खोप लगाउन सांसदका परिवार प्रदेशसभामा, सांसदले थर्काए संसद् सचिव

A+ A A-

गण्डकी प्रदेशका एक एमाले सांसदले प्रदेशसभा सचिवलाई थर्काएका छन् । संसदसँग सम्बन्धित नै नरहेका व्यक्ति कोरोनाविरुद्धको खोप लगाउन संसद् भवन पुगेपछि एमाले सांसद कृष्ण थापाले प्रदेशसभा सचिव हरिराज पोखरेललाई थर्काएका हुन् ।

बुधबार दिउँसो तीन बजेपछि प्रदेशसभा परिसरमा सांसद, सांसदका स्वकीय सचिवलाई र संसद्का सवारी चालकलगायतलाई खोप लगाउने कार्यक्रम थियो । त्यहाँ कोही सांसद परिवारका सदस्य नै लिएर पुगे ।

प्रदेशसभामा ८७ जनाले बुधबार खोप लगाए । प्रदेशसभा सचिवालयबाट स्वास्थ्य कार्यालय कास्कीमा ६७ जनाको खोप लगाउने भनेर सूची थियो । सूचीमै नभएकालाई ल्याएर सांसदले खोप लगाएका हुन् । कोही पहिलो डोज लगाउन पुगेका थिए, कोही दोस्रो ।

एक प्रत्यक्षदर्शीका अनुसार सांसदले आफ्ना परिवारका सदस्यलाई पनि खोप लगाउन ल्याएको थाहा पाएपछि खोप लगाइदिन पुगेकी स्वास्थ्यकर्मी आक्रोशमा आएकी थिइन् । उनले भनिन्, ‘बाहिर पाउनुपर्नेले पाएको छैन, तपाईंहरू मान्छे लिएर आउनुहुन्छ ।’

त्यस्तो देखेपछि एमाले सांसद कृष्ण थापा प्रदेशसभा सचिवलाई खोज्दै गए । सचिव पोखरेल सभामुख नेत्रनाथ अधिकारीको कार्यकक्षमा थिए ।

शिलापत्रलाई प्राप्त अडिओमा सांसद थापाले बाहिरी मान्छेलाई खोप किन लगाएको भन्दै प्रश्न गरेको सुनिन्छ । सचिव पोखरेलले जवाफ दिए, ‘आ–आफ्नो तरिकाले कसरी आएछन् !’ कांग्रेस सांसद लाइन मिलाउन खटिएको भन्दै चौकीदार हो भन्दै सांसद थापाले सचिव पोखरेललाई प्रश्न पनि गरेका छन् ।

यस्तो छ सांसद थापा र सचिव पोखरेल बीचको सवालजवाफ

सांसद थापाः हाम्रो यहाँ कर्मचारीहरू, ड्राइभरहरू लगाउने भनेको । यहाँ त गाइजात्रा देखेँ मैले त । कसले लिएर आएको ?

सचिव पोखरेलः आ–आफ्नो तरिकाले कसरी आएछन् !

सांसद थापाः सभासदका छोराछोरीले खोप लगाउने हो यहाँ आएर ? भोलि के भन्लान् मान्छेले ? हाम्रा पनि छोराछोरी छन् ।

सचिव पोखरेलः अस्ति मित्रकुमारी दिदी (एमालेको समानुपातिक सांसद)ले झगडा गर्नुभयो मेरो मान्छेले खोप लगाउन नपाउने भनेर । डाक्टरलाई भन्नुस् भनेँ ।

सांसद थापाः यस्तो बेइज्जत गर्नु हुँदैन प्रदेशसभाको । बाहिर के गर्ने हो गर्नोस् ।

सचिव पोखरेल: मैले नियमअनुसार गरेको हो । अब यहाँ मान्छे लाइनमा त्यत्तिकै बसेका छन् ।

सांसद थापाः ए बाबा ! लाइनमा मान्छे त्यत्तिकै बसेको छैन के । त्यो त बोलाएर, आएर यहाँ नाम देखाएर मात्रै मान्छे आएको छ । त्यसै कोही लाइनमा बसेको छ ? यो त ठूलो बेइज्जत हुन्छ सभामुखज्यू ।

सभामुख अधिकारी : खोई कसले ल्याएको हो अब ?

सांसद थापाः मेखलाल (कांग्रेस सांसद) चौकीदार हो यहाँको ? सभासद चौकीदार त होइन होला ? बेइज्जत के, यस्तो बेइज्जत पनि गर्न हुन्छ ? यो गाइजात्रा ।

प्रकाशित मिति: बुधबार, जेठ २६, २०७८ २२:२७