भुवन पाठक बागमतीका सभामुख कि राप्रपा नेता ? (भिडियाे)

A+ A A-

संसदीय प्रणालीमा सभामुखले दलसँगको राजनीतिक आबद्धता तोड्ने प्रचलन छ । त्यसैले, सभामुखमा निर्वाचित भएलगत्तै संघीय संसद र प्रदेशसभाका सभामुखहरूले दलसँगको आबद्धता छोडेका छन् । तर, बागमती प्रदेशका सभामुख भुवन पाठक भने अपवाद बनेका छन् ।

पाठक २९ पुस २०७९ मा बागमतीको प्रदेशसभाको सभामुखमा निर्वाचित भएका थिए । राष्ट्रिय प्रजातन्त्र पार्टी (राप्रपा) का महामन्त्रीसमेत रहेका पाठकले सभामुखमा निर्वाचित भएको ६ महिना बितिसक्दासमेत महामन्त्रीबाट राजीनामा दिएका छैनन् ।

सभामुखमा निर्वाचित भएपछि अन्य प्रदेशका सभामुखहरूले भने पार्टीका सबै जिम्मेवारीबाट राजीनामा दिइसकेका छन् । र, संघीय सभामुख देवराज घिमिरेले पनि दलीय आबद्धता तोडिसकेका छन् ।

पाठकले चाहिँ अटेरी गरिरहेका छन् । हुन त, उनी पार्टीको महामन्त्री मात्र होइन, पार्टीको अन्तर्राष्ट्रिय सम्बन्ध विभागका प्रमुख पनि छन् । नेता डा. प्रकाशचन्द्र लोहनी संयोजक रहेको निर्देशक समिति, पार्टीको कार्यसम्पादनहुँदै केन्द्रीय सदस्य पनि रहेका छन् ।

२९ पुसमा पाठक एमाले–माओवादी केन्द्रको सहयोगमा सभामुख निर्वाचित भएका थिए । पार्टीसँगको आबद्धता छोड्न नसकेर सामान्य नैतिकता पनि देखाउन नसकेका पाठक सदन कि राप्रपाका नेता भनेर बागमती प्रदेशका सांसदहरूले नै कुरा काट्न थालिसकेका छन् ।

बेलायती संसदीय प्रणालीको अभ्यास गरिरहेको नेपालसहितका देशहरूमा सभामुखलाई दलीय आबद्धताबाट टाढा राख्ने प्रचलन छ । यसो गर्नुको मूल कारण तटस्थ, निष्पक्ष र स्वतन्त्र भएर सदन सञ्चालन गरून् भन्ने अभिप्राय रहेको प्रतिनिधिसभाका पूर्वसभामुख दमननाथ ढुङ्गाना बताउँछन् ।

शिलापत्रसँगको कुराकानीमा ढुङ्गानाले सामान्य राजनीतिक नैतिकताका आधारमा पनि सभामुखले दलीय आबद्धता त्याग्नुपर्ने बताउँछन् । उनी भन्छन्, ‘सभामुख निष्पक्ष, तटस्थ र स्वतन्त्र हुनुपर्छ । नभए यस्तो हुन दलको पदीय भूमिकाले बाधा पुर्यारउँछ । यसो हुँदा सांसदहरूको सभामुखप्रति विश्वास पनि बढ्छ ।’

नैतिक प्रश्न गम्भीर रूपमा उठ्न थाले पनि पाठक भने अझै दलीय आबद्धता छोड्ने पक्षमा छैनन् । शिलापत्रसँग पाठक आफूले पार्टीसँगको आबद्धता त्याग्नुपर्ने कारण नरहेको ठान्छन् । उनले भने, ‘पार्टीको भूमिकाबाट राजीनामा दिएको छैन, मैले आबद्धता किन त्याग्ने ?’

पाठकले थप प्रस्टीकरण दिए, ‘मैले आफूलाई तटस्थ राख्नुपर्छ । त्यसका लागि पार्टीको सम्पूर्ण पद फ्रिज छ । पार्टीको कार्यक्रममा कहीँ जान्नँ । कार्यसमितिको बैठकमा पनि कहीँ कतै जान्नँ । गएको पनि छैन, यस कारण मैले राजीनामा दिएको छैन ।’

आबद्ध दलको जिम्मेवारीहरूबाट सभामुख हुँदा पनि राजीनामा दिएर अलग नहुनुलाई पार्टीभित्रै पाठक पदलोलुप नेता भएको टिप्पणीसमेत हुन थालेको छ । तर, उनले त्यसलाई पनि वास्ता गरेका छैनन् ।

जबकि, संघीय संसदका सभामुख देवराज घिमिरेले गत ६ माघमा राजीनामा दिएका थिए । उनी ५ माघमा सभामुख निर्वाचित भएका हुन् । ‘म प्रतिनिधिसभाको समाभुख पदमा निर्वाचित भएको र यस पदको भूमिकालाई स्वतन्त्र र निष्पक्ष रूपमा निर्वाह गर्नका लागि नेकपा (एमाले) को पार्टी सदस्यता र पार्टीसम्बद्ध सम्पूर्ण राजनीतिक, सांगठनिक जिम्मेवारीबाट अलग भएको जानकारी गराउँदछु’, राजीनामा दिँदै घिमिरेले भनेका थिए ।

प्रदेशहरूमा कोशी प्रदेशका सभामुख बाबुराम गौतमले माओवादी, मधेश प्रदेशका सभामुख रामचन्द्र मण्डलले एमाले, गण्डकी प्रदेशका सभामुख कृष्णप्रसाद धितालले माओवादी र लुम्बिनीका सभामुख तुलाराम घर्ती मगरले माओवादी पदीय जिम्मेवारीहरूबाट निर्वाचित भएको केही दिनमै राजीनामा दिए ।

कर्णाली प्रदेशका सभामुख नन्दा गुरुङले एमाले र सुदूरपश्चिम प्रदेशका सभामुख भीमबहादुर भण्डारीले माओवादीबाट राजीनामा दिइसकेका छन् ।

प्रकाशित मिति: बुधबार, असार २०, २०८० १४:३५