प्रहरीको टाउको दुखाइ बनेका रायमाझी दिल्लीबाट गिरफ्तारी दिन शुक्रबार छिरेका थिए नेपाल

प्रहरीको टाउको दुखाइ बनेका रायमाझी दिल्लीबाट गिरफ्तारी दिन शुक्रबार छिरेका थिए नेपाल

A+ A A-

एमालेका निलम्बित सचिव तथा पूर्वउपप्रधानमन्त्री टोपबहादुर रायमाझीलाई थुनामा राखेर अनुसन्धान गर्न प्रहरीले अनुमति पाएको छ । जिल्ला अदालत काठमाडौंका न्यायाधीश केशवप्रसाद अधिकारीको इजलासले रायमाझीलाई तीन दिन हिरासतमा राखेर अनुसन्धान गर्न प्रहरीलाई अनुमति दिएको हो ।

नेपालीलाई नक्कली भुटानी शरणार्थी बनाएर अमेरिका पठाउने प्रकरणमा रायमाझीको संलग्नता देखिएपछि अदालतले २० वैशाखमा प्रहरीलाई पक्राउ पुर्जी दिएको थियो ।

अदालतले पक्राउ पुर्जी जारी गरेपछि सुरुमा रायमाझीले आफू निर्दोष रहेको प्रतिक्रिया दिएका थिए । सो प्रकरणबारे उनले आफैँ प्रहरी प्रमुख आईजीपी वसन्त कुँवरलाई फोन गरेर २१ वैशाखमा प्रहरी कार्यालयमा हाजिर हुने प्रतिबद्धतासमेत गरे ।

तर, आफ्नै प्रतिबद्धताविपरीत उनी २० वैशाखको साँझदेखि नै प्रहरीको सम्पर्कबाट हराए । भैरहवाबाट काठमाडौं आउन लागेको विमानको टिकटसमेत रद्द गरेर उनी फरार भए ।

योबीचमा प्रहरीले उनलाई खोज्न हम्मेहम्मे नै पर्‍यो । उता सोही प्रकरणमा नेपाली कांग्रेसका नेता तथा पूर्वगृहमन्त्री बालकृष्ण खाँणको संलग्नता देखिएपछि प्रहरीले २७ वैशाखमा जरुरी पक्राउ पुर्जी थमाउँदै खाँणलाई उनकै निवास मैजुबहालबाट पक्राउ गर्‍यो ।

तर, प्रहरीको टाउको दुखाइको विषय रायमाझी बने । रायमाझीलाई पक्राउ गर्न गृहमन्त्री नारायणकाजी श्रेष्ठको प्रहरी प्रमुखलाई चर्को दबाबसमेत थियो ।

रायमाझीको खोजीका लागि गृहमन्त्री श्रेष्ठले आईजीपी कुँवरसहित प्रहरीको केन्द्रीय अनुसन्धान ब्युरो (सीआईबी), उपत्यका अपराध अनुसन्धान कार्यालय र काठमाडौं प्रहरी प्रमुखसँग पटक–पटक छलफलसमेत गरे ।

रायमाझी खोज्न सीआईबीको टोली भारतको दिल्ली नै पुग्यो ।

कसरी पुगे काठमाडौं ?

प्रहरीको टोलीले धुइँपत्ताल खोज्दा पनि १० दिनसम्म पक्राउ गर्न नसकेको रायमाझीलाई आइतबार राति भने प्रहरीले काठमाडौंको बूढानीलकण्ठबाट पक्राउ गरेको दाबी गर्‍यो ।

तर, एमाले नेता महेश बस्नेतले रायमाझी एमालेले गरेको आदेश पालना गर्दै प्रहरीसम्म पुगेको बताएका छन् ।

उनले फेसबुकमा लेखेका छन्, ‘प्रहरी अनुसन्धानलाई सहयोग गर्न एमालेले गरेको आदेश पालना गर्दै टोपबहादुर रायमाझी प्रहरीसामु पुग्नुभएको छ । नेपाल प्रहरीलाई निष्पक्ष छानबिन गरी सम्पूर्ण अपराधीहरूलाई कारबाहीको दायरामा ल्याउन अनुरोध छ ।’

अनुुसन्धानमा खटिएका एक प्रहरी अधिकारीले पनि रायमाझी बिहीबारसम्म दिल्लीको नोयडामा रहेको बताए ।

‘रायमाझी दिल्ली रहेको सूचना प्रहरी प्रमुखसम्म पुगेको थियो । त्यहीँ भएर पनि एउटा टोलीलाई दिल्लीसम्म पठाएको हो । तर, उनी शुक्रबार बिहान दिल्लीबाट नेपाल फर्किए,’ प्रहरी उच्च स्रोतले भन्यो ।

त्यसअघि दिल्लीबाट पक्राउ गर्न सहयोग गरिदिन आईजीपी कुवँर आफैँले नेपालस्थित भारतीय दूतावासका अधिकारीलाई आग्रहसमेत गरेका थिए । प्रहरी स्रोतका अनुसार शनिबार भने रायमाझी प्रहरीलाई आफैँ गिरफ्तारी दिन काठमाडौं आइपुगेका हुन् ।

अनुसन्धानमा संलग्न एक प्रहरी अधिकारीका अनुसार प्रहरीले चौतर्फी खोजेपछि रायमाझीलाई लामो समय भाग्न सकिँदैन भन्ने लागेको हुन सक्छ, अर्को कुरा पार्टीको दबाबले पनि उनले आफैँ गिरफ्तारी दिएका हुन सक्छन् ।

आइतबार रायमाझी आफैँले प्रहरीका उच्च अधिकारीलाई सम्पर्क गरेर काठमाडौंमा रहेको जानकारी दिँदै गिरफ्तारी दिएको बताए । आइतबार प्रहरीको सम्पर्कमा पुगेका रायमाझीमा आफ्नो संलग्नताबारे प्रहरीलाई चुनौती दिँदै आफू निर्दोष रहेको दाबी गरेका थिए ।

उनलाई प्रहरीले आइतबारदेखि प्रहरी वृत्त सोह्रखुट्टेको एक थुना कक्षमा एक्लै राखेर अनुुसन्धान अघि बढाएको छ । नेपालीलाई नक्कली भुटानी शरणार्थी बनाएर पठाउने गिरोहमा संलग्न तेस्रो हाई प्रोफाइल व्यक्ति हुन् ।

यसअघि नै प्रहरीले पूर्वगृहमन्त्री खाँणसहित बहालवाला एवं पूर्वसचिव टेकनारायण पाण्डेसहित १३ जनालाई पक्राउ गरिसकेको छ । केही अझै फरार छन् ।

प्रकाशित मिति: सोमबार, जेठ १, २०८० १८:३०