मुख्यमन्त्री गुरूङको विपक्षमा मत हाल्न विपक्षी दलको ह्वीप

A+ A A-

गण्डकी प्रदेशका चारवटै विपक्षी दलले सांसदलाई मुख्यमन्त्रीको विपक्षमा मत हाल्न ह्वीप जारी गरेका छन् ।

बुधबार कांग्रेस, माओवादी, राष्ट्रिय जनमोर्चा र जनता समाजवादी पार्टीले मुख्यमन्त्री पृथ्वीसुब्बा गुरूङको विपक्षमा मत हाल्न ह्वीप जारी गरेका हुन् ।

सबै दलको आ–आफ्नै संसदीय दलमार्फत ह्वीप जारी भएको माओवादी सांसद दीपक कोइरालाले जानकारी दिए ।
संविधानको धारा १६८ (३) अनुसार मुख्यमन्त्री बनेका गुरूङले उपधारा ४ अनुसार बिहीबार १२ बजेपछि संसदमा विश्वासको मत लिँदै छन् ।

एमालेले भने पक्षमा मत हाल्न ह्वीप लगाइसकेको छैन । गण्डकीमा सत्ता र प्रतिपक्ष दुवैसँग स्पष्ट बहुमत छैन । सांसद कोइराला प्रदेश विपक्षीको सरकार नभए मध्यावधि निर्वाचन हुने दाबी गर्छन् । ‘मुख्यमन्त्रीले विश्वासको मत पाउने कुनै आधार छैन । त्यसैले प्रदेशमा कि विपक्षीको सरकार बन्छ, नभए मध्यावधितिर जान्छ,’ उनले भने ।

पृथ्वीसुब्बाले विश्वासको मत नपाउने र विपक्षीले सरकार बनाउन नसके प्रदेशसभा विघटन हुनेछ । प्रदेशसभामा एमालेको पक्षमा एक स्वतन्त्रसहित २८, कांग्रेससँग १५, माओवादीसँग १२ (सभामुखसहित), राष्ट्रिय जनमोर्चासँग तीन र जनता समाजवादी पार्टीसँग दुई सांसद छन् । उनले विश्वासको मत लिँदा सभामुखबाहेक ५९ जनाले सरकारबारे पक्ष–विपक्षमा मत हाल्ने छन् ।

पृथ्वीसुब्बाको पक्षमा २८ मत भएकाले विश्वासको मत पाउन उनले तीन सांसद आफ्नो पक्षमा पार्नुपर्छ । अंकगणित हेर्दा उनले विश्वासको मत पाउने देखिँदैन । विपक्षीले सरकार बनाउन दुई पटक प्रयास गरे पनि जनमोर्चाका सांसद विभाजित हुँदा पृथ्वीसुब्बाको सरकार जोगिएको छ ।

जनमोर्चाका तीन सांसदमध्ये कृष्ण थापा हालकै सरकार जोगाउनुपर्ने पक्षमा खुलेरै लागेका छन् । सरकार पक्षसँग उनीसहित २९ सांसद छन् । कांग्रेसका १५, माओवादीका ११, जनमोर्चा र जसपाका दुई–दुई गरेर ३० सांसद नयाँ सरकार बनाउनुपर्ने पक्षमा छन् ।

यसरी प्रतिपक्षसँग ३० र सत्तापक्षसँग सांसद संख्या २९ छ । सत्ता र प्रतिपक्षले सरकार बनाउन नसके संविधानको धारा १६८ (७) अनुसार चुनाव घोषणा हुनेछ ।

प्रकाशित मिति: बुधबार, जेठ २६, २०७८ १९:१३