पूर्णबहादुर खड्काले शिलान्यास र उद्घाटनमै बिताएका ८ महिना

A+ A A-

कांग्रेस प्रचण्ड नेतृत्वको सरकारमा सहभागी हुने भएपछि उपसभापति पूर्णबहादुर खड्का अर्थमन्त्री भएर ‘प्रभाव’ देखाउने प्रयासमा लागे पनि सभापति शेरबहादुर देउवाले डा. प्रकाशशरण महतलाई ‘मन पराए’ पछि उनी असफल भए । तर, कांग्रेसको नेतृत्व गर्दै दोस्रो वरीयतासहित उपप्रधानमन्त्री बने र सम्हाले रक्षा मन्त्रालय । रक्षा मन्त्रालयको काम सिधै जनतासँग जोडिने र दैनिक जीविकासँग सम्बन्धित नभएकाले उनले यो मन्त्रालयको नेतृत्व गर्दा खासै देखिने कुनै काम भएको छैन ।

तर, कांग्रेसको सभापति हुने सपना देखेका खड्कालाई सांसद चुनाव हारिलाकी भन्ने त्रास पनि थियो, छ । किनकि उनी आफ्नो निर्वाचन क्षेत्र सुर्खेत– १ मा एकपटक पराजित भइसकेका छन् । त्यसैले उनी मन्त्री भएयता सानो कामका लागि पनि गृहजिल्ला, त्यसमा पनि आफ्नो निर्वाचन क्षेत्रमा पुगिहाल्छन् ।

त्यति मात्र होइन, कर्णालीको राजधानी वीरेन्द्रनगरस्थित केही सरकारी कार्यालय आफ्नो निर्वाचन क्षेत्रमा सार्न पहल गरेको भन्दै उनको आलोचना पनि भइरहेको छ । उनको आलोचना सेनामा एक जना जर्नेल यामबहादुर अधिकारीको पदावधि थपेको विषयले पनि भएको छ । माओवादीका पूर्वलडाकु रहेका उनी सेनामा समायोजन भएर सबैभन्दा उपल्लो दर्जामा पुगेका हुन् ।

प्रचण्डपछिको मुख्य जिम्मेवारीमा रहेका खड्का रक्षामन्त्रीको जिम्मेवारी सम्हालेयता आफ्नो निर्वाचन क्षेत्रमा शिलान्यास र उद्‍घाटनमै व्यस्त छन् । खड्काले यो अवधिमा खास चर्चा गर्न लाएक कुनै पनि काम सम्पादन गर्न सकेनन् । कांग्रेसका मन्त्रीहरूले प्रभावकारी काम गर्न नसकेको भन्दै पार्टीभित्र प्रश्न उठिरहेका बेला खड्कासँग उद्‍घाटन मोह कतिसम्म छ भने मेला महोत्सवदेखि वडा कार्यालय र स्वास्थ्य चौकी उद्‍घाटन गर्नमा खड्कालाई भ्याइ नभ्याइ छ ।

सोहीअनुरुप खड्का शनिबार सुर्खेतको गुर्भाकोट नगरपालिकास्थित मेहेलकुना अस्पतालमा आयोजित मुटुरोग स्वास्थ्य शिविरको उद्घाटन गर्न पुगेका छन् । उनको सचिवालयले उपलब्ध गराएको जानकारीअनुसार खड्का उक्त कार्यक्रममा सहभागी हुन शुक्रबार दिउँसो २ बजे नै बुद्ध एयरको विमानबाट सुर्खेत पुगिसकेका छन् ।

१७ चैत २०७९ मा कांग्रेसको नेतृत्व गर्दै प्रचण्ड नेतृत्वको सरकारमा सहभागी भएका खड्काले ८ महिना ६ दिनको अवधिमा अधिकांश महत्त्वपूर्ण समय आफ्नो निर्वाचन क्षेत्र सुर्खेत क्षेत्र नम्बर २ को भ्रमणमै बिताएका छन् । जिम्मेवार मन्त्रालयको जिम्मेवारी पाएका खड्काले पदीय कार्यसम्पादनको खिल्ली उडाउँदै सामान्य समारोहमा हेलिकोप्टर सयर गर्दै शक्तिको दुरुपयोग गरिहेको भन्दै उनकै कार्यकर्ताले चर्को आलोचना गर्दै आएका छन् ।

यति मात्रै होइन, जाजरकोट भूकम्पमा राहत तथा उद्धारमा खड्काले प्रदेश सरकारलाई भूमिकाविहीनजस्तै बनाएको भनेर आलोचनासमेत भएको थियो । उनी संघीय मन्त्री भए पनि विशेष जोडबल भने आफ्नै निर्वाचन क्षेत्रमा दिएको भन्दै कांग्रेस संस्थापनइतर पक्ष उनको खुलेरै विरोधमा उत्रिने गरेको छ । सामान्य शिलान्यास र उद्घाटनमा रिबन काट्न पुग्ने खड्काकै कारण सोही क्षेत्रबाट प्रदेशसभा सांसद एवं आन्तरिक मामिलामन्त्री कृष्णबहादुर जीसी र उनकै पार्टीका सामाजिक विकासमन्त्री खड्गबहादुर पोखरेल छायामा परेका छन् ।

निर्वाचन क्षेत्र लक्षित हुने सामान्य कार्यक्रममा पनि खड्कालाई प्रमुख अतिथि बनाइदा जीसी र पोखरेल मात्रै होइन, स्थानीय तहका जनप्रतिनिधिसमेत छायामा पर्ने गरेका छन् । प्रदेशका मन्त्री, सांसद र स्थानीय तहका प्रमुखहरू हुँदाहुँदै उपप्रधानमन्त्री नै झिना मसिना कार्यक्रममा सहभागी भएर सस्तो लोकप्रियता छर्नुले थप आर्थिक भार बढाएको भन्दै उनको चर्को आलोचना हुने गरेको छ ।

