१४ वर्षमाथिका सबै नागरिकलाई खोपको व्यवस्था गर्न सरकारसँग माग

A+ A A-

चिकित्सकहरूले १४ वर्षभन्दा माथिका सबै नागरिकलाई तत्काल कोरोनाविरुद्ध खोपको व्यवस्था गर्न सरकारसँग माग गरेका छन् ।

नागरिक समाजका अगुवा एवं वरिष्ठ चिकित्सक डा. सुन्दरमणि दीक्षित, डा. वासुदेव पाण्डे, डा. सागर भण्डारीले कोरोना महामारीले भयावह अवस्था निम्त्याउन सक्ने खतरा रहेकोले तत्काल सबै नागरिकलाई कोरोनाविरुद्धको खोपको व्यवस्था गर्न सरकारको ध्यानाकर्षण गराएका हुन् । मंगलबार काठमाडौंमा आयोजित कार्यक्रममा वरिष्ठ चिकित्सक दीक्षितले १४ वर्षमाथिको उमेरका सबै नागरिकलाई कोरोनाविरुद्धको आवश्यक खोपको व्यवस्था तत्काल गर्न आग्रह गरे ।

'१४ वर्षमाथिका सबै नागरिकलाई सरकारले तत्काल कोरोनाविरुद्धको खोपको व्यवस्था गर्नुपर्छ । कोरोनाको तेस्रो लहर नेपालमा आउने सम्भावना बढेर गएकोले त्यस्तो भयावह अवस्था आउन नदिन स्वास्थ्य सुरक्षाका मापदण्ड नागरिकले पालना गरे/नगरेको विषयमा कडा अनुगमन गर्न सरकारले गृह मन्त्रालय र स्थानीय तहको सरकारलाई जिम्मेवार बनाउनु पर्दछ । निषेधाज्ञालाई खुकुलो बनाउने काम गर्नुहुन्न' उनले भने ।

त्यसैगरी डा. भण्डारीले नेपालमा एक महिनाभित्रै कोरोनाको तेस्रो लहर आउन सक्नेतर्फ सचेत गराए । उनले तेस्रो लहरबाट जनतालाई बचाउन तीनै तहको सरकारले गम्भीर भएर स्वास्थ्य सुरक्षाका मापदण्डसँगै खोपलाई सर्वसुलभ बनाउनु पर्नेमा जोड दिए ।

'जुन रूपमा कोरोना संक्रमण हुन नदिन तीनवटै तहको सरकारले समन्वयका साथ काम गर्नुपर्ने हो, त्यो भएको देखिएन । यसले नेपालमा एक महिनाभित्रै कोरोनाको तेस्रो लहर आउन सक्ने खतरा देखिन्छ । सरकारले स्वास्थ्य सुरक्षा मापदण्डको पूर्ण पालना गराउँदै आवश्यक खोपको व्यवस्था गरेर कोरोनाको तेस्रो लहर आउन नदिन विशेष निगरानी राख्नुपर्ने हुन्छ' उनले भने ।

त्यस्तै, डा. पाण्डेले कोरोनाविरुद्धको खोप नेपालमै उत्पादन गर्न आवश्यक व्यवस्था मिलाउन सरकारसँग आग्रह गरे । खोपको उत्पादन देशभित्रै हुन नसके यसले भयावह रूप लिने उनको तर्क थियो । 'कोरोना खोप स्वदेशमा उत्पादन गर्ने व्यवस्था तत्काल गरौँ, नभए कोरोना महामारीको संक्रमण नेपालमा झनै बढेर जानसक्छ । सरकारले कोरोना महामारी नियन्त्रणका लागि स्वास्थ्य सुरक्षा मापदण्डको पालना गराउने, बढी प्रभावित क्षेत्रहरुमा नियन्त्रणका लागि विशेष निगरानी राख्ने काममा विशेष ध्यान दिनुपर्दछ' उनले भने ।

चिकित्सकहरूले सरकारले निषेधाज्ञालाई खुकुलो बनाएर कोरोना संक्रमणको दर बढ्न थालेको भन्दै चिन्ता व्यक्त गरेका छन् । उनीहरूले सार्वजनिक यातायातको साधनमा भीड हुन थालेको उल्लेख गर्दै त्यसो हुन नदिन सरकारको ध्यानार्षणसमेत गराएका छन् ।

प्रकाशित मिति: मंगलबार, साउन १२, २०७८ २०:०२