कारोबारको पहिलो दिन किन बन्यो शेयरबजार राताम्मे ? यस्तो छ कारण

A+ A A-

पछिल्लो समय हरियाली बन्दै आएको शेयरबजार परिसूचक नेप्से एकाएक राताम्मे बन्न थालेको छ । साताको पहिलो दिन आइतबार नै शेयरबजार परिसूचक नेप्से ३३ दशमलव ३३ अंकले घटेर २४९३ दशमलव ५९ अंकमा पुगेर रोकिएको छ ।

नेप्से हौसिरहेको समयमा एकाएक राताम्मे बन्दा सशंकित बनेका लगानीकर्ता कारोबार गर्न पनि केही हच्किएका छन् ।

आइतबार कारोबारमा आएका २ सय २ कम्पनीको १ करोड ४८ लाख ५१ हजार ५ सय ९२ कित्ता शेयर ६ अर्ब ९२ करोड ७६ लाख ६८ हजार ९ सय ३१ रुपैयाँमा शेयर किनबेच भएको छ । यसअघि दैनिक १० अर्ब रुपैयाँको कारोबार हुँदै आएको थियो ।

बजारमा बुल बलियो हुँदा पनि करेक्सनको नाममा कहिलेकाहीँ बजार राताम्मे बनेर नेप्से घट्ने शेयरबजार विश्लेषक विष्णु बस्याल बताउँछन् । उनले बजार सन्तुलित रहनका लागि पनि समयसमयमा बुलिस् ट्रेण्डमा ब्रेक लाग्नुपर्ने बताए । ‘बजार घटबढ त शेयरबजारको विशेषता नै हो नि, यो घटाइ बजारमा सन्तुलन बनाइराख्नका लागि हो । त्यसैले दोहोरो अंकले घटे पनि आत्तिनुपर्ने अवस्था छैन,’ विश्लेषक बस्यालले भने ।

नेप्से इन्डेक्ससँगै सेन्सेटिभ इन्डेक्स पनि ९ दशमलव ३१ अंकले घटेर ४ सय ५४ दशमलव १२ अंकमा रोकिँदा ठूलासाना सबै कम्पनीको शेयरमूल्य घटेको छ । यस्तै कारोबारमा आएका म्युचुअल फण्डबाहेकका सबै समूहका परिसूचक घटेर राताम्मे बनेका छन् ।

घटेको बजारमा १३८ कम्पनी राताम्मे बन्दा २६ कम्पनी भने हरियाली बनेका छन् । हरियाली बनेर शेयरमूल्य बढाउन पहिलो कारोबार गरेको निफ्रा नै सफल बनेको छ । निफ्राले पहिलो कारोबारमा नै ३४ रुपैयाँले शेयरमूल्य बढाउँदै सकारात्मक सर्किट लगाउन सफल बनेको हो । निफ्रासँगै बाँकी २५ कम्पनीले पनि आज शेयरमूल्य बढाएका छन् ।

त्यसो त बैंकिङ, जलविद्युत् तथा अन्य समूहको परिसूचकमा भारी मात्राले गिरावट आउँदा आज अधिकांश त्यही समूहबाट शेयरमूल्य घट्ने कम्पनीहरू धेरै छन् । जसमा सपाेर्ट माइक्रोफाइनान्सको ९ दशमलव २७ प्रतिशत अर्थात् १ सय ९६ रुपैयाँले शेयरमूल्य घटेको छ । योसँगै स्वाभिमान लघुवित्त वित्तीय संस्थाको ९ दशमलव १३ प्रतिशत अर्थात् २ सय १३ रुपैयाँ, माउन्टेन हाइड्रो नेपालको ६ दशमलव ९७ प्रतिशत अर्थात् १७ रुपैयाँ सूर्योदय लघुवित्तको ६ दशमलव ०८ अर्थात् १२८ रुपैयाँले शेयरमूल्य घटेको छ । योसँगै कुल १ सय ३८ कम्पनीको शेयरमूल्य घटेको हो ।

आजको कारोबारमा ५२ करोड ३३ लाख ६७ हजार ४ सय २४ रुपैयाँको कारोबार गर्दै नेको इन्स्योरेन्स सर्वाधिक कारोबार गर्नेक सूचीको अग्रपंक्तिमा छ ।

प्रकाशित मिति: आइतबार, फागुन २, २०७७ १५:५९