सरकारले तिरिदिने भयो धुर्मुस-सुन्तलीकाे ऋण तर त्यसअघि हुनेछ- लेनदेनको जाँचबुझ

सरकारले तिरिदिने भयो धुर्मुस-सुन्तलीकाे ऋण तर त्यसअघि हुनेछ- लेनदेनको जाँचबुझ

A+ A A-

चितवनमा निर्माणाधीन गौतमबुद्ध अन्तर्राष्ट्रिय क्रिकेट रङ्गशालाकाे बाँकी काम हरहिसाब प्रस्ट भएपछि सरकारले नै अघि बढाउने भएकाे छ । कलाकारद्वय सीताराम कट्टेल र कुञ्जना घिमिरेले चलाएकाे धुर्मुस-सुन्तली फाउण्डेसनकाे आग्रहअनुसारै सरकारले स्वामित्व ग्रहण गर्न लागेकाे हाे । रंगशाला निर्माणका क्रममा लागेकाे ऋण जाँचबुझ र मूल्याङ्कनपछि सरकारले नै तिरिदिने भएकाे छ ।

झण्डै ३ अर्ब लागत अनुमान गरिएकाे आयोजना केन्द्र सरकार वा भरतपुर महानगर कसले अघि बढाउने भन्नेमा केही दिनमै निर्णय हुने युवा तथा खेलकुदमन्त्री महेश्वरजंग गहतराजले बताए ।

धुर्मुस–सुन्तली फाउण्डेसनले रोक्यो क्रिकेट रंगशाला बनाउने काम, धुर्मुस भन्छन्, '१६ करोड ऋण लाग्यो'

करिब ३५ प्रतिशत काम भएपछि १७ कराेड ऋण लागेकाे र अपेक्षाअनुसार रकम नउठेकाे भन्दै गत साउनमा फाउण्डेसनले रंगशाला निर्माणकाे काम राेकेर आर्थिक सहयाेग गर्न सरकारलाई लिखित आग्रह गरेकाे थियाे । तर, ठूलो राशि भएकाले फाउण्डेसनलाई रकम नदिने संकेत मन्त्रालयबाट पाएपछि फाउण्डेसन अध्यक्ष धुर्मुसले सरकारलाई नै बाँकी काम पूरा गर्न आग्रह गरेका हुन् । दुई दिनअघि मात्र खेलकुदमन्त्रीलाई भेट्न पुगेका उनले महानगरसँग भएको सम्झौता पुनः स्मरण गराएका थिए ।

विशेष परिस्थितिमा निर्माणकै क्रममा फाउण्डेसनले रंगशालाकाे स्वामित्व भरतपुर महानगरपालिकालाई हस्तान्तरण गर्न सक्ने सम्झाैतामा उल्लेख छ । साेहीअनुसार स्वामित्व ग्रहण गर्न फाउण्डेसनले लिखित पत्रमा पनि अनुराेध गरेकाे थियाे, जुन पत्र फाउण्डेसनले महानगर र मन्त्रालयलाई बुझाएकाे छ । धुर्मुसले रंगशाला निर्माणका क्रममा लागेको १७ करोड ऋण तिरिदिन र अहिलेसम्म ज–जसले सहयोग गरे, उनीहरूको नाम शिलालेखमा राख्न अनुरोध गरेको मन्त्री गहतराजले बताए ।

१६ कराेड ऋणले राेकिएका धुर्मुसकाे बयान : जताततै उधाराे भयाे, काम अघि बढाउनै मुस्किल पर्‍याे

भेटमा धुर्मुसलाई दुइटा विकल्प सुझाएको भन्दै मन्त्री गहतराजले शिलापत्रसित भने, 'पहिलो, फाउण्डेसनकै प्रस्तावअनुसार महानगरले रंगशालाको स्वामित्व लिने दोस्रो, फाउण्डेसन र महानगरपालिकाको प्रस्तावअनुसार केन्द्र सरकारले नै बाँकी काम अघि बढाउनेछ ।'

