उपनिर्वाचन जिताउन एमालेले तोक्यो तीन कमाण्डर, ओली पनि जाने

A+ A A-

आउँदो १० बैशाखमा हुने उपनिर्वाचनका लागि प्रमुख प्रतिपक्षी दल एमालेले चुनावी कमाण्डर तोकेको छ । बारा २ मा वरिष्ठ उपाध्यक्ष ईश्वर पोखरेल, चितवन २ मा उपाध्यक्ष सुरेन्द्र पाण्डे र तनहुँ १ मा अर्का उपाध्यक्ष युवराज ज्ञवाली कमाण्डर तोकिएका हुन् ।

एमालेले मिसन ग्रासरुटमा खटिएका शीर्ष नेताहरूलाई नै चुनावी परिचालनको नेतृत्व दिएको हो । ‘मिसन ग्रासरुट अभियानमा खटिएकै कमरेडहरूलाई सम्बन्धित जिल्लाको चुनावी कमाण्ड हाँक्नेगरी जिम्मेवारी दिइएको छ’, एमाले उपमहासचिव विष्णु रिमालले भने । मिसन ग्रासरुटमा खटिएका स्थायी कमिटी, पोलिटब्यूरो र केन्द्रीय सदस्यहरूले चुनावी अभियानको नेतृत्व गर्ने उनले बताए ।

उपनिर्वाचन हुने तीनवटै क्षेत्रमा अध्यक्ष केपी शर्मा ओली पनि जाने एमालेले जनाएको छ । बारा २ फिल्ड कमाण्ड वरिष्ठ उपाध्यक्ष ईश्वर पोखरेल र सचिव रघुवीर महासेठले हाँक्नेछन् । मधेश प्रदेशको मिसन ग्रासरुटको अनुगमनकर्ताका रुपमा पोखरेल मधेशमै छन् । महासेठ मधेश इन्चार्ज हुन् । एमालेले बारामा पोलिटब्यूरो सदस्य पुरुषोत्तम पौडेललाई उम्मेदवार बनाएको छ ।

त्यस्तै चितवन २ जिताउने जिम्मा बागमती प्रदेशका अनुगमनकर्ता उपाध्यक्ष सुरेन्द्र पाण्डेले पाएका छन् । उनीसँगै सचिव गोकर्ण विष्ट र पोलिटब्यूरो सदस्य गोकुल बास्कोटा चितवनमा खटिएका छन् । अघिल्लो निर्वाचनमा चितवन ३ बाट सर्वसम्मत सिफारिस भएर पनि नउठेका एमाले जिल्ला अध्यक्ष रामप्रसाद न्यौपाने त्यहाँ उम्मेदवार छन् ।

यसैगरी तनहुँ १ को चुनावी कमाण्ड उपाध्यक्ष युवराज ज्ञवालीले हाँक्नेछन् । उनी गण्डकीका अनुगमनकर्ता शीर्ष नेता हुन् । उनीसँगै सचिव पद्मा अर्यालले सो निर्वाचन क्षेत्रको चुनावी परिचालनको कमाण्ड हाँक्ने भएकी छिन् । तनहुँ १ मा उपमहासचिव पृथ्वीसुब्बा गुरुङ र अर्का नेता किरण गुरुङ पनि खटिएका छन् ।