हाेली वाइनले बदनाम पिस फेडेरेसन एकाएक सक्रिय, मन्त्रीसहित १४ जनालाई सम्मान

हाेली वाइनले बदनाम पिस फेडेरेसन एकाएक सक्रिय, मन्त्रीसहित १४ जनालाई सम्मान

तस्वीर स्राेतः एकनाथ ढकालकाे फेसबुक

A+ A A-

धर्म प्रचारक विवादास्पद आईएनजीओ युनिभर्सल पिस फेडेरेसन (यूपीएफ) नेपालमा फेरि सक्रिय बनेको छ । साेल्टी हाेटलमा प्रधानमन्त्री, पूर्वप्रधानमन्त्रीलगायतलाई ‘होली वाइन’ पिलाएर बदनाम यो संस्थाले भर्खरै एक मन्त्रीसहित १४ जनालाई शान्तिदूतका रूपमा सम्मान गरेको हाे ।

सम्मान कार्यक्रममा राष्ट्रियसभाका अध्यक्ष गणेश तिमल्सिना, प्रतिनिधिसभाका सदस्यहरू, पूर्वउपप्रधानमन्त्री, कूटनीतिज्ञलगायत उपस्थित थिए ।

तस्वीर स्राेतः एकनाथ ढकालकाे फेसबुक

कोभिड– १९ महामारी रोकथाम तथा नियन्त्रणमा महत्त्वपूर्ण भूमिका खेलेको भन्दै उक्त संस्थाले २२ फागुनमा सहरी विकास राज्यमन्त्री रामवीर मानन्धरसहित दुई पत्रकार र ११ चिकित्सकसमेतलाई सम्मान गरेको हो । राज्यमन्त्री मानन्धरले आफूलाई कोभिड महामारीमा राम्रो काम गरेको र विश्व रेकर्ड राखेको सन्दर्भमा संस्थाले सम्मान गरेको दाबी गरे । तर, उनकाे विश्व रेकर्डकाे पृष्ठभूमि भने सम्मानसँग कुनै सराेकार छैन । मानन्धरले लगातार चार घन्टा पाँच मिनेट २० सेकेन्ड समय गीत गाएर विश्वरेकर्ड कायम गरेका थिए ।

होटल याक एण्ड यतीमा भएको उक्त कार्यक्रममा राष्ट्रियसभाका अध्यक्ष गणेश तिमल्सिना, कांग्रेसनेता एवं पूर्वउपप्रधानमन्त्री सुजाता कोइरालासहित दुई पूर्वमन्त्री, १३ सांसद, चार कूटनीतिज्ञलगायत सहभागी रहेको यूपीएफले आफ्नो बेवसाइटमा उल्लेख गरेको छ । सम्मानित भएका अरूकाे नाम भने वेबसाइटमा राखिएकाे छैन ।

तर, यूपीएफ नेपालका प्रमुख एकनाथ ढकालले आफ्नो फेसबुक वालमा राखेकाे जानकारीअनुसार शान्तिदूतका रूपमा सम्मानित हुनेमा टेकु अस्पतालका डा. सागरराज भण्डारीसहित प्रा. डा. सुभाष आचार्य, डा. सन्तकुमार दास, डीएसपी डा. रोशनकुमार झा छन् । यसैगरी डा. अनुप बाँस्ताेला, डीएसपी डा. सौरभ श्रेष्ठ, डा. रुना झा, डा. शेरबहादुर पुन, डा. विपिन नेपाल, डा. रक्षा पाण्डे, डा. समीरकुमार अधिकारी र कान्तिपुरका पत्रकार अतुल मिश्र र नागरिक दैनिकका पत्रकार राम सुवेदी सम्मानित भएकाे भन्दै ढकालले तस्वीरसहितकाे पाेस्ट सेयर गरेका छन् ।

