आधा दर्जन बढी एनसेल टावरमा आगजनी र विस्फोट

A+ A A-

शुक्रबार राति ललितपुरको नख्खुमा रहेको एनसेल टावरमा विस्फोट गराएलगत्तै देशका विभिन्न जिल्लामा रहेका एनसेलका टावरमा आगजनी र विस्फोट गरी क्षति पुर्याइएको छ ।

निजी क्षेत्रकै ठूलो दूरसञ्चार सेवा प्रदायक कम्पनी एनसेलका टावरलाई लक्षित गरेर आधा दर्जन बढी ठाउँमा विस्फोट र आगजनी गरिएको हो ।

नख्खुस्थित एनसेल मुख्यालयमा क्षति पुर्याउने गरी शुक्रबार राति करिव आठ बजेतिर शक्तिशाली बम विस्फोट गराइएको थियो । जसका कारण एक जनाको मृत्यु भइसकेको छ भने घाईते दुई जनाको उपचार भइरहेको छ । विस्फोटका कारण एनसेलको कार्यालयमा क्षति पुगेको प्रहरीले जनाएको छ । विस्फोट भएको क्षेत्र वरिपरीका घरमा पनि क्षति पुगेको छ ।

नख्खुमा बम विस्फोट भएलगत्तै शुक्रबार राति कञ्चनपुर, रुपन्देही, रौतहट, पोखरा, बाग्लुङ, काभ्रे, नवलपरासीलगायतका क्षेत्रमा रहेको एनसेलको टावरमा आगजनी भएको प्रहरीले जनाएको छ ।

रुपन्देहीको गैडहवा गाउँपालिका वडा नम्बर ३ सूर्यपुरास्थित एनसेलको टावरमा आगजनी गरिएको छ । रुपन्देहीका प्रहरी प्रमुख हृदय थापाका अनुसार अपरिचित व्यक्तिले बोरामा आगो सल्काएर टावरमा आगजनी गरेका हुन् । आगजनीले टावरका तार जलेर नष्ट भएका छन् ।

त्यस्तै, रौतहटको चन्द्रपुर नगरपालिकास्थित गैडाटारमा रहेको एनसेलको टावरमा पनि आगजनी गरिएको छ । शुक्रबार राति नै पोखरा महानगरपालिका–२७ चन्द्रकालिका डाँडामा रहेको एनसेलको टावरमा आगजनी भएको छ ।

आगलागीले टावर जलेर नष्ट भएको छ । प्रहरीका अनुसार काभ्रेमा पनि एनसेलको टावरमा आगजनी गरिएको छ । काभ्रेको कोसीपारीस्थित भुम्लु गाउँपालिकास्थित सल्ले भुम्लु डाँडामा रहेको एनसेलको बिटिएस टावरमा आगजनी भएको हो ।

बागलुङको बागलुङ नगरपालिका–७ मुल्पानी, गल्कोट नगरपालिका–८ काँडेवाँस र निसीखोला गाउँपालिका–७ राजकुतमा रहेको एनसेलको टावरमा आक्रमण भएको छ ।

पूर्वी नवलपरासीको मध्यविन्दु नगरपालिका वडा नम्बर ७ अम्रसामा एनसेलको टावरमा आगजनी गरिएको छ । शुक्रबार राति नौ बजेतिर एनसेलको टावरमा आगजनी भएको प्रहरीले जनाएको छ । स्थानीयका अनुसार सुरुमा विस्फोट गराएर आगो लगाइएको हो । आगजनीपछि नवलपुर क्षेत्रमा एनसेलको नेट्वर्कले काम गर्न छाडेको छ ।

कन्चनपुरको शुक्लाफाँटा नगरपालिका वडा नम्बर ४ मा रहेको टावरमा पनि विस्फोेट र आगजनी गरिएको छ । विभिन्न जिल्लामा विस्फोटका घटना भएको जानकारी आएपनि विस्तृत विवरण आइनसकेको प्रहरीले जनाएको छ ।

घटनाको जिम्मा कसैले लिएको छैन । घटनाको अनुसन्धान भइरहेको प्रहरीले जनाएको छ । एनसेलले करिव ७० अर्ब भन्दा बढी लाभकर छलेको भन्दै आलोचना भइरहेका बेला एनसेललाई क्षति पु¥याउने गरी मुलुकका विभिन्न जिल्लामा विस्फोटका घटना भएका छन् ।

प्रकाशित मिति: शनिबार, फागुन ११, २०७५ २०:१०