सरकारले एक जना कोरोना संक्रमितको उपचारका लागि जानकी मेडिकललाई १५ हजारसम्म दिने

सरकारले एक जना कोरोना संक्रमितको उपचारका लागि जानकी मेडिकललाई १५ हजारसम्म दिने

A+ A A-

धनुषाको रमदैयास्थित जानकी मेडिकल शिक्षण अस्पतालमा ५० बेडको जेनलर कोभिड वार्ड सुरु सञ्चालनमा आएको छ ।

कोरोना संक्रमितलाई नि:शुल्क उपचारका लागि स्वास्थ्य तथा जनसंख्या मन्त्रालय र जानकी मेडिकलबीच केयर युनिट सञ्चालनसम्बन्धी भएको सम्झौता अनुसार कोभिड अस्पताल सञ्चालन आएको हो ।

१० बेडको आईसीयू, चार बेडको भेन्टिलेटर र अन्य पाइपलाइनबाट अक्सिजनसहितको ५० बेडको जेनरल कोभिड वार्ड व्यवस्थापन गरी उपचार सेवा सुरु गरिएको मेडिकलका निर्देशक श्रीपट पाण्डेले जानकारी दिए । उनका अनुसार अस्पतालले संक्रमितलाई बेड, अक्सिजन, आईसीयू, भेन्टिलेटर, चिकित्सक तथा स्वास्थ्यकर्मी निःशुल्क उपलब्ध गराउने र उपचारका क्रममा लाग्ने औषधि बिरामी आफैँले किन्नु पर्ने गरी मेडिकल र सरकारबीच सम्झौता भएको छ ।

सम्झौता अनुसार मेडिकलको कोभिड अस्पतालमा एक जना संक्रमितको उपचारबापत दैनिक १५ हजार रुपैयाँ सरकारले व्यहोर्ने छ । सामान्य स्वास्थ्य अवस्थाका संक्रमितलाई दैनिक ३५ सय, मध्यमलाई दैनिक ७ हजार र गम्भीर स्वास्थ्य अवस्थाका संक्रमितलाई दैनिक १५ हजार रुपैयाँ शुल्क मन्त्रालयले व्यहोर्ने सम्झौता पत्रमा उल्लेख छ । उपचार खर्च प्रत्येक महिना मन्त्रालयले अस्पताललाई भुक्तानी गर्ने बताइएको छ ।

सम्झौता अनुसार क्याबिन अनुसार सेवा लिन चाहने बिरामीलाई थप ५० प्रतिशत शुल्क बढी अस्पतालले लिन पाउनेछ । त्यसैगरी कुनै समस्या उत्पन्न भएको खण्डमा मन्त्रालय र अस्पतालले आपसी छलफल गरी समाधान गर्ने, उपचारमा संलग्न चिकित्सक, कर्मचारीको जोखिम भत्ता प्राथमिकतामा राख्ने, बिरामीको उपचार प्रतिवेदन दैनिक अनलाइनबाट मन्त्रालयलाई उपलब्ध गराउने लगायतको सात बुँदे सहमति भएको छ ।

सम्झौता अनुसार जानकी मेडिकलमा रहेको २ सय बेडको अस्पतालमा सबै बेड कोरोना संक्रमितको उपचारमा प्रयोग गर्ने लक्ष्य लिएको मेडिकलका निर्देशक पाण्डेको भनाइ छ । कोरोना संक्रमितबाहेकका बिरामीको भने जनकपुरस्थित ब्रह्मपुरीमा रहेको जानकी मेडिकल शिक्षण अस्पतालकै सिटी हस्पिटलमा हुने उनले बताए ।

प्रकाशित मिति: आइतबार, वैशाख २६, २०७८ २०:५२