कम्युनिष्ट सरकारले देशमा अस्थिरता र भ्रष्टाचारलाई प्रश्रय दियो : नेता सिंह

कम्युनिष्ट सरकारले देशमा अस्थिरता र भ्रष्टाचारलाई प्रश्रय दियो : नेता सिंह

A+ A A-

नेपाली कांग्रेसका नेता प्रकाशमान सिंहले कम्युनिष्ट नेतृत्वको सरकारले देशमा जहिले पनि अस्थिरता र भ्रष्टाचारलाई मात्रै प्रश्रय दिएको बताएका छन् ।

उनले पहिलो संविधानसभादेखि अहिलेसम्म कम्युनिष्टले जनताबाट अत्याधिक मत पाएको तर सत्तामा पुगेपछि अस्थियरता र भ्रटाचारबाहेक केही पनि दिन नसकेको बताए । गणेशमान सिंहको १०६औँ जन्मजयन्तीको अवसरमा गणेशमान सिंह फाउण्डेशनले काठमाडौंमा आयोजना गरेको कार्यक्रममा बोल्दै नेता सिंहले अहिले पनि झण्डै दुई तिहाईको बहुमत पाएको नेपाल कम्युनिष्ट पार्टीको सरकारले जनतालाई अस्थिरता र भ्रष्टाचार मात्रै दिएको बताए ।

पहिलो संविधानसभामा जनताले म्यान्डेड दिए पनि संविधान जारी नगरी भंग गरेको र अहिले पनि संविधानको कार्यान्वयन गर्न दिएको म्यान्डेड विपरीत अस्थिरता र भ्रष्टाचारलाई बढवा दिएको बताए । बालुवाटारको ललिता निवास जग्गा प्रकरण, सकेक्युरिटी प्रिन्टिङ प्रेस काण्ड, वाइडबडी तथा न्यारोबडी काण्ड बाहिर आउँदासमेत सरकारले कसैलाई कारबाही नगरेको नेता सिंहले बताए ।

प्रधानमन्त्रीले आफूले पनि भ्रष्टाचार गर्दिनँ र अरूलाई पनि गर्न दिन्न भन्ने तर आफ्नै पार्टीका नेता संलग्न भएका घोटलामा उनले नै संरक्षण गर्ने काम गरिराखेको आरोप लगाए । कोरोना रोकथाम तथा नियन्त्रणमा सरकारले गर्नुपर्ने न्यूनतम् कामसमेत गर्न नसकेको उनले बताए ।

कोरोनाका कारण उत्पन्न पछिल्लो परिस्थितिमा जनतालाई राहत दिनुपर्नेमा सरकारले औषधि र उपकरण खरिदमा घोटला गरेको बताए । सरकारले कोरोना महामारी रोकथाममा न्यूनतम् काम पनि नगर्ने र पछिल्लो समय हामी गर्न सक्दैनौँ भन्दै पछि हटेको समेत बताए ।

सरकारले संघीयताको भावना विपरीत एकपछि अर्को काम गरिराखेको आरोपसमेत नेता सिंहले लगाए । संविधानले देशमा तीन तहको सरकारको व्यवस्था गरे पनि प्रधानमन्त्रीले संघीय सरकारकै इकाईको रूपमा प्रदेश र स्थानीय तहलाई लिएको बताए ।

यस्तै नेता सिंहले नेपाली कांग्रेसभित्र पनि अप्रजातान्त्रिक गतिविधि बढेको बताए । पार्टीभित्र देखापरेका अप्रजातान्त्रिक गतिविधि सुधार गर्नको लागि पनि तोकिएको मितिमा नै महाधिवेसन गर्नुपर्ने बताए । चार वर्षमा हुनुपर्ने महाधिवेसन एक वर्ष समय थप हुँदा पनि हुन नसक्ने स्थितिमा आएको भन्दै चिन्ता व्यक्त गरे । महाधिवेसन गर्नका लागि गर्नुपर्ने तयारी केही पनि नगरिएको उनले बताए । यस्तै, प्रजातान्त्रिक पार्टीभित्र अप्रजातान्त्रिक विधिबाट गठन भएका सबै विभाग खारेज हुनुपर्ने मागसमेत गरे ।

नेपाली जनताले गणेशमान सिंहजस्तै चरित्रवान, स्वच्छ छवि भएका राजनीतिज्ञको चाहना गरेको उल्लेख गर्दै अहिलेका नेताहरू पनि सच्चिनुपर्ने बताए ।

प्रकाशित मिति: सोमबार, कात्तिक २४, २०७७ १४:१९