दबाबपछि प्रधानमन्त्री ओलीका दूतको दौडधुप

फाइल तस्वीर

A+ A A-

नेकपाभित्र प्रधानमन्त्री केपी शर्मा ओलीका लागि निरन्तर परिस्थिति प्रतिकूल बन्दै गएको छ । त्यसलाई चिर्न ओलीले आफू निकटका नेताहरूलाई परिचालन पनि गरेका छन् । तर, परिस्थिति ओलीले सोचेजस्तो सकारात्मक बन्नेभन्दा पनि थप घेराबन्दी र अप्ठ्यारोमा पर्न थालेका छन् ।

हुन त तीन दिनको बीचमा प्रतिकूल परिस्थिति बुझेर प्रधानमन्त्री ओलीले प्रायोजित अन्तर्वार्ता मात्र दिएनन् प्रचण्डनिवासमा दूतमा पनि पठाइरहेका छन् । आइतबार एक दैनिक पत्रिकासँगको अन्तर्वार्तामा ओलीले अध्यक्ष प्रचण्डलाई उपसभापतिको दर्जामा रहेको भन्दै आक्रामकशैली प्रस्तुत गरेका थिए । सोमबार एक कार्यक्रममा ओलीनिकट स्थायी समिति सदस्य पृथ्वीसुब्बा गुरुङले महाधिवेशनबाट अध्यक्ष माधव नेपाल बनाउने आशयको धारणा व्यक्त गरेका छन् ।

२२ कात्तिकमा प्रचण्डसहित पाँच जना सचिवालय सदस्यले दुईपाने लिखित पत्र नै बुझाएपछि बढी त्रास महसुस गरिरहेका ओली प्रचण्डनिवासमा दूत पठाएर पुराना सहमति कार्यान्वयन गर्न सहमत रहेको सन्देश पठाइरहेका छन् भने पूर्वएमालेका नेताहरूलाई निवास बोलाएर पनि उनले आपसी मिलनको प्रस्ताव गरिरहेका छन् ।

सोमबार बिहानै महासचिव विष्णु पौडेललाई खुमलटार पठाएर ओलीले २६ भदौको स्थायी समितिको निर्णय पालना गर्ने सन्देश दिएका थिए । त्यसको भोलिपल्ट बिहानै शंकर पोखरेललाई पठाए । र, पौडेल र पोखरेल दुबैको सन्देश २६ भदौको स्थायी समितिको निर्णय पालना गर्ने र दुई अध्यक्ष मिल्नुपर्ने सन्देशसँग जोडिएको छ ।

सोमबार नै ओलीले पूर्वएमालेका नेता झलनाथ खनालसँग संवाद गर्न चाहेका थिए । आाइतबार दिउँसो माधव नेपालसँग लामो संवाद गरेका ओलीले छुट्ने बेला पूर्वएमालेका नेताहरूसँग संवाद गर्ने बताएका थिए । त्यसैको सिलसिलामा सोमबार ओलीले खनालसँग भेटन् चाहेका थिए । तर, खनालले रुचl नदेखएका कारण भेट सम्भव नभएको नेकपाका नेताहरूको भनाइ छ ।

यही बीचमा महासचिव विष्णु पौडेलले पुरानो कार्यदललाई ब्युँत्याउने प्रयास गरेका छन् । ओलीको ग्रीन सिग्नलपछि महासचिव पौडेलले साउन अन्तिम साता गठन भएको कार्यदलका सदस्य भीम रावल, शंकर पोखरेल, सुरेन्द्र पाण्डे, जनार्दन शर्मा र पम्फा भुसालको टोली बोकेर प्रधानमन्त्री ओली र प्रचण्ड निवास लैजाने र दुई अध्यक्ष मिलाउन दबाब दिने रणनीति बनाएका थिए । तर, प्रचण्डपक्षका शर्मा र भुसाल असहमत भएपछि साेमबार प्रधानमन्त्री ओलीलाई भेट्ने कार्यक्रम पनि अन्तिम समयमा लथालिंग भएकाे थियाे ।

अध्यक्ष प्रचण्ड, नेता माधव नेपाल, झलनाथ खनाल, वामदेव गौतम र नारायणकाजी श्रेष्ठको टोलीले अनौपचारिक मात्र होइन, औपचारिक सचिवालय बैठक बोलाउने तयारी गरेपछि ओलीले दूत परिचालन गरेको नेपाल निकट एक स्थायी समिति सदस्यले दाबी गरे ।

ओलीइतरको समूह ओलीको अटेरी र जिद्दीपनविरुद्ध स्थायी समिति र केन्द्रीय समितिको बैठक समेत बोलाउने अनौपचारिक संवादमा छन् । निरन्तर ओली अटेरी बन्दै गए बहुमत सचिवालय समिति बैठकले स्थायी समिति बैठक बोलाउने तयारी भइरहेको ती नेताको दाबी छ ।

आज साँझसम्म ओलीइतरको पाँच जना सचिवालय सदस्य छलफलमा बस्ने र भोली बुधबार सचिवालय बैठक बोलाउने तयारी पनि गरेका छन् । त्यही कारण ओलीले आज बिहानै पोखरेललाई प्रचण्ड निवास पठाएका हुन् । प्रचण्डको सचिवालय स्रोतका अनुसार पोखरेलसँग प्रचण्डले अब पछाडि पर्खिने र कुर्ने अवस्थामा नरहेको सन्देश ओलीलाई पठाएका छन् ।

त्यसो त आज बिहान नै प्रचण्ड निवासमा अर्का सचिवालय सदस्य रामबहादुर थापा बादल पनि पुगेका थिए । बादल औपचारिक रूपमा कुनै समूहमा नखुलेका कारण उनीमाथि कित्ताकाट गर्ने दबाब छ ।

प्रकाशित मिति: मंगलबार, कात्तिक २५, २०७७ १३:११