चन्दा उठाएर देश बनाउने लाेकरिझ्याइँमा लाग्दा टाट पल्टेका धुर्मुस सुन्तली

भरतपुर महानगरपालिकाका प्रवक्ता अरुणपीडित भण्डारीका अनुसार धुर्मुसको प्रस्तावमा छलफल भइरहेको तर कुनै निर्णय भइसकेकाे छैन । 'चाँडै नै यससम्बन्धी निर्णय भएर निर्माण कार्यले निरन्तरता पाउँछ', उनले शिलापत्रसित भने ।

ऋण कसले तिर्ने ?

यसबारे मन्त्री गहतराजले फाउण्डेसनसँग महानगरले छलफलपछि दिने सुझावअनुसार निर्णय हुने बताए ।

भरतपुर महानगरकी मेयर रेनु दाहालले महानगरलाई प्राप्त विवरणहरूकाे जाँचबुझपछि रंगशाला र ऋणबारे निर्णय गरी खेलकुद मन्त्रालय हुँदै मन्त्रिपरिषदमा प्रस्ताव पठाउने बताइन् । 'निर्माणाधीन रंगशाला बनाेस् भन्नेमा हामी पनि उत्तिकै गम्भीर छाैँ । हामीले फाउण्डेसनलाई काम अघि बढाउन वा विगतमा भएकाे सम्झौताअनुसार स्वामित्व हस्तान्तरण गर्न भनेका थियाैँ', दाहालले भनिन् ।

यसबारे थप प्रस्ट पार्दै महानगरका प्रमुख प्रशासकीय अधिकृत रामबन्धु सुवेदीले फाउण्डेसनले पेस गरेको कागजातकाे आर्थिक तथा प्राविधिक पक्षको अध्ययन गरिने बताए । 'विवरणहरू सघन शहरी तथा भवन निर्माण आयोजना भरतपुरमा पठाइएको छ । अब नेपाल चार्टर एकाउन्टेन्ट संस्थाबाट जाँचबुझ गराएपछि महानगरले निर्णय गर्छ र खेलकुद मन्त्रालयमार्फत मन्त्रिपरिषद्‌मा पेस हुन्छ', उनले शिलापत्रसित भने ।

महानगरका प्रवक्ता भण्डारीले ऋणसम्बन्धी धुर्मुसबाट फरक-फरक अभिव्यक्ति आइरहेको बताए । 'दुई महिनाअघि उहाँले महानगरलाई १५ करोड ४५ लाख ऋण लागेको जानकारी गराउनुभएकाे थियाे । अहिले १७ करोड भन्दै हुनुहुन्छ । जबकि, याेबीचमा केही काम भएकाे छैन । खास कति हो, त्यो कुरा बुझ्न अहिलेसम्म भएको काम, लागत र कागजात मूल्याङ्कन गरेपछि मात्र थाहा होला । त्यसैअनुसार निर्णय हुनेछ', भण्डारीले भने ।

फाउण्डेसनका अध्यक्ष धुर्मुसले १७ करोड ऋण लागेको, कोरोनाका कारण आर्थिक सहयोग संकलन हुन नसकेकाले रंगशाला निर्माणको काम अघि बढाउन नसकिएको बताउँदै आएका छन् । उनका अनुसार रंगशालाकाे ३५ प्रतिशत काम सकिँदासम्म साढे ५४ करोड रुपैयाँभन्दा बढी खर्च भइसकेको छ । यसमा १७ कराेड रुपैयाँ ऋण रहेकाे उनकाे दाबी छ । झण्डै ३ सय करोडको योजना पैसा उठाएरै पूरा गर्ने भन्दै १६ माघ २०७५ धुर्मुस–सुन्तलीले अन्तर्राष्ट्रिय रंगशाला बनाउने घोषणा गरेका थिए । रंगशाला त्रिभुवन र कृषि तथा वन विज्ञान विश्वविद्यालयकाे जग्गामा बनिरहेकाे छ ।