यो संस्था चर्चनिर्देशित गतिविधिमा सक्रिय मानिन्छ । कतिपय देशमा यस संस्थाका गतिविधिमा रोकसमेत लगाइएको छ । खासगरी उच्चपदस्थहरूसहितलाई शान्तिदूतको प्रमाणपत्र बाँडेर धर्म प्रचारमा सहयोग लिने गरेको आरोप यो संस्थालाई लाग्ने गरेको छ ।

युनिफिकेसन चर्चका संस्थापक सन म्युङ मुनले २२ नोभेम्बर २००५ मा यूपीएफको स्थापना गरेका थिए । उनी कम्युनिस्टका कट्टर आलोचक मानिन्थे । सन् २०१२ मा उनको मृत्यु भएपछि पत्नी हक जा ‘म्याडम डाक्टर मुन’ले युनिफिकेसन चर्च र यूपीएफको नेतृत्व गर्दै आएकी छन् ।

क्रिश्चियन धर्मका प्रवर्तक जिसस क्राइस्टका अधुरा काम पूरा गर्न आएको र जिससले समेत गर्न नसकेको ‘पवित्र बिहे’ गरेर नयाँ युग सुरु गरेको दाबीसहित मुनले संस्था सुरु गरेका थिए ।

यही चर्चसँग आवद्ध विवादास्पद एनजीओले मंसिर २०७५ मा गरेको एसिया प्यासिफिक समिटमा प्रधानमन्त्री केपी ओलीलाई मुनपत्नी तथा हाल त्यसको ‘दैवी नेता’ मानिने हक जाले आशिर्वादका साथ १ लाख डलर राशिको ‘लिडरसिप एण्ड गुड गभर्नेन्स’ अवार्ड प्रदान गरेकी थिइन् ।

धर्मनिरपेक्ष मुलुकका प्रधानमन्त्री भएर क्रिश्चियन धर्म प्रचारमा सघाउ पुर्‍याएको भन्दै प्रधानमन्त्री ओलीले चर्को आलोचना खेप्नुपरेको थियो । सरकारकै सहआयोजनामा भएको उक्त कार्यक्रममा होली वाइनको प्रयोग र धर्मान्तरको विषयलाई लिएर दुवै पक्ष आलोचित बनेका थिए । यस कार्यक्रमका लागि सहयाेगी भूमिका खेलेकाे भन्दै एमाले नेता माधव नेपालकाे समेत आलाेचना भएकाे थियाे ।

तर, वैशाख २०७६ मा तिनै प्रधानमन्त्री ओली ‘युनिफिकेसन चर्च’ का केही कार्यक्रमलगायतमा सहभागी हुन कम्बोडिया गएका थिए । संस्थाबारे नकारात्मक टिप्पणी बढी हुन थालेपछि नेपालमा केही महिना सक्रियता घटाएको यूपीएफले फेरि विभिन्न गतिविधि सञ्चालन गर्न थालेको हो ।

तस्वीर स्राेतः अनुप बाँस्ताेलाकाे फेसबुक

नेपालमा यो संस्थाको गतिविधि परिवार दलका अध्यक्ष एवं पूर्वसांसद एकनाथ ढकालले चलाउँछन् । उनी यूपीएफ नेपालका प्रमुख हुन् ।

नेपालकाे संविधानले व्यक्तिलाई आफूले चाहेकाे धर्म वरण गर्ने हक प्रदान गरेकाे छ । तर लाेभ, करकाप वा कुनै पनि किसिमबाट धर्म परिवर्तन गर्नेगराउने कामलाई मान्यता दिएकाे छैन । यति हुँदाहुँदै पनि यूपीएफले नेता र उपल्लाे तहका व्यक्तिविशेषलाई प्रभावमा पारेर थुप्रै गतिविधि हुँदा पनि आमसराेकारकाे विषय बनिसकेकाे छैन । यसबारे एकनाथ ढकालसँग बुझ्दा उनले कुनै प्रतिक्रिया दिएनन् ।

प्रकाशित मिति: मंगलबार, चैत ३, २०७७ १७:१५