नेपालमै गाडी उत्पादन गर्नुस्, सरकारले सहयोग गर्छ : अर्थमन्त्री

A+ A A-

अर्थमन्त्री जनार्दन शर्माले व्यवसायीहरूलाई नेपालमै सवारीसाधन उत्पादन गर्न आह्वान गरेका छन् । नाडा अटोमोबाइल्स एसोसिएसन नेपालको ४५औं साधारणसभालाई सम्बोधन गर्दै मन्त्री शर्माले नेपालमै सवारीसाधन उत्पादन गरे सरकारले हर सम्भव सहयोग गर्ने उनले बताए ।

‘प्राविधिक नेपालमै छन्, श्रमशक्ति नेपालमै छ, जमिन प्रशस्त छ, बजार उपलब्ध छ भने, तपाईंहरूले नेपालमै उत्पादन किन नगर्ने ? त्यसका लागि विद्युत्‌मा सहुलियत, जग्गा उपलब्ध गराउने कुरा, नीतिगत ग्यारेन्टीलगायत अन्य धेरै सहयोग गर्न सरकार प्रतिबद्ध छ,’ उनले भने ।

देश आत्मनिर्भर नभई जनताले सेवा सुविधा नपाउने भन्दै गर्न सक्ने उत्पादन नेपालमै गरेर विदेशी उत्पादनसँग प्रतिस्पर्धा गर्न सकिने उनले बताए ।

‘नेपालको हकमा तत्काल सबै कुरा उत्पादन गर्न त सकिँदैन तर खासखास कुरा छानेर उत्पादन गर्नुहोस् । त्यसमा सरकारले विभिन्न सहुलियत दिन्छ । त्यसपछि सजिलै विदेशी उत्पादनसँग प्रतिस्पर्धा गर्न सकिन्छ,’ उनले भने ।

उद्योगलाई उत्थान गर्न परम्परागत नीतिलाई परिवर्तन गर्न सकिने उनले स्पष्ट पारे । ‘तपाईंहरूलाई कहाँ समस्या छ । अउनुहोस् सल्लाह गरौँ । तपाईंहरूको सल्लाह सुझावमा छलफल गरेर नीतिमा बदलौँला,’ शर्माले भने ।

सरकारले कुनै पनि नीति बनाउँदा सरोकारवालासँग छलफल गरे देश, जनता र व्यवसायी सबैको भलो हुने नेपाल उद्योग वाणिज्य महासघंका वरिष्ठ उपाध्यक्ष चन्द्रप्रसाद ढकालले बताए ।

‘स्थिर नीति भयो भने व्यवसायीलाई काम गर्न सहज हुन्छ । देश विकास गर्न नीतिगत सुधार आवश्यक छ,’ उनले भने ।

अटोमोबाइल व्यवसायले राजस्वमा धेरै योगदान पुर्‍याएकाले यसलाई अझै बढाउन नीतिगत सुधार तथा सहयोग आवश्यक रहेको नाडा अटोमोबाइल्स एसोसिएसन नेपालका अध्यक्ष कृष्णप्रसाद दुलालले बताए ।

‘ व्यापारको क्षेत्रबाट यो वर्ष पनि सरकारलाई सर्वाधिक आयकर बुझाउने अटोमोबाइल क्षेत्र नै हो । भन्सार मूल्याङ्कन प्रक्रिया अझै भन्झटिलो छ, अटो शो गर्ने ठाउँ सानो छ, सडक राम्रो छैन । यी समस्याहरूको समाधान गरिनुपर्छ ,’ दुलालले भने ।

प्रकाशित मिति: बुधबार, मंसिर २२, २०७८ १८:१२