अब आमाहरू कार चलाउछ्न्ः मन्त्री अर्याल

A+ A A-

भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले अब आमाहरूले पनि कार चलाएर हिड्ने दिन छिट्टै आउने बताएका छन् । अखिल नेपाल महिला संघ केन्द्रीय महिला हिंसा विरुद्धको अभियान र केन्द्रीय युवा समितिले आज आज काठमाडौंमा आयोजना गरेको ‘लैंगिक हिंसा अन्त्यको लागि विद्यमान कानुनी व्यवस्था’ विषयक अन्तरक्रिया कार्यक्रममा बोल्दै मन्त्री अर्यालले त्यस्तो बताएकी हुन् ।

महिलाहरू आर्थिक रूपमा सशक्तिकरण हुने अभियान सञ्चालन गर्नुपर्ने भन्दै मन्त्री अर्यालले आर्थिक सशक्तीकरण अबको महिला आन्दोलनको दिशा हुनुपर्ने बताए । आयआर्जन गर्दै आर्थिक रुपमा आत्मनिर्भर बनाउदै अबको महिला आन्दोलन अगाडि बढाउनुपर्ने र त्यसका निम्ति ठूलो अभियानको आवश्यकता रहेको औल्याए । ‘महिलालाई सम्पत्तिको मालिक कसरी बनाउने भन्नेतर्फ ध्यान जानुपर्छ । अब हाम्रो आमाले कार चलाउछन्, उद्यम चलाउछन् । साना उद्योग, व्यापार चलाउछन्’, मन्त्री अर्यालले भने ।

महिलाहरूलाइ सीप सिकाउदै, उत्पादन, उद्यमशीलतामा जोड्दै आर्थिक सशक्तीकरणको अभियानमा लगाउनुपर्ने भन्दै मन्त्री अर्यालले त्यो अभियान सामुहिकतामा सहकारीमार्फत गर्नुपर्ने बताए । ‘प्रत्येक घरबाट सहकारीको सदस्य बनाउने र सामुहिकतामा हाम्रा ठाउँको सम्भावना पहिचान गर्दै उद्यमशीलतामा जोड्ने र आर्थिक आयआर्जन गर्ने अभियान सञ्चालन गर्नुपर्छ’ मन्त्री अर्यालले भने ‘कम लगानीमा पनि उत्पादन गर्न, उद्यमशीलता चलाउन सकिन्छ र त्यो सहकारीमार्फत सामुहिकतामा गर्न सकिन्छ ।’

अर्को प्रसंगमा मन्त्री अर्यालले राष्ट्रपति जस्तो संस्थालाई अनुचित रूपमा बिवादमा ल्याउने गलत प्रवृत्तिका विरूद्धमा बोल्न समेत आग्रह गरे । राष्ट्रपति भनेको विद्यालदेवी भण्डारी मात्र नभएर संस्था भएकाले संस्थाको सम्मान गर्नपर्ने उनको भनाइ थियो ।

नेपालको महिला आन्दोलन सुधारको क्षेत्रबाट शुरु भएको स्मरण गर्दै मन्त्री अर्यालले मुलुकको राष्ट्रपति बनाउने ठाउँसम्म पुगेको भन्दै अब प्रधानमन्त्री बनाउनेतर्फ लाग्नुपर्ने समेत बताए । धेरै महिलाहरूले मन्त्रीको जिम्मेवार पाएको र विभिन्न तहका जनप्रतिनिधिहरूको भूमिका प्राप्त गरेको भन्दै उनले यसहिसाबले नेपालको महिला आन्दोलनले ठूलो फड्को मारेको बताए ।

हिजो घर छाडेर झोला बोके राजनीति हुने अवस्था भएपनि अहिलेको अवस्था भनेको हरेक क्षेत्रको प्रतिस्पर्धामा आफुलाई खरो उतार्न सकिन्छ कि सकिदैन भन्ने महत्वपूर्ण हुने बताए । मन्त्री अर्यालले
पाएको जिम्मेवारी कुशलतापूर्वक पूरा गर्ने र प्रतिस्पर्धी क्षमताको विकास गर्ने, अध्ययनशील बन्ने कार्यतर्फ लाग्न महिला अगुवाहरूलाइ आग्रह गरे ।

प्रकाशित मिति: शनिबार, फागुन ११, २०७५ ०३:४७