पुँजीबजार सुधारका लागि लगानीकर्ताको १८बुँदे माग, पूरा नभए अनशन बस्ने चेतावनी

पुँजीबजार सुधारका लागि लगानीकर्ताको १८बुँदे माग, पूरा नभए अनशन बस्ने चेतावनी

A+ A A-

पुँजीबजार सुधारका लागि धितोपत्र बोर्डले सम्झौताअनुरूप काम नगरेको भन्दै पुँजीबजार सुधार अभियानता अनशनमा बस्ने भएका छन् । अर्थमन्त्रालयले गठन गरको मुद्रा र पुँजीबजार अध्ययन समितिले दिएको ५८बुँदे निर्देशनको कार्यान्वयमा धितोपत्र बोर्डले चासो नदेखाएको भन्दै अभियानता आन्दोलनमा उत्रिने भएका हुन् ।

२०७५ सालमा अर्थमन्त्रालयको रोबहरमा डेपुटी गर्भनर शिवराज श्रेष्ठको संयोजकत्वमा पुँजीबजार सुधार समिति गठन भएको थियो । सो समितिले ५८ बुँदामा धितोपत्र बोर्डले पुँजीबजार विस्तारका लागि चाल्नुपर्ने कदमबारेको सुझाव दिएको थियो । प्रतिवेदनअनुरूप काम गर्ने वाचा गरेको बोर्डले प्रतिवेदन आएको लामो समयसम्म कार्यान्वयनमा उदासिन बनेको भन्दै पुँजीबजार सुधार अभियानताहरू आन्दोलित बनेका हुन् ।

उनीहरूले बोर्डले तत्काल १८बुँदे माग पूरा नगरे १ फागुनदेखि बोर्डमा नै आमरण अनशनमा बस्ने चेतावनी दिएका छन् । अभियानका संयोजक तिलक कोइरालाले पुँजीबजार सुधारमा बोर्डको उदासिनता सह्य नभएको बताउँदै अल्टिमेटमसहित आन्दोलनमा उत्रिने बताए ।

बैंकका सहायक कम्पनीलाई ब्रोकर लाइसेन्स, प्रादेशिक ब्रोकरको अवधारणा, नेप्से तथा धितोपत्र बोर्डको पुनर्संरचना, मार्जिन ट्रेडिङ, ब्रोकर कमिसन माथिल्लो बिन्दु कायम गरी ब्रोकरवाइज सर्भिसअनुसार ब्रोकर कमिसन कायम हुनु पर्नेलगायतका १५ भन्दा बढी बुँदाहरू तत्काल कार्यान्वयन गर्नुपर्ने भन्दै आमरण अनशनको तयारीमा उनीहरू लागेका हुन् ।

संयोजक कोइरालाले बिहीबार नै अर्थमन्त्री विष्णु पौडेललाई भेटेरे माग कार्यान्वयन गराउन अनुरोधसमेत गरेका छन् । यस विषयमा अर्थमन्त्री पौडेल पनि सकारात्मक बनेको संयोजक कोइरालाको भनाइ छ ।