कर्णालीबाट ६ अर्बभन्दा बढीको पशुपंक्षी तथा कृषि उपज निर्यात

A+ A A-

कर्णाली प्रदेशबाट गत आर्थिक वर्ष २०७९/८० मा ६ अर्ब भन्दा बढी मूल्य बराबरको पशुपंक्षी तथा कृषि उपज निर्यात भएको छ ।

कर्णालीबाट उक्त आर्थिक वर्षमा ४ अर्ब ७ करोड १८ लाख ६६ हजार रुपैयाँ बराबरको पशुपंक्षी निर्यात भएका छन् । यस्तै ३० करोड ३३ लाख १० हजारको दूध, २ करोड २३ लाख ३० हजारको स्थानीय कुखुरा, ३१ लाख २९ हजारको राडीपाखी खरायो टोपी, कोटको कपडा निर्यात भएको छ ।

कर्णालीबाट निर्यात हुने पशुपंक्षीहरू नेपालगन्ज, बुटवल, चितवन, काठमाडौं, टीकापुर, पोखरा, विरगञ्ज, धनगढी, रुकुमपूर्वलगायतका जिल्लहरूमा पुग्ने गरेका छन् ।

यस्तै, १ अर्ब ७८ करोड २१ लाख २५ हजार बराबरको खाद्यान्न तथा कृषि उपजहरू निर्यात भएको छ । नेपालगञ्ज, बुटवल, चितवन, काठमाडौं, कैलाली, पोखरा र वीरगञ्जलगायतका बजारमा कर्णालीका कृषि उपजहरू पुग्छन् ।

कर्णालीको भूमि व्यवस्था, कृषि तथा सहकारी मन्त्रालयले सार्वजनिक गरेको गत आर्थिक वर्षको प्रगति प्रतिवेदनमा १२ करोड ७० लाख ३७ हजार मूल्य बराबरको मकै, मार्सी, मार्से, कोदो, चिनो, कागुनो, फापरलगायतका खाद्यान्नहरू निर्यात भएको छ । यस्तै ७४ करोड ७० लाख मूल्यबराबरका विभिन्न प्रजातिका मौसमी तथा बेमौसमी तरकारी, ९ करोड ४७ लाख ८४ हजारको तरकारीका बिउ, ३३ करोड १५ लाख ४० हजारको सुन्तला, ७ करोड १० लाख ६० हजार मूल्यबराबरको स्याउ निर्यात भएको छ ।

यस्तै, १८ करोड ७५ लाख ६२ हजारको अदुवा, ३३ करोड ५० लाख ६० हजारको बेसार, २ करोड २९ लाख २५ हजारको सिमी, ८७ लाख ६४ हजारको मह, १५ करोड २४ लाख ३८ हजारको वर्षे आलु तथा ५५ लाख मूल्य बराबरका सुन्तला/कागतीका विरुवाहरू निर्यात भएको मन्त्रालयले जनाएको छ ।

प्रकाशित मिति: शुक्रबार, साउन १२, २०८० २१:४०