अनुसन्धान प्रतिवेदन शुक्रबारभित्रै बुझाउने प्रहरीको तयारी, अझै को-को छन् फरार ?

अनुसन्धान प्रतिवेदन शुक्रबारभित्रै बुझाउने प्रहरीको तयारी, अझै को-को छन् फरार ?

A+ A A-

प्रहरीले नेपालीलाई नक्कली भुटानी शरणार्थी बनाएर ठगी गर्ने गिरोहमाथिको अनुसन्धान अन्तिम चरणमा पुर्‍याएको छ । काठमाडौं प्रहरी र उपत्यका अपराध अनुसन्धान कार्यालयको टोलीले सो प्रकरणमा जोडिएका विचौलियालाई १२ चैतदेखि पक्राउ गर्न थालेको थियो ।

उक्त प्रकरणमा जोडिएका हाइप्रोफाइल पूर्वगृहमन्त्री बालकृष्ण खाँणदेखि पूर्वउपप्रधानमन्त्री टोपबहादुर रायमाझीसमेत गरी १४ जना पक्राउ परेका छन् । काठमाडौं प्रहरीसहितको टोलीले उनीहरूलाई विभिन्न मितिमा पक्राउ गरेर अनुसन्धान गरेको हो । सो प्रकरणमा जोडिएका केही भने अझै फरार छन् ।

काठमाडौं प्रहरीले पक्राउ परेकामाथिको अनुसन्धान प्रतिवेदन ५५ दिनभित्र सकेर सरकारी वकिलको कार्यालय काठमाडौंमा बुझाउने तयारी गरेको छ । सरकारी वकिलको कार्यालयले प्रहरीलाई मंगलबार अनुसन्धान प्रतिवेदन बुझाउन ताकेतासमेत गरेको थियो ।

१२ चैतदेखि पक्राउ परेकालाई प्रहरीले संगठित अपराधको मुद्दा चलाएर अनुसन्धान गरेको थियो । कानुन अनुसार संगठित अपराध मुद्दामा प्रहरीले अनुसन्धान गरेको प्रतिवेदन सरकारी वकिलको कार्यालयले ६० दिनभित्र अदालत पेस गरिसक्नुपर्ने हुन्छ ।

सोही कारण प्रहरीले पक्राउ परेकामाथिको अनुसन्धान तीव्र पारेको हो । काठमाडौं प्रहरी परिसरका प्रमुख एसएसपी दानबहादुर कार्कीका अनुसार प्रहरीले गरेको अनुसन्धान प्रतिवेदन बुझाउने गरी तीव्रता दिइएको छ । ‘हामीले अनुसन्धान प्रतिवेदन अब दुई-चार दिनभित्रै बुझाउने तयारी गरेका छौँ । हेरौँ अब कहिले सकिन्छ,’ एसएसपी कार्कीले भने ।

सकेसम्म बिहीबार नसकिए शुक्रबारसम्म सरकारी वकिलको कार्यालयलाई बुझाउने तयारी प्रहरीको छ । सुरुमा पक्राउ परेकाहरूलाई थुनामा राखेर अनुसन्धान गरेको ५२ दिन पूरा भएको छ ।

यसरी सुरु भएको थियो संगठित ठगी

गृह मन्त्रालयमा भुटानी शरणार्थीबारे विभिन्न मागसहितका निवेदनका चाङ थिए । ती निवेदनको सत्यता र समस्या हल गर्न भन्दै गृह मन्त्रालयले एक कार्यदल नै गठन गर्‍यो । भुटानी शरणार्थीसम्बन्धी समस्याको स्थायी समाधान पहिल्याउन बनेको कार्यदलले वैशाख २०७६ देखि काम थालेको थियो ।

पूर्वसहसचिव बालकृष्ण पन्थीको संयोजकत्वमा गणेशबहादुर केसी विज्ञ सदस्यका रूपमा थिए भने गृह मन्त्रालयकै शाखा अधिकृत दीपकप्रसाद न्यौपाने सदस्य-सचिव थिए । उक्त कार्यदलले सुरुमा दुई महिनाभित्र प्रतिवेदन गृह मन्त्रालयमा बुझाउनुपर्ने समयसीमा पाएको थियो । तर, पछि फेरि एक महिना थप गरेर उक्त कार्यदलले तीन महिनापछि ३० असार २०७६ मा तत्कालीन गृहमन्त्री रामबहादुर थापा र गृहसचिव प्रेम राईलाई प्रतिवेदन बुझायो ।

त्यतिबेला एमाले अध्यक्ष केपी शर्मा ओली प्रधानमन्त्री थिए । सो प्रतिवेदन ओली नेतृत्वकै सरकारको पालामा मन्त्रिपरिषद्‌मा पुग्यो । तर, प्रतिवेदन मन्त्रिपरिषद्‌मा पुगेको ९ महिनासम्म कुनै निर्णय हुन सकेन । अनुसन्धानमा खटिएका प्रहरीका अनुसार विचौलियाहरूले यसअघि नै नेपालीलाई नक्कली शरणार्थी बनाएर अमेरिका पठाउने भन्दै रकम उसुल्न थालिसकेका थिए ।

