गण्डकीमा सरकार बनाउन जुटेकाहरू (तस्वीरमा हेर्नुहोस्)

A+ A A-

संसद बैठक साढे ११ बजे नै सकिएको थियो । तर, शुक्रबार दिउँसोभर गण्डकी प्रदेश सभाका विपक्षी दलका सांसद प्रदेश सभामै बसे ।

उनीहरू प्रदेश प्रमुखले सरकार गठनका लागि आह्वान गरेलगत्तै जाने तयारीमा थिए । दिउँसो तीन बजे प्रदेश प्रमुखले २४ घन्टा समय दिएर सरकार गठनका लागि आह्वान गरिन् ।

आह्वान अनुसार गण्डकी प्रदेशको मुख्यमन्त्रीमा काँग्रेस संसदीय दलका नेता कृष्णचन्द्र नेपाली पोखरेलले दाबी पेस गरेका छन् । ३१ सांसदको समर्थन पाएका उनले संविधानको धारा १६८ (५) अनुसार मुख्यमन्त्री बनाउन प्रदेश प्रमुख सीताकुमारी पौडेलसमक्ष शुक्रबार दाबी पेस गरेका हुन् ।

२४ घन्टाको समय भए पनि विपक्षी गठबन्धनका ३१ सांसद लाइन लगाएर प्रदेश प्रमुखको निवासमा पुगे । दुई दिन पहिल्यै विपक्षी गठबन्धनसँग ३१ सांसदको हस्ताक्षर तयार थियो ।

प्रदेश प्रमुखले आह्वान गरेलगत्तै भेला भए र साँझ पौने पाँच बजे प्रदेश प्रमुखकहाँ पुगे । प्रदेश सभामा कायम ५९ सदस्यमध्ये कांग्रेसका १५, माओवादीका ११, राष्ट्रिय जनमोर्चा र जसपाका दुई÷दुई र एक स्वतन्त्र सांसद गरेर ३१ सांसदले पोखरेललाई मुख्यमन्त्रीमा प्रस्ताव गरेका हुन् ।

प्रदेश प्रमुखले शनिबार दिउँसो तीन बजेपछि मुख्यमन्त्रीमा कृष्णचन्द्रलाई शपथ गराउने छिन् । प्रदेश प्रमुख एमाले निकट भएकाले केही गडबड नहोला भन्न सक्ने अवस्था छैन ।

संवैधानिक हिसाबले कृष्णचन्द्रसँग बहुमत रहेकाले प्रदेश प्रमुखले उनैलाई मुख्यमन्त्री नियुक्त गर्नुको विकल्प छैन । ३१ सांसद आफैँ प्रदेश प्रमुखकहाँ पुगेका छन्, सबैको हस्ताक्षर पनि सनाखत भएकाले मुख्यमन्त्रीमा कृष्णचन्द्रले शपथ लिने लगभग पक्का छ ।

तस्वीरमा हेरौँ दाबी पेस गर्न जाँदा जे देखियो