सबैसँग मिलेर अगाडि बढ्ने योजनामा प्रधानमन्त्री प्रचण्ड

A+ A A-

प्रधानमन्त्री पुष्पकमल दाहाल प्रचण्डसँग १० पुसपछि पुरानाे सम्झाैता अनुसार एक वर्ष कार्यकाल बाँकी छ । त्यही कारण गत १० पुसमा प्रधानमन्त्री प्रचण्डले सुध्रिएर काम गर्ने सार्वजनिक प्रतिबद्धता जनाएका छन् । त्यसका लागि रणनीतिक मुभको संकेत पनि गरेका छन् ।

सार्वजनिक रूपमै भनेका पनि छन्- चाहेजस्ताे काम गर्न सकिनँ, अब गर्छु । हुन पनि प्रचण्डले आफूले अन्तिम कार्यकालका रूपमा अहिलेलाई सम्झनालयक बनाउने एक वर्षअघि बाेलेका थिए । तर, कर्ममा त्यस्ताे हुन सकेकाे छैन । त्यसैले उनले दोस्रो वर्ष प्रभावकारी, चुस्त दुरुस्त र सहज सम्बन्ध स्थापित गरेर काम गर्ने रणनीति अपनाएका छन् ।

सिंहदरबारभित्र सम्बन्ध सुधार

अहिले प्रधानमन्त्री प्रचण्डले कर्मचारीसँग सम्बन्ध सुमधुर बनाएर काम गर्ने प्रयास गरिरहेका छन् । पहिलो र दोस्रो कार्यकालमा सरकारी कर्मचारीको बढी आलोचना गरेका प्रधानमन्त्री प्रचण्ड तेस्रो कार्यकालमा भने सम्बन्ध सुधारेर अगाडि बढ्ने रणनीतिमा देखिन्छन् । मन्त्रालयका सचिवहरूसँग निरन्तर छलफल र स‌ंवादमा रहेका प्रधानमन्त्री प्रचण्डले सिंहदरबारमा आवतजावत बढाएका छन् । सचिवहरूबाट ब्रिफिङ लिन थालेका छन् । कतिसम्म भने सचिवका सामुन्ने मन्त्रीकाे आलाेचना गरेका छन् । जसले मन्त्रीसँग भन्दा कर्मचारीसँग सहज सम्बन्ध बनाउने प्रयास गरेकाे बुझिन्छ । फेरिन लागेका मन्त्रीहरूभन्दा सचिवसँग सम्बन्ध सुधार गर्दा परिणाम ल्याउन सकिने बुझाइमा प्रचण्ड देखिएकाे हुन सक्ने आ‌‌कलन छ ।

प्रचण्डमा देखिएकाे याे चासाेलाई प्रशासकहरू शासकीय परिपक्कताका रूपमा विश्लेषण गर्छन् । पूर्वसचिव पूर्णचन्द्र भट्टराई पनि शासकीय परिपक्कता आएको बुझ्न सकिने बताउँछन् । शिलापत्रसँग उनले भने, ‘प्रधानमन्त्रीको निर्देशन पालना भएन भनेर भन्नुभयो । तर, उहाँमा शासकीय परिपक्कता देखियो । पहिलाजस्तो कर्मचारीमाथि टिप्पणी धेरै कम गर्नुभएको छ । जुन सम्बन्ध सुधार गरेर अगाडि बढ्ने रणनीति हुन सक्छ ।’

प्रधानमन्त्रीले बरु मन्त्रीहरूले काम गर्न नसके छोड्नु पर्ने बताउँदै आएका छन् । तर, कर्मचारीबारे टीकाटिप्पणी गरेको खासै देखिँदैन । आउँदो एक वर्षको कार्यकालमा उनले सम्बन्ध राम्रो बनाएर कर्मचारीबाट अधिक राम्रो, छिटोछरितो सेवा प्रवाह गराउने रणनीति अपनाएको देखिन्छ ।

कांग्रेसलाई निरन्तर विश्वास

एमालेसँग १० पुस २०७९ मा बनेको गठबन्धन १२ फागुन २०७९ मा भत्केको थियो । एमालेको समर्थनमा प्रधानमन्त्री बनेका प्रचण्ड राष्ट्रपति निर्वाचनको पूर्वसन्ध्यामा चुनावी गठबन्धनमा फर्केका थिए । अर्थात् कांग्रेसलाई साथ लिने त्यतिबेलाकाे प्रचण्ड प्रयासले एमाले बिच्किएकाे थियाे । तर, प्रधानमन्त्री प्रचण्ड अहिले सत्ता गठबन्धनलाई विश्वासमै राख्न चाहन्छन् । त्याे प्रयासकै लागि कां‌ग्रेसकाे चर्काे आलाेचनामा पनि माैन छन् । हरेक राजनीतिक भागवण्डामा कांग्रेससहित सत्ता गठबन्धनमा विश्वासकाे वातावरण बनाइराख्न चाहन्छन् ।

प्रतिपक्षसँग सम्बन्ध सुधार

प्रधानमन्त्री प्रचण्डले प्रमुख प्रतिपक्ष दल नेकपा एमालेसँग पनि सम्बन्ध सुधार गरेर अगाडि बढ्ने संकेत गरेका छन् । परिवर्तन विरोधीहरू एक ठाउँमा आएर परिवर्तनविरुद्ध सडकदेखि सदनसम्म आवाज उठाइरहेका छन् ।

