कृष्णचन्द्रको प्रशंसा गर्दै पृथ्वीसुब्बाले भने- विश्वासको मत दिन्‍नँ भन्‍न गाह्रो भयो, तर...

कृष्णचन्द्रको प्रशंसा गर्दै पृथ्वीसुब्बाले भने- विश्वासको मत दिन्‍नँ भन्‍न गाह्रो भयो, तर...

A+ A A-

गण्डकी प्रदेशका मुख्यमन्त्री कृष्णचन्द्र नेपाली पोखरेलले संसदबाट आज विश्वासको मत लिँदै छन् ।

उनले संसदमा विश्वासको मत मागेसँगै सत्ता र प्रतिपक्षी दलका सांसदले आ-आफ्नो धारणा राखे । बोल्नेको सूचीको अन्तिममा रहेका गण्डकी प्रदेशका निर्वतमान मुख्यमन्त्री एवं एमाले संसदीय दलका नेता पृथ्वीसुब्बा गुरुङले मुख्यमन्त्री बनेका कांग्रेस संसदीय दलका नेता कृष्णचन्द्रको प्रशंसा गरे ।

कृष्णचन्द्रलाई परिपक्व र शालीन नेता भन्दै उनले लोकतान्त्रिक आन्दोलनमा होमिएको परिवारबाट आएका नेतालाई परिस्थितिले गर्दा विश्वासको मत दिन नसक्ने बताए ।

‘त्यस्तो परिवारबाट आउनुभएका व्यक्तिलाई विश्वासको मत दिन्‍नँ भन्‍न गाह्रो भयो । तर, उहाँले विश्वासको मत कृष्णचन्द्रलाई दिनुस् भन्नुभएको होइन । मेरो नेतृत्वमा बनेको गण्डकी प्रदेश सरकारलाई दिनुस् भन्नुभएकाले म उहाँको कार्यकालको सफलताको शुभकामना दिन चाहन्छु,’ पृथ्वीसुब्बाले भने, ‘जुन सैद्धान्तिक धरातलमा, जुन परिस्थितिमा अवसरवादीको गठबन्धनको रूपमा यो सरकार गठन भएको छ, यो सरकारलाई विश्वासको मत दिन नसक्ने जानकारी गराउँछु ।’

अहिले नै विश्वासको मत दिने समय नआएको र पछि काम हेरेर समर्थन गर्ने/नगर्नेबारे सोच्ने पृथ्वीसुब्बाको भनाइ थियो । उनले प्रदेश सरकारका नियुक्तिमा पार्टी हेरेर नभई प्रतिस्पर्धाका आधारमा ल्याउन आग्रह गरे ।

नेताहरूको इगोका कारण संघीयता कमजोर बन्ने अवस्था आएकाले सतर्क भएर अगाडि बढ्नुपर्ने बताए । आफूले सर्वदलीय सरकार बनाउन प्रस्ताव गरे पनि केन्द्रको निर्णय हाबी भएको दुखेसो पोखे ।

अहिलेका प्रदेश सरकार पहिलाको अञ्चलजस्तै भएको तर्क गरे । ‘नाम मात्रै प्रदेश, अञ्चलजस्तै भएका छौँ व्यवहारमा । अञ्चल कमिटीजस्तै भएका छौँ प्रदेश कमिटीहरू । पहिला अञ्चलमा सरकार थिएन । अहिले प्रदेशमा त्यस्तै भएको छ,’ उनले भने ।

संघीयतालाई व्यावहारिक रूपमा कार्यान्वयन गर्न आफूले प्रदेशमा ११ वटा मन्त्रालय बनाएको गुरुङले दाबी गरे । ‘४० महिना काम गर्दा, वार्षिक समीक्षा गर्दा मन्त्रालय जुन संरचना पठाइयो यो असाध्यै भद्रगोल, गुलियो र अमिलो एकै ठाउँमा राखेजस्तो,’ उनले भने, ‘त्यसमा जुन मन्त्रालय हो त्यसमा मात्रै ध्यान जाने । मन्त्रालयमा साह्रै चाप पर्‍यो ।’

संविधानतः प्रदेशसभा सदस्यको कुल संख्याको २० प्रतिशत हुने गरी मन्त्रालय बनाउन पाइन्छ । प्रदेशमा सातवटा मन्त्रालय रहेकोमा दोस्रोपटक मुख्यमन्त्री बनेका पृथ्वीसुब्बाले २९ वैशाखमा ११ वटा मन्त्रालय बनाएका थिए ।

प्रकाशित मिति: शुक्रबार, असार ४, २०७८ १५:१९