अस्पतालले थाल्याे फोनबाटै काेराेनाकाे उपचार

A+ A A-

‘कोरोना भाइरसको महामारी छ, केही समय अस्पताल नगए हुन्न ?’

नेपथ्यबाट मलिन स्वरमा एउटा प्रश्न आउँछ ।

त्यो प्रश्न अरु कसैको नभएर श्रीमतीको हुन्छ ।

जब प्रश्न कानमा ठोक्किन आइपुग्छ, तब धुलिखेल अस्पतालका डाक्टर तथा काठमाडौं विश्वविद्यालय स्कुल अफ मेडिकल साइन्सका डीन डा. राजेन्द्र कोजू मौन बस्छन् ।

श्रीमतीको प्रश्नभन्दा पनि अस्पतालको शय्यामा रहेका बिरामीको आर्तले उनलाई झन् खोज्छ । अस्पतालको बेडमा बिरामी छन् । इमर्जेन्सीमा कति बिरामी उनैको प्रतीक्षामा छटपटाइरहेका हुन्छन् ।

उनी हतारिँदै घरबाट अस्पताल पुग्छन् ।

कोरोना भाइरस विश्वभर फैलिएपछि कतिपय डाक्टर र नर्सलाई जागिर छोड्नसमेत अभिभावकले दबाब दिन थालेका छन् ।

‘कतै कोरोना सर्‍यो भने के गर्ने ? ज्यानभन्दा ठूलो जागिर त होइन नि !’ एक अभिभावकले आफ्नो सन्तानको लागि सोच्नु स्वाभाविक पनि हो । ती डाक्टर नर्स पनि त कसैको छोरा, कसैकी छोरी, कसैको श्रीमान्, कसैकी श्रीमती हो ।

‘तर त्यो भनेर एक डाक्टर नर्सका लागि कहाँ छुट छ र ?’ परिवार आफ्नो ठाउँमा छ । त्योभन्दा ठूलो अफ्नो दायित्व र कर्तव्य पनि त छ । यो संकटमा आफू बाँचेर अरुलाई बचाउनु छ ।

डा. कोजूलाई फोन दाब्नुअगाडि सोच्दै थिए । कतै बिरामीको उपचारमा खटिएका होलान् । फोन उठ्ने हो कि नउठ्ने हो । नभन्दै उनको फोन उठेन । तर, फोन नउठे पनि उनको मोबाइलले कोरोनाबाट जोगिने सन्देश भनिरहेको थियो ।

केही बेरपछि डा. कोजूको फाेन आयो । त्यसपछि उनले धुलिखेल अस्पतालले कोरोनाको उपचार कसरी गरिरहेको छ ? यो संकटको सामना कसरी गर्ने ? यो बेला डाक्टर नर्सको भूमिका के हो ? कोरोनाको रोकथाम र नियन्त्रण कसरी गर्ने ? भन्नेबारे उनले हामीलाई यसरी सुनाएः

टेकुका चिकित्सक जसले परिवार बिर्सेर कोरोना आशंकित मात्रै हेरिरहे

डाक्टर र नर्स उच्च जोखिममा

तपाईंसँग कुरा गरिरहँदा म अस्पतालकै प्राङ्गणमा छु । विश्व नै यतिबेला कोरोना भाइरस (कोभिड १९) सँग लडिरेको छ । नेपाल पनि कारोनाको उच्च जोखिममा छ । नेपालमा केही व्यक्तिमा पोजेटिभ देखिएको छ । अब सतर्कता र सचेतना अपनाउनुको विकल्प छैन ।

कोरोना संक्रमितको भेट डाक्टर र नर्ससँग हुने हो । त्यसैले डाक्टर र नर्समा सर्ने सम्भावना धेरै हुन्छ । तर डराउने कुरा पनि भएन । डाक्टर र नर्सलाई परिवारको प्रेसर पनि छ । किन जानुपर्‍यो भन्ने प्रश्न आउँछ ।

तर, हाम्रो इथिक्स ठूलो हो । अरु बेला पनि गरिन्छ । यतिबेला झन हाम्रो सेवा महत्त्वपूर्ण हो । जतिसक्दो अरुलाई बचाउने हो । आफू पनि बाँच्ने हो ।

