स्थानमा सडक चौडा पार्ने काम गरिनेछ ।

यस्तै, गड्डाचौकी क्षेत्रबाट अगाडि बजार क्षेत्रभन्दा अत्तरियातर्फको राजमार्ग क्षेत्रको चोकको केही भाग गत वर्षको कार्यक्रमअनुसार नै चौडा पारिसकिएको छ । जसका कारण महेन्द्रनगर बजार क्षेत्रको बसपार्क क्षेत्रमा आवतजावत गर्न निकै सहज भएको छ । डिभिजन कार्यालयले राजमार्ग पुनःस्थापना तथा स्तरोउन्नति कार्यक्रमअन्तर्गत यस वर्ष वार्षिक कार्यक्रमअनुसार १० करोड बजेट पाएको छ । जसमा गड्डाचौकीदेखि चिसापानी क्षेत्रसम्म राजमार्ग स्तरोन्नति गर्ने कार्यक्रम छ ।

अघिल्लो वर्षको कार्यक्रममा भासी, लालपुर, दैजी, झलारी, वाणी र गुलरिया चोकमा सडक चौडा पारिएको थियो । यस वर्ष थप केही चोकमा सडक चौडा पारिने सडक डिभिजन कार्यालयले जनाएको छ ।

स्तरोन्नति कार्यक्रमका लागि डिभिजन कार्यालयलाई प्राप्त बजेट निकै कम हो । कम बजेट भएका कारण स्तरोउन्नति कार्यक्रमलाई प्रत्येक वर्ष गरिने गरिन्छ ।

यसैगरी, स्तरोउन्नति कार्यक्रमअन्तर्गत नै पूर्व–पश्चिम राजमार्गको दैजीदेखि गड्डाचौकीसम्म चौडा पार्ने काम पनि गरिएको छ । यस वर्षको स्तरोन्नतिको केही काम भने सुरु भएको छ भने केही काम ठेक्का प्रक्रियामा छ । कार्यालयले यस वर्ष चारवटा ठेक्का लगाएर सडक स्तरोन्नति कार्य गर्नेछ ।

प्रकाशित मिति: सोमबार, माघ १०, २०७८ १७:२५