अमेरिकाको विरोध गर्दै उत्तर कोरियाले हान्यो दुई ब्यालिस्टिक क्षेप्यास्त्र, किमलाई छैन कसैको डर

अमेरिकाको विरोध गर्दै उत्तर कोरियाले हान्यो दुई ब्यालिस्टिक क्षेप्यास्त्र, किमलाई छैन कसैको डर

सर्वोच्च नेता किम जोङ उन ।

A+ A A-

उत्तर कोरियाले फेरि दुईवटा ब्यालिस्टिक क्षेप्यास्त्र परीक्षण गरेको छ ।

अमेरिका र दक्षिण कोरियाको संयुक्त युद्ध अभ्यासको विरोध गर्दै उत्तरले सोमबार बिहानै दुईवटा क्षेप्यास्त्र हानेको अलजजिराले जनाएको छ । दक्षिण कोरियाको जोइन्ट चिफ्स अफ स्टाफ जेएससीका अनुसार उत्तर कोरियाले स्थानीय समयअनुसार सोमबार बिहान ८ बजे ह्वाङही प्रान्तबाट क्षेप्यास्त्र हानेको थियो ।

संयुक्त राष्ट्रसंघ सुरक्षा परिषद्‌का प्रस्तावहरूलाई उल्लंघन गर्दै उत्तर कोरियाले ब्यालिस्टिक क्षेप्यास्त्र हानेको दक्षिण कोरियाको भनाइ छ । दक्षिण कोरियाको सेना प्रमुखहरूको समूह जेएससीले भनेको छ, ‘हामीले उत्तर कोरियाका विभिन्न गतिविधिहरूलाई नजिकबाटै नियालिरहेका छौँ । उनीहरूका कुनै पनि उत्तेजक कार्यलाई हामी जवाफ दिन सक्ने क्षमता कायम राख्नेछौँ ।’

जापान सरकारले पनि उत्तर कोरियाको क्षेप्यास्त्र परीक्षण पुष्टि गर्दै आफ्नो विशेष आर्थिक क्षेत्रभन्दा बाहिर सो क्षेप्यास्त्र खसेको जनाएको छ । छिमेकी देश उत्तरको क्षेप्यास्त्र प्रक्षेपणले जापान र अन्तर्राष्ट्रिय समुदायको सुरक्षा र शान्तिलाई खतरामा पारेको भन्दै टोकियोले यस कार्यको कडा विरोध जनाएको छ ।

यसै महिना मार्च १३ देखि २३ सम्म दक्षिण कोरिया र अमेरिकाले संयुक्त रूपमा युद्ध अभ्यास गरेका थिए । उत्तर कोरियाले यी दुई राष्ट्रले आफूलाई आक्रमण गर्ने योजनाको रूपमा सो अभ्यास गरेको बताउँदै क्षेप्यास्त्र कार्यक्रमलाई तीव्रता दिएको थियो ।

यस वर्ष मात्र उत्तर कोरियाले २० वटा ब्यालिस्टिक क्षेप्यास्त्र परीक्षण गरिसकेको छ । संयुक्त राष्ट्रसंघबाट प्रतिबन्धित आणविक क्षेप्यास्त्रको अन्तरमहादेशीय क्षेप्यास्त्र, ब्यालिस्टिक क्षेप्यास्त्र तथा ड्रोन हतियार उत्तरले यो वर्ष परीक्षण गरिरहेको छ ।

उत्तर कोरियाले आफूसँग आणविक हतियार भएर मात्र अमेरिका चुप बसेको बताउने गर्छ । अमेरिकालाई सन्तुलनमा राख्न क्षेप्यास्त्र कार्यक्रमको खाँचो भएको त्यहाँका सर्वोच्च नेता किम जोङ उन बताउने गर्छन् ।

प्रकाशित मिति: सोमबार, चैत १३, २०७९ १२:२३