१६ कराेड ऋणले राेकिएका धुर्मुसकाे बयान : जताततै उधाराे भयाे, काम अघि बढाउनै मुस्किल पर्‍याे

१६ कराेड ऋणले राेकिएका धुर्मुसकाे बयान : जताततै उधाराे भयाे, काम अघि बढाउनै मुस्किल पर्‍याे

तस्वीरः सीताराम कट्टेल (धुर्मुस)काे फेसबुक वालबाट ।

A+ A A-

हामीले १६ माघ २०७५ देखि चितवनमा गाैतम बुद्ध अन्तर्राष्ट्रिय क्रिकेट रंगाशाला बनाउन थाल्याैँ । जनताकाे ठूलाे साथ सहयाेग पायाैँ । हामी उत्साहित थियाैँ । काम थालियाे । निर्माण सुरु भएपछि पनि देश-विदेशमा रहेका नेपालीबाट हामीलाई साथ र हाैसला मिल्याे । तर, काम हुँदै जाँदा खर्च पनि बढ्दै गयाे । ३५ प्रतिशत काम सकिँदासम्म ५४ कराेड रुपैयाँ सकियाे । यसमा १६ कराेड त ऋण मात्रै पुग्यो ।

निर्माण सामग्रीहरू जुटाउन गाह्रो हुन थाल्याे । जहाँबाट सामान आउनुपर्ने हो, त्यहाँ उधाराे भएपछि सामान ल्याउन सकिएन । सरकारसँगै सम्पूर्ण खेलप्रेमीहरूकाे भरपूर सहयोग पाउने अपेक्षामा हामी रंगशाला निर्माणमा हाेमिएका थियाैँ । सहयाेग नभएकाे पनि हाेइन । कोभिडकालमा पनि काम गरियो । तर, काम सक्न अझै धेरै पैसा लाग्ने देखियाे ।

क्रिकेट रंगशाला बनाउने कामबाट धुर्मुस सुन्तली फाउण्डेसनले हात उठायो, धुर्मुस भन्छन्, '१६ करोड ऋण लाग्यो'

ढलानसम्म जान सक्ने अवस्था रहेन । सरकारले सहयोग गरेको खण्डमा एक वर्षभित्र काम सकिन्छ । हेर्दाहेर्दै बनिसकेको छ । हाम्रो चाहाना भनेको अब सरकारी सहयोग नै हो । हामीले क्वालिटीमा सम्झाैता गरेका छैनौँ । ५४ करोड लगानी गर्दा ३५ प्रतिशत काम सकियो भने पूर्ण तयार हुन त २ अर्ब ५० करोडमा नै हुन्छजस्तो देखियो । त्यसमा सरकारलाई १ अर्ब त बचत नै हुने भयो नि ।

हामी हाम्रो कामबाट सन्तुष्ट छौँ । आभावको बीचमा पनि यस्तो काम गर्न सकियो । महामारीको बेला पनि हामीले काम रोकेनौँ । राष्ट्र बन्नुपर्छ भनेर जस्तो उत्साह पाइयो, त्यो सन्तुष्टिको कुरा हाे । जग हाल्ने चरणमा छैन । फिट बनाउन नसकिएको हो । यत्रो दुःख गरेपछि आफैँ पूरा गरौँ भन्ने सपना छ । त्यो हुन्छजस्तै लाग्छ । सरकारले सहयोग गरेर पूरा होस् भन्ने कामना हाे । सरकारले सहयोग गरे एक वर्षमा नै काम पूरा हुन्छ र ऐतिहासिक सफलता हासिल गर्न सकिन्छ ।