केशव दुलालसहितको गिरोहले पन्थी नेतृत्वकै कार्यदललाई गुमराहमा राखेर केही नेपालीलाई शरणार्थी बनाउने योजना बुनेको थियो । २७ चैत २०७४ देखि गृहसचिव रहेका राईको २० माघ २०७६ सरुवा भयो । उनीपछि गृहसचिव भए महेश्वर न्यौपाने । उनका पालामा मन्त्रिपरिषद्ले कुनै निर्णय नगर्दा २१ माघ २०७६ देखि गृहसचिव रहेका न्यौपानेले २७ साउन २०७८ सम्म शरणार्थीसम्बन्धी कुनै काम गर्ने मौका पाएनन् ।

त्यो बेलासम्म भुटानी शरणार्थीसम्बन्धी प्रतिवेदन मन्त्रिपरिषद्‌मै थन्किएको थियो । त्यहीबीच ओली नेतृत्वको सरकार ढल्यो । २९ असार २०७८ मा कांग्रेस सभापति शेरबहादुर देउवाको नेतृत्वमा सरकार बन्यो । गृहमन्त्री बालकृष्ण खाँण बने । देउवाको नेतृत्वमा सरकार बनेसँगै ओली नेतृत्वको सरकारको पालामा मन्त्रिपरिषद्‌ पुगेका सबै फाइल फिर्ता भए ।

त्यही बेला भुटानी शरणार्थीसम्बन्धी फाइलसमेत फिर्ता भएर गृहमा आयो । खाँण गृहमन्त्री भएपछि गृहसचिवमा भए टेकनारायण पाण्डे । उनी २७ साउन २०७८ मा गृहसचिव बनेका थिए । गृहमन्त्री भएकै दिनदेखि विचौलियाले खाँणलाई प्रभावमा पार्न थालिसकेका थिए । रामबहादुर थापा गृहमन्त्री हुँदादेखि नै नेपालीलाई नक्कली भुटानी बनाउँदै अमेरिका पठाउने भन्दै विचौलिया सानु भण्डारी, केशव दुलालसहितको गिरोहले सयौँ व्यक्तिबाट करोडौँ रकम असुलिसकेको थियो ।

पीडितले दुलालसहितको टोलीलाई लामो समयसम्म अमेरिका पठाउन नसकेको भन्दै दबाब दिन थालिसकेका थिए । सोही दबाबका कारण विचौलिया गिरोहले खाँणलाई समेत प्रभावमा पारेर भुटानी शरणार्थीसम्बन्धी प्रतिवेदन हतारहतार तयार पार्न खोजेका थिए ।

विचौलियाकै प्रभावमा परेर खाँण मन्त्री भएको छोटो समयमै १४ असोज २०७८ मा गृहसचिवस्तरीय निर्णयबाट झापाका सहायक सीडीओको अध्यक्षतामा छुट शरणार्थीको विषयमा अध्ययन गर्न भन्दै अर्काे समिति गठन भयो । सहायक सीडीओको समितिले गृहमन्त्री थापाकै पालामा बनेको पूर्वसहसचिव बालकृष्ण पन्थीको कार्यदलले तयार पारेको प्रतिवेदनमा थप नेपालीलाई नक्कली भुटानी बनाएर प्रतिवेदनमा नाम समेट्यो । त्योबापत विचौलियाहरूले थप रकम उठाएको देखिएको छ ।

उक्त प्रतिवेदनअनुसार नै मन्त्री खाँणले मन्त्रिपरिषद्‌मै प्रस्ताव लगेर पारित गराएका थिए । १३ मंसिर २०७८ मा शेरबहादुर देउवा नेतृत्वको सरकारले विचौलिया गिरोहलाई फाइदा हुने गरी शरणार्थीलाई स्वैच्छिक स्वदेश फिर्ताका लागि कूटनीतिक पहल गर्ने तथा तेस्रो देश पुनर्स्थापनाका लागि परराष्ट्र मन्त्रालयमार्फत् विकास साझेदार राष्ट्रहरू र अन्तर्राष्ट्रिय संस्थालाई अनुरोध गर्नेलगायतका निर्णय गरेको थियो  ।

सो निर्णय मन्त्रिपरिषषद्‌बाट पारित भएको केही दिनमै मन्त्रिपरिषद्को निर्णय कार्यान्वयन गर्न जिल्ला प्रशासन कार्यालय झापा र मोरङलाई पत्राचार गरेको देखिएको छ । तर, लामो समयसम्म विभिन्न बहानामा आफूहरू अमेरिका जान नपाएको र ठगिएको आशंका गर्दै केही पीडित प्रहरीमा उजुरी दिन पुगेपछि घटना सार्वजनिक भएको हो ।

हालसम्म २ सय जनाले प्रहरीमा उजुरी दिएका छन् । उनीहरूले पीडितबाट १ अर्बभन्दा बढी रकम उठाएको आशंका प्रहरीको छ । पीडितको संख्या अझै थपिने अनुमान प्रहरीको छ ।

को कहिले पक्राउ परे ?