त्रिभुवन विश्वविद्यालयका उपप्राध्यापक पिताम्बर भण्डारी सरकारविरुद्ध मात्र नभएर व्यवस्थाविरुद्ध नै केही राजनीतिक दल, संघसंस्था लागेकाले परिवर्तनका मुख्य हिस्सेदार दलहरू एक ठाउँमा हुनुपर्छ भन्ने मानसिकताले काम गरेको बताउँछन् । उनले भने, ‘पछिल्लो समयमा दलहरू एक मत छन् । प्रधानमन्त्रीको सम्बोधनमा पनि त्यो देखियो । लोकतन्त्रका नाममा अहिलेको छाडापन, अराजकता देखिएको छ, पपुलिष्ट आइडियाविरुद्ध लड्न पनि एक ठाउँमा हुनुपर्ने बुझाइमा देखिन्छन् । त्यसैले पछिल्लो समयमा परिवर्तनका हिस्सेदार एक ठाउँमा उभिनु पर्ने निष्कर्षमा उनी पुगेका छन् ।’

प्रधामन्त्री प्रचण्ड र एमाले अध्यक्ष केपी शर्मा ओलीबीच निरन्तर संवाद भइरहेकाे छ । सरकारको र अझ प्रचण्डका कडा आलोचना गर्ने ओली पछिल्लो समयमा भने सरकार र प्रचण्डको आलोचना मत्थर सुनिन्छ । एमालेसँग सम्बन्ध सुधारकै लागि आउँदो ११ माघमा हुने राष्ट्रियसभा सदस्यको निर्वाचनमा भागवण्डा गरेर जाने साेचमा प्रधानमन्त्री देखिन्छन् ।

अन्तर्राष्ट्रिय सम्बन्धमा सन्तुलन

अन्तर्राष्ट्रिय सम्बन्धमा यो पटक प्रधानमन्त्री प्रचण्डले सन्तुलन कायम गरेको देखिन्छ । पहिला भारत, अमेरिका र पश्चिमा देशहरूसँग आक्रोश पोख्ने प्रचण्ड यो पटक भने सम्बन्ध सुधारमा बढी केन्द्रीत छन् । अन्तर्राष्ट्रिय मञ्चमा नेपाललाई देखाउने र चिनाउने गरी सहभागिता जनाउने प्रयासमा छन् । भारत र चीन भ्रमणमा विवादास्पद सम्झाैता गरेका छैनन्, जसबाट उनले अन्तर्राष्ट्रिय सम्बन्ध सन्तुलनमा राख्न चाहन्छन् भन्ने सन्देश दिन खोजेका छन् । त्यसमा थप सुधारका लागि कार्यक्षमतामा कमजाेर देखिएका राजदूत फिर्ता बाेलाउने तयारीसमेत उनले गरिरहेका छन् ।

मन्त्री फेरबदल

प्रधानमन्त्री प्रचण्डले मन्त्रीहरू हेरफेर गरेर फरक टिम बनाउन चाहेकाे देखिन्छ । त्यसका लागि उनले सार्वजनिक रूपमा बाेलेका छन् भने गठबन्धनभित्र प्रस्ताव पनि गरेका छन् । यद्यपि, सत्ता गठबन्धनभित्र ११ माघअघि मन्त्री हेरफेर नहुने बताइन्छ । केही मन्त्रीहरूकाे कार्यक्षमता निकै कमजाेर भएकाे प्रधानमन्त्रीकाे बुझाइ छ । केही मन्त्रीका कारण सरकार विवादमा छ र केही मन्त्रीका कारण गठबन्धन नै अप्ठ्यारोमा परेको छ ।

सचिवालय हेरफेर

प्रधानमन्त्रीका राजनीतिक सल्लाहकार हरिबोल गजुरेलले राजीनामा दिएका छन् । तर, अहिलेसम्म उनको राजीनामा स्वीकृत भएको छैन । उनको राजीनामा स्वीकृत भएपछि अर्को व्यक्ति सचिवालयमा आउनेछन् । त्यसबाहेक सचिवालयका केही सदस्यहरू हेरफेर हुने चर्चा पनि माओवादीभित्र भइरहेकाे छ । सचिवालयमा बसेर विवादमा तानिएका र कार्यक्षमतामा प्रश्न उठेका व्यक्तिलाई हेरफेर गर्ने साेचमा प्रधानमन्त्री प्रचण्ड रहेको माओवादी स्राेतकाे दाबी छ ।

यो पनि :

राष्ट्रियसभाको चुनावमा एमालेलाई भाग दिने प्रचण्ड रणनीति, शून्यबाट जोगिन एमालेको ‘ग्रीन सिग्नल’

सुध्रिने घोषणा गरेका प्रचण्डको नसुध्रिने छाँट

देउवाको टाउको दुखाइ बनेका नारायणकाजी, प्रचण्डलाई मन पर्दैन प्रकाशशरण

प्रचण्डबाट छुट्टिएर क्रान्ति न पार्टी, तैपनि छ समाजवादको सपना

हरिबोल गजुरेलको राजीनामा प्रकरण: गंगा दाहालसँग टसलदेखि सुनकाण्डकाे असन्तुष्टिसम्म

प्रकाशित मिति: बुधबार, पुस १८, २०८० १८:१९