नक्कली भुटानी शरणार्थी प्रकरण : कसरी पुग्यो गृहमन्त्रालयको गोप्य प्रतिवेदन ठगी गर्ने गिरोहसम्म, पूर्वगृहसचिव नै शंकाको घेरामा

नक्कली भुटानी शरणार्थी प्रकरण : कसरी पुग्यो गृहमन्त्रालयको गोप्य प्रतिवेदन ठगी गर्ने गिरोहसम्म, पूर्वगृहसचिव नै शंकाको घेरामा

A+ A A-

गृह मन्त्रालयका पूर्वसविच प्रेम राई, महेश्वर न्यौपाने र टेकनारायण पाण्डेको पालामा भुटानी शरणार्थीका नाममा नेपालीको नक्कली परिचयपत्र बनेको खुलेको छ ।

भुटानी शरणार्थीसम्बन्धी समस्याको स्थायी समाधान पहिल्याउन सरकारी कार्यदलले तयार पारेको गोप्य प्रतिवेदनमा नक्कली अनुसूची घुसाउँदै नेपालीलाई शरणार्थी बनाएको खुलेको हो । उक्त प्रतिवेदन गृह मन्त्रालयका पूर्वसहसचिव बालकृष्ण पन्थीको संयोजकत्वमा गठित समितिले २०७६ सालमा तयार पारेको थियो । कार्यदलमा गणेशबहादुर केसी विज्ञ सदस्यका रूपमा थिए भने गृह मन्त्रालयकै शाखा अधिकृत दीपकप्रसाद न्यौपाने सदस्य सचिव थिए । सरकारले तीन महिनाको समयसीमा तोकेर गठन भएको कार्यदलले २०७६ असारमा गृह मन्त्रालयमा प्रतिवेदन बुझाएकाे थियाे ।

उक्त प्रतिवेदन अझै सार्वजनिक छैन । तर, ठगी गर्ने गिरोहले त्यही प्रतिवेदन हात पारेर नेपालीलाई नक्कली शरणार्थी बनाएको प्रहरीको दाबी छ । कार्यदलले प्रतिवेदन गृहमन्त्रालय बुझाउँदा गृहसचिवमा प्रेम राई (हाल अख्तियार प्रमुख) थिए । राई २७ चैत २०७४ देखि २० माघ २०७६ सम्म गृहसचिवमा थिए । उनीपछिका गृहसचिव महेश्वर न्यौपाने २१ माघ २०७६ देखि २७ साउन २०७८ सम्म रहे । हाल उनले अवकाश पाइसकेका छन् ।

न्यौपानेपछि गृहसचिवमा टेकनारायण पाण्डे पुगे । उनी २७ साउन २०७८ देखि २ असोज २०७९ सम्म बसेका थिए । पाण्डे हाल उपराष्ट्रपति कार्यालयमा कार्यरत छन् ।

यी तीन सचिव रहेकाे समयमा ठगी गिराेहले काम गरेकाे देखिएकाे छ । भुटानी शरणार्थीका नाममा परिचयपत्र बनाएर नेपालीलाई अमेरिका पठाउने भन्दै ठगी गर्ने गिरोहका सदस्यहरू धमाधम पक्राउ पर्न थालेपछि सो तथ्य फेला परेको हो । पूर्वगृहसचिव महेश्वर न्यौपाने आफ्नो कार्यकालमा शरणार्थीसम्बन्धी कुनै काम नभएको दाबी गर्छन् ।

‘मेरो कार्यकालमा शरणार्थीबारे केही कामअघि बढेको छैन् । म हुनपूर्व नै शरणार्थीबारेको प्रस्ताव मन्त्रिपरिषद्‍मा पुगेको र त्यसले नै केही निर्णय नगरेपछि मैले प्रमाणीकरणदेखि अरु केही काम गर्नु परेन । यसमा मेरो केही भूमिका छैन्,’ न्यौपानेले भने ।

यसबारे शिलापत्रले पूर्वसचिव पाण्डे र अख्यितार प्रमुख प्रेम राईसँग पनि प्रतिक्रिया लिन खोजेकाे थियाे । तर, दुवैकाे माेबाईल फोन रिसिभ नहुँदा सम्पर्क हुन सकेन ।

यसरी ठगी गर्ने गिरोहले गृह मन्त्रालयका कर्मचारीदेखि सचिवसम्मै प्रभाव पारेको दाबी अनुसन्धानमा संलग्न प्रहरी अधिकारीकाे छ । हालसम्म प्रहरीको अपराध अनुसन्धान कार्यालयको टोलीले चार जनालाई पक्राउ गरिसकेकाे छ । पक्राउ परेकाहरूले बयानका क्रममा केही सचिवको नामसमेत पोलेका छन् ।

१३ चैतमा पहिलोपटक तीन जनालाई पक्राउ गरेको प्रहरीले त्यसको तीन दिनपछि १६ चैतमा थप एक जनालाई पक्राउ गरेको थियो । पक्राउ पर्नेहरूमा मोरङ पथरीका केशवप्रसाद दुलाल, ललितपुर महालक्ष्मी–४ का सानु भण्डारी र पाँचथर फिदिमका टंककुमार गुरुङ र मोरङ पथरी–१० का सागर राई छन् ।

पक्राउ परेकामाथि प्रहरीले ठगी मुद्दा चलाउने गरी अनुसन्धान गरिरहेको छ । अपराध अनुसन्धान कार्यालयका प्रमुख एसएसपी मनोज केसीका अनुसार, हालसम्म उनीहरूले एक सय ४६ जना नेपालीलाई नक्कली भुटानी शरणार्थीका नाममा परिचयपत्र बनाएर ठगी गरेको खुलेको छ ।