नेपाली कांग्रेसका पूर्वसांसद आङटावा शेर्पा- १ जेठ २०८०
एमालेका निलम्बित सचिव एवं पूर्वउपप्रधानमन्त्री टोपबहादुर रायमाझी-३१ वैशाख २०८०
नेपाली कांग्रेस नेता तथा पूर्वगृहमन्त्री बालकृष्ण खाँण- २७ वैशाख २०८०
पूर्वगृहमन्त्री बालकृष्ण खाँणका निजी सचिव नरेन्द्र केसी- २७ वैशाख २०८०
विचौलिया गोविन्द चौधरी- २६ वैशाख २०८०
विचौलिया रामशरण केसी- २६ वैशाख २०८०
पूर्वप्रधानमन्त्री टोपबहादुर रायमाझीका छोरा सन्दीप रायमाझी-२० वैशाख २०८०
सचिव एवं पूर्वगृहसचिव टेकनाराण पाण्डे- २० वैशाख २०८०
पूर्वगृहमन्त्री रामबहादुर थापाका सुरक्षा सल्लाहकार इन्द्रजित राई- १९ वैशाख २०८०
विचौलिया सन्दीप शर्मा- २९ चैत २०७९
विचौलिया सागर राई- १६ चैत २०७९
मुख्य योजनाकार विचौलिया केशव दुलाल- २१ चैत २०७९
योजनाकार विचौलिया सानु भण्डारी- २१ चैत २०७९
विचौलिया टंक गुरुङ- २१ चैत २०७९

को-को छन् अझै फरार ?

पूर्वगृहमन्त्री बालकृष्ण खाँणका श्रीमती मञ्जु खाँण- सम्पर्कविहीन
ईन्द्रजित राईका छोरा निरज राई- फरार
पूर्वगृहमन्त्री राबहादुर थापाका छोरा प्रतिक थापा-फरार
केशव तुलाधर- फरार
हरिभक्त महर्जन- फरार
लक्ष्मी महर्जन- फरार

प्रहरीले पक्राउ नपरेकालाई फरार प्रतिवादी र थप केहीलाई बाँकी प्रमाण संकलन भएको अवस्था पुनः मुद्दा चलाइने गरेर प्रतिवेदन बुझाउन लागेको हो । आरोपीले दिएको बयानका आधारमा पक्राउ गुर्नपर्ने प्रमाण नदेखिएका हाइप्रोफाइल केही आरोपीमाथि समेत प्रहरीले सम्पत्ति शुद्धीकरणको छानबिनका लागि विभागलाई पत्राचार गर्ने तयारी गरेको छ ।

यी पनि पढ्नुस् :

प्रहरीको टाउको दुखाइ बनेका रायमाझी दिल्लीबाट गिरफ्तारी दिन शुक्रबार छिरेका थिए नेपाल

यसरी पटाक्षेप भएको थियो नक्कली शरणार्थी प्रकरण, थप को–कोमाथिको प्रमाण जुटाउँदैछ प्रहरी ?

सचिव पाण्डेबाट प्रहरीले पाएको त्यो प्रमाण, जसले पूर्वगृहमन्त्री खाँणलाई हिरासतमा पुर्‍यायो

निवासमा चुकुल लगाएर बसेका थिए खाँण, प्रहरीमाथि हातपातमा उत्रेपछि तनाव

अख्तियार प्रमुख राईसम्म पनि रकम पुर्‍याएको आरोपीको बयान, प्रमाण जुटाउँदै प्रहरी

पक्राउ पर्ने डरले खरिद गरेको ६ करोडको घर छाडेर रिसोर्टमा बस्न थालेका थिए पाण्डे, यसरी परे प्रहरी फन्दामा

नक्कली भुटानी शरणार्थी प्रकरण : हाई प्रोफाइलतर्फ मोडिँदै अनुसन्धान, इन्द्रजितपछि को–को पर्लान् पक्राउ ?

नक्कली भुटानी शरणार्थी प्रकरण : कसरी पुग्यो गृहमन्त्रालयको गोप्य प्रतिवेदन ठगी गर्ने गिरोहसम्म, पूर्वगृहसचिव नै शंकाको घेरामा

यसरी बनाइएको थियो अमेरिका लैजान नक्कली शरणार्थी, शंकाको घेरामा गृहका कर्मचारीदेखि नेतासम्म

प्रकाशित मिति: मंगलबार, जेठ २, २०८० १९:५८