१९८१ ले इन्जिनियर लाइसेन्स परीक्षा दिएकोमा ५६५ मात्रै पास

A+ A A-

इन्जिनियर लाइसेन्स परीक्षामा ५६५ जना पास भएका छन् । मंगलबार इन्जिनियरिङ काउन्सिलले पत्रकार सम्मेलन गरी यसबारेमा जानकारी गराएको हो ।

परीक्षामा सहभागी भएका १९८१ जनामध्ये ५६५ जना परीक्षार्थीहरू मात्रै पास भएको काउन्सिलका अध्यक्ष पदम साहीले बताए । परीक्षा चैत १३ र १४ गते लिएको र त्यसमा साढे २८ प्रतिशत मात्रै उत्तीर्ण भएको साहीको भनाइ छ ।

उनले इन्जिनियरसम्बन्धी २० विधामा परीक्षा भएको जानकारी दिए । इन्जिनियरिङ काउन्सिलले पहिलोपटक इन्जिनियर व्यवसाय दर्ता हुनका लागि लाइसेन्स परीक्षा लिन सुरु गरेको हो । उत्तीर्ण नहुनेले काउन्सिलको प्रमाणपत्र नपाउने र नेपालभर इन्जिनियरका रूपमा काम गर्न नपाउने काउन्सिलले बताएको छ ।

‘इन्जिनियरिङ काम गर्नका लागि इन्जिनियरहरूले लाइसेन्स दर्ता गर्नुपर्छ । त्यही लाइसेन्सका लागि हामीले यही १२ र १३ गते परीक्षा लिएका थियौँ । यसमा १९८१ जना विद्यार्थीहरू उपस्थित रहेकोमा ५६५ जना मात्र पास हुनुभएको छ,' शाहीले भने, 'त्यसमध्ये धेरैजसो २० वटा विधामा जाँच भएकोमा सबैभन्दा धेरै सिभिल इन्जिनियरिङमा ११५३ जना हुनुहुन्थ्यो । उत्तीर्णाङ्क ५० प्रतिशत रहेको परीक्षाको यो नतिजा करिब २८ प्रतिशत मात्रै हो ।’

लाइसेन्स परीक्षामा उत्तीर्ण भएका इन्जिनियरहरूले इन्जिनियर व्यवसाय वा पेसा गर्नका लागि काउन्सिलमा दर्ता हुनुपर्ने भएकाले लाइसेन्सका लागि परीक्षा सुरु गरेको अध्यक्ष शाहीले बताए । इन्जिनियरिङ काउन्सिलले विगतमा इन्जिनियर पढ्ने विद्यार्थीहरूको परीक्षा लिने गरेको थिएन ।

काउन्सिलले विश्वविद्यालयबाट इन्जिनियरिङ उत्तीर्ण प्रमाणपत्रका आधारमा परीक्षाबिना लाइसेन्स दिएर इन्जिनियरको रूपमा काम गरिरहेका थिए । तर, अब इन्जिनियरिङसम्बन्धी कुनै पनि व्यवसाय गर्नका लागि काउन्सिलको परीक्षा उत्तीर्ण भएर अनुमति पाएपछि मात्रै काम गर्न पाउने नियम लागू भएको छ ।

प्रकाशित मिति: मंगलबार, चैत १४, २०७९ १४:४७