उदयपुरमा स्थानीय र प्रहरीबीच झडप, १५ घाइते (भिडियोसहित)

A+ A A-

उदयपुरको बेलका नगरपालिकामा स्थानीयवासी र प्रहरीबीच झडप हुँदा ७ प्रहरीसहित १५ जना घाइते भएका छन् । नगरपालिकाले प्राकृतिक जोखिम निम्तिने गरी खोलाका ढुङ्गा बेचेको भन्दै विरोधमा उत्रिएका स्थानीयवासी र प्रहरीबीच झडप भएको हो ।

झडपमा परी बेलका–४ का स्थानीय प्रेम अधिकारी, सविन मगर, कमल अधिकारी, ज्याेति खड्का, निर्मला चौलागाईं, माया ओलीलगायत आठ प्रदर्शनकारी घाइते भएका छन् । यस्तै, न्यायिक समितिका कानुनी सल्लाहकार सुरेन्द्र बस्नेतसहित सात प्रहरी पनि घाइते भएका छन् ।

इलाका प्रहरी कार्यालय रामपुरका प्रहरी निरीक्षक रामचन्द्र साहका अनुसार झडपमा सात प्रहरी जवान घाइते भएका हुन् । अनौपचारिक सेवा केन्द्र (इन्सेक) को मानवअधिकार निगरानी समिति बेलकाका उपाध्यक्ष जयराज लामिछानेले सुरेन्द्र बस्नेत र प्रेम अधिकारी घाइते भएको जानकारी समितिमा आएको बताए ।

घटना के हो ?

मापदण्डविपरीत खोलाका ढुङ्गा उत्खनन् गरेको भन्दै बेलका–४ का स्थानीयले गत बिहीबार ढुङ्गा लोड गरिएका २० वटा टिपरलाई नियन्त्रणमा लिएर राखेका थिए । प्रहरीले पाँच दिनपछि सोमबार मध्यरातमा गएर ती टिपर छुटाएको छ । करिब ८० जनाको संख्यामा लालबजार पुगेको जनपद र सशस्त्रको संयुक्त टोलीले टिपर छुटाएर पठाएको हो । स्थानीयबाट छुटाइएका टिपरलाई जिल्ला प्रशासन कार्यालय ल्याइएको उदयपुरका प्रमुख जिल्ला अधिकारी ध्रुवबहादुर खड्काले बताए ।

प्रहरीले टिपर पठाएपछि स्थानीयवासी सडक अवरुद्ध गरी मंगलबार बिहानैदेखि प्रदर्शनमा उत्रिएका थिए । त्यस क्रममा स्थानीय र प्रहरीबीच झडप भएको हो ।

प्रदर्शनकारीलाई तितरबितर पार्न ९ राउण्ड अश्रुँ ग्यास प्रहार गरिएको इलाका प्रहरी कार्यालयका प्रहरी निरीक्षक साहले बताए । ‘प्रदर्शनकारीले हानेको ढुङ्गाले लागेर ७/८ जना प्रहरी जवान घाइते भए,’ साहले शिलापत्रसँग भने, ‘त्यसपछि हामीले ९ राउण्ड अश्रुँ ग्यास प्रहार गर्‍याैं ।’

आन्दोलन स्थगित

सडक नै अवरुद्ध गरेर प्रदर्शन गरेको भन्दै चौतर्फी विरोध भएपछि प्रदर्शनकारीले आन्दोलनका कार्यक्रम स्थगित गरेका छन् । उनीहरूले ढुङ्गा उत्खनन गरिएका क्षेत्रमा जिल्ला समन्यव समितिलाई स्थलगत अनुगमन गर्न भन्दै ज्ञापन पत्र पठाएका छन् ।

‘केही दिनभित्रै हामीले अघि सारेका माग सम्बोधन गरिएन भने हामी पुनः आन्दोलनमा उत्रिनेछौं,’ बेलका– ४ का श्याम चौलागाईंले भने । प्रदर्शनकारीले टेण्डर नै खारेज गर्नुपर्ने माग राखेका छन् ।

सोमबार भएको थियो वार्ता

बेलका नगरपालिकाले वडा नम्बर ६ का वडाअध्यक्ष वसन्त मगरको संयोजकत्वमा गठन गरेको वार्ता समिति र प्रदर्शनकारीबीच सोमबार वार्ता भएको थियो । तर, टिपरका ढुङ्गा अनलोड गर्नुपर्ने अडान लिएपछि वार्ता बिनानिष्कर्ष टुंगिएको थियो ।

ढुङ्गामुनि लकडी

प्रदर्शनकारीले ढुङ्गा लोड गरिएको टिपरमा काठ तस्करी भइरहेको आशंका गरेका छन् । ‘ढुंगामुनि काठ राखेर तस्करी भइरहेको शंका लागेपछि हामीले ढुङ्गा अनलोड गरेर वार्ता गर्न माग गरेका हौं,’ एक स्थानीयवासीले भने, ‘तर नगरपालिकाको तर्फबाट वार्ता गर्न आएकाले यो कुरा मानेनन् ।’

महाभारत वन क्षेत्रअन्तर्गत बेलका वडा नम्बर ४ र ६ को सिमानामा रहेको सिसुवा खोलाबाट जोखिम नै निम्तिने गरी ढुंगा उत्खनन गरेको स्थानीयवासी आन्दोलनमा उत्रिएका हुन् ।

ठेकेदारको बदमासी

स्थानीयले मात्रै होइन, नगरपालिकाकै कर्मचारीले पनि ठेकेदार बदमासीका कारण समस्या आएको स्वीकार गरेका छन् । बिहान ६ देखि साँझ ६ बजेसम्म टिपर आवतजावत गर्नुपर्ने, जमिनमुनिको ढुंगा उत्खनन गर्न नपाइनेलगायतका सहमति उल्लंघन गर्नु नै समस्याको जड भएको बेलका नगरपालिकाका प्रमुख कार्यकारी अधिकृत पुष्कर भट्टराईले बताए ।

स्थानीयले भने बाढी नियन्त्रणका लागि कसिएको तारजालीको ढुंगासमेत निकालिएको आरोप लगाएका छन् । सिरहाको बीपी कन्स्ट्रक्सनले ३ करोढ ५६ लाख रुपैयाँमा गत भदौमा ढुङ्गाको ठेक्का पाएको थियो ।

भिडियाे ः