आफ्नो पेसाप्रति इमानदार हुन्छन् उनी ।

डाक्टर-नर्सका व्यथा : परिवारको दबाब र जिम्मेवारीक‍ो तनाव

टिमवर्कमा काम

एक्लै कुनै पनि काम सम्भव छैन । त्यो पनि यस्तो जटिल परिस्थति । यसका लागि अस्पतालमा टिम बनाएका छौँ । अस्पतालको टिम २४ घण्टा नै काममा खटिन्छ । एसाेसिएटेड डीनहरू, पब्लिक हेल्थका निर्देशक, फिजिसियन डा. नर्सहरू, प्रशासन र कर्मचारीको टिम छ । बिहान र दिउँसो दुई पटक मिटिङ बस्छौँ । कुन बिरामीका लागि के गर्नुपर्ने हो ? कोरोनाको आशंकामा आएकालाई कसरी उपचार गर्ने ? कसलाई आइसोलेनमा राख्ने ? कसलाई घर पठाउने ? मिटिङमा छलफल गर्छौं । अनि त्यहीअनुसार बिरामीको उपचार हुन्छ । म टिमवर्कमै विश्वास गर्छु ।

कोरोना आशंका लागेको उपचार आइसोलेनबाट

कोरोनाको आशंकामा आएका बिरामीका लागि आइसोलेसनबाट उपचार हुन्छ । सुरुमा शंका लागेका बिरामीको तापक्रम लिने, हिस्ट्री लिने, विदेशबाट आएको हो होइन ? सबै इतिहास तयार पारेपछि कारोना भएको शंका लागेमा आइसोलेसनमा राखेर उपचार गर्ने गरिएको छ । अन्य रोग भए त्यहीअनुसारको उपचार हुन्छ ।

एक व्यक्तिबाट अर्को व्यक्तिमा नसरोस् भन्नका लागि सुविधा सम्पन्न आइसोलेन बेड बनाइएको छ ।

सरकार ! घर जान दिने कि सडकमै मरौँ ?

आइसोलेसनमा काम गर्ने डाक्टर घर जानै पर्दैैन

कोरोनाको आशंकामा आइसोलेसन वार्डमा राखिएका बिरामीलाई हेर्ने डाक्टर नर्सका लागि अस्पतालमै बस्ने व्यवस्था मिलाइएको छ । अरुले भने अस्पतालमा बस्नु पर्दैन ।

जो आइसोलेसनमा बस्ने हो । त्यो डाक्टर नर्सका लागि प्रोटेक्सन गेयरसहित राखिएको छ । आवश्यक पर्ने पीपीई सुरक्षा कवजको व्यवस्था गरिएको छ । त्यहीबाट कोरोना शंका लागेका बिरामीको स्वाब पठाउने आवश्यक जाँच गर्ने गरेका छौँ । कोरोनाको आशंकामा ८ जनाको उपचार भइरहेको छ । कतिको रिपोर्ट नेगेटिभ आएको छ ।

डिस्टेन्स मेन्टेन गरेर उपचार

कोरोनाबाट जोगिन डिस्टेन्स मेन्टेन आवश्यक पर्छ । डाक्टर र शंकास्पद बिरामीबीचकाे दूरी कायम गर्न बीचमा प्लास्टिकको पार्टेसन छ । कुरा गर्न पनि मिल्छ । तापक्रम नाप्न पनि मिल्छ । स्वाब झिक्न, श्वासनलीमा पाइप राख्ने बेलामा डाक्टर नर्सले पीपीई लगाउँछन् । बिरामीका लागि पनि प्रोटेक्सन कवजको व्यवस्था छ ।

इमर्जेन्सी २४ घण्टा

इमर्जेन्सीबाट २४ घण्टा नै उपचार सेवा दिइरहेका छौँ । कोही दुर्घटना भएर आउँछन् । कोहीको टाउकोको तत्काल सर्जरी गर्नुपर्ने हुन्छ । डेलिभरीको केस आउँछ । पाठेघरको समस्या भएका महिला आउँछन् । क्रिटिकल बिरामीको उपचार गरिरहेका छौँ । उपचार सेवामा कुनै कमी हुन दिने छैनौँ ।

