प्रधानमन्त्री र भारतीय सेनाध्याक्ष नरबाणेबीच यस्ता विषयमा भयो कुराकानी

A+ A A-

भारतीय सेनाध्यक्ष मनोज मुकुन्द नरबाणेले नेपाली सेनाको मानार्थ महारथी सम्मान पाइसकेपछि प्रधानमन्त्री केपी शर्मा ओलीसँग शिष्टाचार भेट गरेका छन् । तीनदिने औपचारिक भ्रमणमा नेपाल आएका नरबाणेले आज प्रधानमन्त्री निवास बालुवाटार पुगेर प्रधानमन्त्री ओलीसँग शिष्टाचार भेट गरेका हुन् ।

भेटमा दुवै देशका सेनाप्रमुखलाई मानार्थ महारथी दर्जा प्रदान गरिँदै आएको परम्पराले दुई देशको विशिष्ठ सम्बन्धको उदाहरण प्रस्तुत गर्ने प्रधानमन्त्री ओलीले बताए । हरेक हिसाबले नेपाल-भारत नजिकका छिमेकी भएको स्मरण गर्दै ओलीले दुई देशको सम्बन्ध सुमधुर होस भन्ने चाहना आफ्नो रहेको बताए ।

प्रधानमन्त्री ओलीका विदेश मामिला सल्लाहकार डा. राजन भट्टराईका अनुसार प्रधानमन्त्री ओलीले पारस्परिक समानता र पारस्परिक सम्मानका आधारमा दुई देशको सम्बन्ध अगाडि बढ्नुपर्ने पनि बताए । दुवै देशबीच सीमालगायत अन्य कतिपय विषयमा समस्या भए पनि वार्ताको माध्यमबाट ती समस्या हल गर्नुपर्नेमा ओलीले जोड दिए । वार्ता र संवादको माध्यमबाट विगतदेखि रहेका समस्या समाधान गर्दै सम्बन्धलाई समयाअनुसार अगाडी लिएर जानुपर्ने ओलीले बताए ।

भारतीय सेनाप्रमुख नरबाणेले नेपाल भारतसँग सम्बन्धमा राम्रो हुनुपर्छ भन्ने मान्यताका साथ अगाडि बढीरहेको कुरा बोकेर भारत फर्किन लागेको बताए । डा. भट्टराईका अनुसार नरबाणेले प्रधान सेनापति पूर्णचन्द्र थापासँगको शिष्टाचार भेटमा दुवै देशका सेनाबीच एक आपसमा कसरी सहयोग गर्न सकिन्छ भन्ने विषयमा कुराकानी भएको जानकारी पनि प्रधानमन्त्रीलाई दिएका थिए ।

भारतले नेपाली भूमि समेटेर नयाँ नक्सा जारी गरेपछि बढेको सीमा विवाद समाधानका लागि यस्ता औपचारिक भेटवार्ताहरूले सहयोग पुग्ने डा. भट्टराईले बताए । विगत एक वर्षदेखि बढ्दै गएको दुई देशबीचको सीमा समस्या समाधानका लागि पटकपटक वार्ताको प्रस्ताव गर्दा पनि सफल हुन नसकेको सन्दर्भमा नियमित कुरालाई निरन्तरता दिन सके सीमा समस्या समाधानका लागि औपचारिक वातावरण बनाउँदै समस्या समाधान हुने मान्यता रहेको डा. भट्टराईले बताए ।

भेटमा प्रधानमन्त्रीसँगै उनका विदेश मामिला सल्लाहकार राजन भट्टराई र परराष्ट्र मन्त्रालयका सचिव भरतराज पौडेल पनि सहभागी थिए । त्यस्तै, नरबाणेसँगै नेपालस्थित भारतीय राजदूत विनयमोहन क्वात्रा पनि सहभागी थिए ।

प्रकाशित मिति: शुक्रबार, कात्तिक २१, २०७७ १७:१३