असार १५ देखि टुट्यो बाजुराको सडक सम्पर्क, सीडीओ भन्छन्- नाकाबन्दी जस्तै भयो

पहिरोका कारण अवरुद्ध भएको बाजुराको बूढीगंगा नगरपालिका–१ उम्कोटोको सडक । तस्वीर : निमेन्द्र शाही/शिलापत्र

A+ A A-

बाजुरालाई तराईका जिल्लासँग जोड्ने सडक अवरुद्ध भएको डेढ महिनाभन्दा बढी भइसकेको छ । सदरमुकाम जोड्ने मुख्य साँफे–मार्तडी सडक खण्ड तथा हुम्ला र मुगु जिल्ला जोड्ने मार्तडी-कोल्टी सडक खण्ड असार १५ देखि सञ्चालनमा आउन सकेको छैन ।

चारैतिरको सडक सम्पर्क टुटेपछि नाकाबन्दी जस्तै भएको बाजुराका प्रमुख जिल्ला अधिकारी गोपाल कुमार अधिकारीले बताए ।

साँफे मार्तडी सडको बल्देदेखि पानीनाउँलासम्मको सडक पहिरोका कारण अवरुद्ध भएको छ । सडक अवरुद्ध भएपछि दैनिक उपभोग्य वस्तु र अन्य सामग्रीहरू ढुवानी हुन सकेको छैन । जिल्लाभित्रका ग्रामीण सडकहरू पनि वर्षाले बिगारेपछि यातायात ठप्प छ ।

सडक खुलाउन गरिएका प्रयासहरू सफल भएका छैनन् । पहिरोले कतिपय ठाउँमा सडको रुपरेखा नै बाँकी राखेको छैन । वर्षा सुरु भएसँगै सबै स्थानीय तहबाट सदरमुकाम पुग्न हिँडेर जानुपर्ने बाध्यता छ । यही बाटो भएर हुम्ला र मुगु जाँने यात्रु पनि सास्ती व्यहोर्न बाध्य छन् । स्टक सामान सकिएको व्यापारीहरू बताउँछन् ।

सदरमुकाम मार्तडीमा ब्यापार गर्ने दिनेश बोहराले भने, 'हामीसँग स्टक भएको सामान सकियो नयाँ सामान ल्यायो भने महंगो हुँन्छ । ग्राहकहरूलाई कठिन हुने भएकोले ल्याउँन सकीएको छैन । पहिले आठ सय पर्ने सिमेन्टलाई अहिले १३ सय पर्न आउँछ । बीचमा मान्छेले बोकाउनु पर्ने बाध्यता छ ।’

अर्का व्यापारी दिलबहादुर थापा यसअघि १ हजारमा आइपुग्ने सामानको ढुवानी खर्च अहिले २५ सय लाग्ने बताउँछन् । ढुवानी महंगो हुँदा त्यसको मार ग्राहकमा पर्ने उनको भनाइ छ । व्यापार व्यवसाय मात्र होइन सडक अवरुद्ध भएकाले बिरामीहरू पनि मर्कामा परेका छन् ।

बाजुरास्थित नागरिक नागरिक समाजका संयोजक अग्निराज शाहीले लामो समयसम्म पनि सडक नबन्दा सास्ती व्यहोर्नुपरेको बताए । 'वर्षाका कारण बाटो बिग्रेको लामो समय भइसक्यो । उपभोक्ताहरू समस्यामा परेका छन्,' उनी भन्छन्, 'सदरमुकामसम्मको बाटो खुले पनि बिरामीहरूलाई सजिलो हुन्थ्यो ।’

प्रजिअ अधिकारीले केही दिनदेखि पानी नपरेको र अरु केही दिन पानी नपरे बाटो खुलाइने बताए । ‘सदरमुकामदेखि साँफेसम्म सडक विभागले बनाउँनुपर्ने हो भने मार्तडी–कोल्टी र हुम्ला जोड्ने सडक पूर्वाधार विकास कार्यालयको जिम्मा रहेकोले उहाँहरूले खोल्नुपर्ने जिम्मा छ,' प्रजिअ अधिकारीले भने, 'केही दिन पानी परेको छैन अरु एक दुई दिन परेन भने बाटो खोल्नका लगि अनुरोध गरेका छौँ ।’

पाँच वर्षयता बाजुराको सदरमुका जोड्ने सडक बर्खामा नियमित रूपमा सञ्चालन हुन सकेको छैन । बर्खामा सडक अवरुद्ध भएसँगै वैकल्पिक उपाएको बारेमा छलफल हुने अनि हिउँदमा काम नहुने गरेकाले बाजुरावासीले बर्सेनि सास्ती व्यहोर्नु परेको छ ।