पक्राउ परेका दुलालसहितको समूहले करिब पाँचसय नेपालीलाई भुटानी शरणार्थीको परिचय पत्र बनाएर अमेरिका पठाउने भन्दै ठगी गरेको प्रहरीको दाबी छ । उनीहरूले करिब एक अर्व रुपैयाँभन्दा बढी रकम उठाएको आशंका प्रहरीको छ । यसरी गिरोह नै सक्रिय बनाउने मुख्य भूमिकामा मोरङ पथरीका केशवप्रसाद दुलाल देखिएका छन् । पीडितहरूबाट रकम असुली गर्ने काममा दाङका सन्देश पोखरेल शर्मा पनि संलग्न भएको खुलेको छ । हाल शर्मा फरार छन् ।

बयानमा असहयोग

प्रहरीले पक्राउ गरेका चार जनामाथिको बयान तीव्र पारेको छ । उनीहरूले नेपालीलाई भुटानी शरणार्थीका नाममा ठगी गरेको स्वीकार गरे पनि गोप्य प्रतिवेदन कसरी प्राप्त गरे भन्ने उनीहरूले मुख खोलेका छैनन् ।

पक्राउ परेकामध्ये सानु भण्डारीले यसरी ठगी कार्यमा आफूहरू मात्रै संलग्न नरहेको दाबी गरेका छन् । उनले प्रहरीसँगको बयानमा भनेका छन्, ‘यो काम हामीले मात्रै गरेका होइनौँ । माथिल्ला तहका कर्मचारीसमेत छन् । हामी आवश्यक ठाउँमा पुगेपछि सबै कुरा भन्छौँ । केही प्रमाण हामीसँग छ ।’

भण्डारीले घटनाबारे आफूहरू पक्राउ गर्नुअघि नै सत्यतथ्य छानबिनका लागि माग गर्दै अख्तियार दुरुपयोग अनुसन्धान आयोगमा समेत उजुरी दिएको दाबी गरेका छन् । प्रहरीको दाबीअनुसार पनि गृह मन्त्रालयकै उपल्लो तहका कर्मचारीको संलग्नता विना उनीहरूले उक्त प्रतिवेदन प्राप्त गर्न कठिन हुने देखिन्छ ।

अनुसन्धानमा संलग्न एक प्रहरी अधिकारीले भने, ‘यो ठगी प्रकरणमा एउटा गिरोह नै सक्रिय देखिन्छ । केही राजनीतिक दलका नेतादेखि गृहकै कर्मचारीको मिलेमतोको आशंका छ । तर, पक्राउ परेकाहरूले बयान दिन अस्वीकार गर्दै आएका छन् ।’

बयानमा असहयोग गरेपछि उनीहरूमाथि पोलिग्राफ टेस्ट गर्नेदेखि मोबाइल फोन परीक्षणका लागि प्रहरी प्रधान कार्यालयकाे डिजिटल फरेन्सिक ल्याबमा पठाउने तयारी प्रहरीको छ ।

प्रहरीले सरकारी वकिल कर्यालयसँगको रायअनुसार संगठित अपराध मुद्दामा अनुसन्धान गर्नुपर्ने माग राखेको छ । उनीहरूले चार सय नेपालीलाई भुटानी शरणार्थी बनाउने भन्दै ठगी कार्य थालेको प्रहरीको दाबी छ ।

यसमध्ये ठूलो संख्यालाई उनीहरूले शरणार्थी परिचयपत्रसमेत उपलब्ध गराइसकेका छन् । परिचयपत्र उपलब्ध भएकाहरूको कार्ड नक्कली हो या सक्कली नै भन्नेबारे प्रहरीले राष्ट्रसंघीय शरणार्थी आयोग (यूएनएचसीआर) सँगसमेत जानकारी लिने तयारी गरेको छ ।

याे पनि पढ्नुहाेस्

प्रकाशित मिति: सोमबार, चैत २०, २०७९ १४:३६

कृष्णसिंह लाेथ्याल

प्रतिक्रिया दिनुहोस्

भर्खरै

उपनिर्वाचन: इलाम-२ र बझाङमा आज मतदान हुँदै

पार्टी सङ्गठनलाई केन्द्रमा राखेर काम गर्न कांग्रेस प्रवक्ता महतको आग्रह

सुर्खेतको बुलबुले तालमा अब मोटरबोट सेवा

माेटरसाइकल दुर्घटनामा श्रीमानकाे मृत्यु, श्रीमती गम्भीर घाइते

मनाङेलाई सलामी : विकृत बाटोमा लम्किएको राजनीति

लोकप्रिय

सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

बुद्धनगरमा कांग्रेस–एमालेका चार नेताकाे वार्ता, बालकाेट पुग्दासम्म गगन थापा निराश

२५ अर्ब किलोमिटर टाढाबाट आयो पृथ्वीमा सन्देश, उत्साहित भए नासाका वैज्ञानिक

प्रचण्ड सरकारमा सहभागी हुँदै नाउपा, रञ्जितानिकट चौधरी मन्त्री बन्ने

विचार

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

तीन जनाको मुट्ठीमा ३ करोड जनताको लोकतन्त्र

बीसौँ शताब्दीका प्रभावशाली नेता लेनिन (भिडियो)

ब्लग

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

एक जनमुखी प्रधानपञ्चको नाममा

शिक्षा

कक्षा १२ को परीक्षा आजदेखि, तीन लाख ९० हजार परीक्षार्थी सहभागी हुँदै

बालेनको प्रयाससँगै काठमाडौंका सामुदायिक विद्यालयमा आकर्षण, गुणस्तर धान्न भने चुनौती

डीएभी विद्यालयमा राग र तालमिश्रित सांस्कृतिक कार्यक्रम ‘तरङ्ग’ सम्पन्न