हेर्नुहोस् खड्काको उद्घाटनमोह

उपप्रधानमन्त्रीको जिम्मेवारी सम्हालेसँगै गृह जिल्ला पुगेका खड्काले २६ चैत २०७९ मा भेरीगंगा नगरपालिका–२ स्थित छिन्चु खोलामा निर्माण हुन लागेको पक्की पुलको शिलान्यास गरे । पुल शिलान्यास कार्यक्रममा बोल्दै उनले पक्की पुल समयमै सकिने प्रतिबद्धता व्यक्त गरे ।

२७ चैतमा नेपाली कांग्रेस सुर्खेत क्षेत्र नम्बर–२ को प्रथम क्षेत्रीय अधिवेशनको उद्घाटन गर्न पञ्चपुरी नगरपालिकाको बाबियाचौर पुगेका खड्काले शान्ति प्रक्रियालाई पूर्णता दिन, संविधानको सुदृढीकरण गर्न र देशको तीव्र विकासका लागि गठबन्धन सरकार बनेको दाबी गरे ।

८ वैशाख २०८० मा सिर्जनशील युवा क्लब मेहेलकुना सुर्खेतले आयोजना गरेको खेलकुदको समापन कार्यक्रममा पुगेका खड्का सोही दिन भेरीगंगा उपत्यका नमुना आधुनिक शहरको स्थायी कार्यालयको मेहेलकुनामा उद्घाटन गरे ।

यस्तै, १६ वैशाखमा काठमाडौं प्रथम राष्ट्रिय लेखक दिवस तथा राष्ट्रिय लेखक पुरस्कार वितरणमा पुगेका खड्का ३० असारमा सुर्खेतको मेहलकुनामा इलाका प्रशासन कार्यालय उद्घाटन गर्न पुगे ।

३१ असारमा वीरेन्द्रनगरमा आयोजित कर्णाली प्रदेश प्रहरीले सुरु गरेको प्रहरीको फोन नम्बरसहितको स्टिकर टाँस अभियानको उद्घाटनसमेत खड्काले गरे ।

६ साउनमा काठमाडौंमा आयोजित बीपी कोइराला राष्ट्रिय पुरस्कार वितरणमा पुगेका खड्का ३१ साउनमा काठमाडौंमै आयोजित नेपाल निजामती कर्मचारी युनियनको प्रशिक्षण कार्यक्रम उद्‍घाटनमा पुगे ।

२ भदौमा रुपन्देही क्षेत्र नम्बर ३ को क्षेत्रीय सम्मेलन उद्‍घाटन गर्न पुगेका खड्का ८ भदौमा भक्तपुरको चाँगुनारायण नगरपालिका–५ को नवनिर्मित वडा कार्यालय र स्वास्थ्य चौकी भवन उद्‍घाटन पुगे ।

११ असोजमा पूर्वी सुर्खेतको बोटेचौरमा भेरी कोरिडोर सिँचाइ तथा नदी व्यवस्थापन आयोजना कार्यालयको स्थापना गर्न खड्का पुगे । २४ असोजमा सुर्खेतमा आयोजित एक कार्यक्रमका बीच खड्काले कर्णाली प्रदेशमा हिंसापीडित सहायता कक्ष र ट्राफिक सचेतना अभियानको एकैसाथ उद्घाटन गर्न भ्याए । यस्तै, सोही दिन भोलिपल्ट खड्काले सुर्खेतको गुर्भाकोट नगरपालिका–८, मेहेलकुनास्थित शुभाघाट शहरी खानेपानी तथा सरसफाई उपभोक्ता संस्थाको उघाट्न गरे ।

२५ असोजमा खड्काले कर्णाली प्रदेशमा लागुऔषधविरुद्धको लालटिन अभियानको शुभारम्भ गरे । लागुऔषधका कारण घर, समाज र सिंगो राष्ट्रलाई असर पुर्‍याइरहेको बताउँदै उपप्रधानमन्त्री खड्काले सिंगो समाज यसविरुद्ध एकजुट हुनुपर्नेमा जोड दिए ।

२७ असोजमा सुर्खेत उधोग वाणिज्य संघले आयोजना गरेको शुभकामना आदानप्रदान तथा चियापान कार्यक्रममा सहभागी हुन पुगको खड्काले १२ मंसिरमा सुर्खेतको चिङ्गाडमा आयोजित बृहत् खेलकुद तथा सांस्कृतिक कार्यक्रमको उद्घाटन गर्न गर्न भ्याएका थिए ।

सम्बन्धित सामग्री :

औपचारिकतामा भुलेका परराष्ट्रमन्त्री साउद, जनताको दु:खमा सँगै भए पनि ‘बोल्ड’ हुन सकेनन्

अर्थतन्त्रको 'डायग्नोसिस' गर्न चुकेका डाक्टर

नक्कली शरणार्थी प्रकरणमा प्रभावशाली नेतालाई समातेर चर्चामा, सुनकाण्डपछि सेलाएका नारायणकाजी (भिडियो)

सरकारबाहिर हुँदा कानुनीराज, मन्त्री बनेपछि धनराजको ‘राज’

झिनामसिना काममा बित्यो पर्यटनमन्त्री किराँतीको एक वर्ष, यस्ता छन्- काम, विवाद र लफडा

सिंहदरबारमा गुमनाम ऊर्जामन्त्री शक्ति बस्नेत

प्रकाशित मिति: शुक्रबार, पुस ६, २०८० २१:४२