राष्ट्रियसभा उपाध्यक्ष अर्यालको गुनासो- सभामुख र राष्ट्रियसभा अध्यक्षले ह्यूमिलिएट गरे (भिडियो)

राष्ट्रियसभा उपाध्यक्ष अर्यालको गुनासो- सभामुख र राष्ट्रियसभा अध्यक्षले ह्यूमिलिएट गरे (भिडियो)

A+ A A-

संविधानप्रदत्त महिलाका हक कार्यान्वयन र महिला सशक्तिकरण गर्न गठन गर्ने भनिएको संसदीय संयन्त्रको नेतृत्वलाई लिएर उत्पन्न विवाद अझै सुल्झिएको छैन ।

विवादको जड भने मस्यौदामा संयन्त्रको नेतृत्व प्रतिनिधिसभाकी उपसभामुख इन्दिरा राना र राष्ट्रियसभाकी उपाध्यक्ष उर्मिला अर्यालले गर्ने उल्लेख भए पनि सार्वजनिक गर्दा भने अर्यालको नाम हटाइयो ।

मस्यौदाको आठौँ नम्बरमा संयन्त्रको नेतृत्वमा प्रतिनिधिसभाकी उपसभामुख र राष्ट्रियसभाकी उपाध्यक्ष नेतृत्वमा एक संसदीय समिति गठन गर्ने भनिएको छ । तर, मस्यौदाका आधारमा तयार निष्कर्षमा भने अर्यालको नाम छैन । यही विषयलाई लिएर राष्ट्रियसभा उपाध्यक्ष अर्यालले असहमति जनाएकी हुन् ।

शिलापत्रसँग उनले भनिन्, ‘उहाँहरू (सभामुख, राष्ट्रियसभा अध्यक्ष र संसद सचिवालयका महासचिव) भित्र जानुभयो । अनि, निष्कर्षमा मेरो नाम हटाइयो । यो त मलाई हेप्ने र ह्यूमिलिएट गर्ने काम भयो ।’

राष्ट्रियसभा उपाध्यक्ष अर्यालले राजनीतिमा कसैको दासत्व पनि स्वीकार नगरिएको भन्दै प्रतिनिधिसभाका सभामुख देवराज घिमिरे र राष्ट्रियसभा अध्यक्ष गणेशप्रसाद तिमिल्सिनाले हेप्दा आफू नहेपिने बताइन् ।

‘कसैले हेप्दा म हेपिने होइन । म अलि जुझारु मान्छे पनि हुँ । नचाहिने कुरामा म लडेरै आएकी छु । लाभको हिसाबले कहीँ नतमस्तक भएर काम गरेकी छैन’, उनले भनिन्, ‘दासत्व स्वीकार गरिएको भए अझ माथिल्लो पदमा पुगिन्थ्यो होला ।’

संयन्त्रको नेतृत्वबाट सुटुक्क हटाइएपछि आफूूले प्रदेशसभाका उपसभामुख समानको सदस्य अस्वीकार गरेर उपाध्यक्षको पदीय गरिमा जोगाउने उनले बताइन् । प्रस्तावित संयन्त्रको नेतृत्वमा प्रतिनिधिसभाकी उपसभामुख इन्दिरा राना छिन् । सदस्यहरूमा उपाध्यक्ष अर्यालसँगै प्रदेशसभाका उपसभामुखहरू छन् । तर, अर्यालले भने सदस्य नरहने बताएकी छिन् ।