फोनबाट उपचार सेवा

ओपीडी भनेर सञ्चाल गरिएको छैन । तर, आएका बिरामीको उपचार पनि रोकेका छैनौँ । ओपीडीका डाक्टर नर्स पनि काममा खटिनुभएको छ । अहिले सवारी साधन बन्द छ । टाढाबाट बिरामी आउन सक्नु हुन्न । त्यस्ता बिरामीका लागि फोनबाट उपचार सेवा दिएका छौँ । कोरोनाको शंका लागेमा फोनबाट पनि परामर्श लिन सकिन्छ ।

टाढाटाढाबाट बिरामीहरू आउन सक्नु हुन्न । फलोअपमा आउन पाउनुभएको छैन । त्यस्ता बिरामीका लागि फोनबाटै उपचार सेवा दिएका छौँ । के गर्ने, कुन औषधि खाने, सबै फोनबाट सल्लाह दिने गरेका छौँ । त्यसका लागि अस्पतालको हटलाइन नम्बर र सम्बन्धित डाक्टरको नम्बर दिएका छौँ ।

सतर्कतामा जोड

अस्पतालले कोरानाबाट जोगिन सतर्कता अपनाएको छ । आमनागरिकलाई पनि सचेत गराउने काम गरेको छ । वेबसाइट, पम्प्लेट र सामाजिक सञ्जालबाट पनि सचेत गराउने गरेका छौँ । अहिले ट्रेसिङमा जोड दिएका छौँ ।

विदेशबाट आएका सम्भावित व्यक्तिको खोजी गरिरहेका छौँ । अहिलेसम्म १ सय ५० जनामा ट्रेसिङ गरेका छौँ ।

विदेशबाट आएकाको परिवारसम्म पुग्ने गरेका छौँ । टेलिफोनबाट उनीहरूलाई प्रश्न गर्ने गरेका छौँ । उनीहरूले दिने जवाफका आधारमा क्वारेन्टाइनमा बस्नुपर्ने हाे कि, आइसोलेसनमा बस्नुपर्ने हो, वा घरमै बस्ने, के गर्दा हुन्छ, त्यो उपाय सिकाइरहेका छौँ ।

कोरोनाको शंका लागेर पनि अस्पताल आउन डराएका बिरामी छन् । समाजले फरक दृष्टिले हेर्छ भन्ने डरमा बिरामी क्वारेन्टाइनमा बस्न मानेका छैनन् । बसेका पनि भागेका छन् । क्वारेन्टाइनमा बस्नु भनेको आफू पनि बाँच्नु र अरुलाई पनि बचाउनु हो ।

‘हरेक व्यक्तिले सजकता अपनाऔँ । सबै मिलेर डटेर सामना गराैँ । अहिलेलाई यति नै । यहाँ अर्को बिरामी हेर्नु छ,’ डा. कोजूले हाँस्दै फोन काटे ।

याे पनि...

किन आवश्यक छ अनलाइन कक्षा ?

कोरोना कहर :३ दिन हिँडेर घर पुगेपछि ...

घरबाटै बालबालिकालाई यसरी पढाउन सकिन्छ, यस्ता छन् पाठ्यसामग्री

सरकार ! कोरोनाको अनुसन्धान गर्नुपर्ने विश्वविद्यालयहरू बन्द गर्न मिल्छ ?

मध्यम वर्गीय परिवारलाई राहत प्याकेज खोई ?

राहत दिए शुल्क मिनाहा गछौं : निजी विद्यालय

अनलाइनबाटै पढाउँदै छन् केयूका प्राध्यापक

डाक्टर-नर्सका व्यथा : परिवारको दबाब र जिम्मेवारीक‍ो तनाव

टेकुका चिकित्सक जसले परिवार बिर्सेर कोरोना आशंकित मात्रै हेरिरहे

दिनभर सुनसान, साँझमा चहलपहल