शान्ति प्रक्रियाका बाँकी काम टुंग्याउन १२ बुँदे सम्झौताका हिस्सेदारहरू सहमत छन्: माओवादी केन्द्र

शान्ति प्रक्रियाका बाँकी काम टुंग्याउन १२ बुँदे सम्झौताका हिस्सेदारहरू सहमत छन्: माओवादी केन्द्र

A+ A A-

नेकपा माओवादी केन्द्रले संयुक्त राष्ट्र संघका महासचिव एन्टोनियो गुटेरेसको नेपाल भ्रमण विश्व शान्तिका लागि बहुआयामिक महत्त्वको रहेको जनाएको छ ।

बिहीबार पार्टी कार्यालय पेरिसडाँडामा पत्रकार सम्मेलन गरी उपाध्यक्ष तथा प्रवक्ता अग्नि सापकोटाले महासचिव गुटेरेसको भ्रमणले शान्ति प्रक्रियाका बाँकी काम मौलिक ढंगबाट टुंग्याउनु पर्ने र पीडित पक्षलाई विश्वासमा लिएर टुंगोमा पुर्‍याउन सहयोग पुग्ने बताएका हुन् ।

‘संयुक्त राष्ट्रसंघको महासचिव नेपाल भ्रमणमा आउनु ठूलो उपलब्धि हो । अहिले संयुक्त राष्ट्रसंघको सुरक्षा परिषद्को बैठक चलिरहेका बेलामा नेपाल आउनु बहुआयामिक महत्त्व छ । अर्को कुरा, बुद्ध जन्मेको देशबाट विश्व शान्तिका लागि अपिल गर्नुभयो । बुद्ध जन्मिएकै ठाउँबाट गर्नुभयो । यसको धेरै ठूलो महत्त्व छ,’ उनले भने ।

प्रवक्ता सापकोटाले संक्रमणकालीन न्यायसँग सम्बन्धित विधेयक हिउँदे अधिवेशनबाट पारित हुने बताए । उनले शान्ति प्रक्रिया टुंगो लगाउने सहमति समितिमा भइसकेको र संसदबाट भने अर्को हिउँदे अधिवेशनबाट पारित गर्ने सहमति जुटेको बताए । टीआरसी विधेयक पारित गर्नेबारे १२ बुँदे सम्झौताका हिस्सेदार र परिवर्तनकारी दलहरूबीच सहमति भएको पनि उनले बताए ।

‘शान्ति प्रक्रियाको आधा काम पूरा भएको छ । बाँकी कामलाई पनि टुंगो लगाउनुपर्नेछ । समितिमा टीआरसी बिलबारेमा सहमति भइसकेकाले हिँउदे अधिवेशनबाट पारित हुन्छ,’ उनले भने ।

प्रवक्ता सापकोटाले माओवादी केन्द्र रुपान्तरण हुनुपर्ने र त्यो काम तीन महिने अभियानबाट सुरु भएको बताए । ‘माओवादी रुपान्तरण हुने क्रममा छ । माओवादीबाट गल्ती र कमीकमजोरी भएका छन् । त्यसलाई सुधार्नुपर्नेछ ।अहिले पनि माओवादीप्रति जनताको माया यथावत नै छ । देश माओवादीको एजेन्डामा चलिरहेको छ । हामी अब रुपान्तरण हुन आवश्यक छ,’ उनले भने ।

प्रकाशित मिति: बिहीबार, कात्तिक १६, २०८० १७:१५