विश्वकप छनोटमा पुगेपछि राष्ट्रिय क्रिकेट टिमलाई पुरस्कारै पुरस्कार

A+ A A-

आईसीसी विश्वकप क्रिकेट लिग २ मा तेस्रो स्थानमा रहँदै नेपाल विश्वकप छनोटमा प्रवेश गरेपछि संघीय सरकारदेखि स्थानीय सरकारसम्मले पुरस्कारको घोषणा गरेका छन् । लिगको अन्तिम खेलमा बिहीबार घरेलु मैदान कीर्तिपुरमा नेपालले यूएईलाई पराजित गर्दै जिम्बाब्बेमा हुने विश्वकप छनोटका लागि स्थान पक्का गरेको थियो ।

लिगका पछिल्ला १२ खेलमा ११ जित निकाल्दै नेपाल अविश्वसनीय प्रदर्शन गरेर विश्वकप छनोटमा पुगेको हो । नेपाललाई विश्वकप छनोटसम्म पुर्‍याएर नेपालको गौरव बढाएपछि नेपाली राष्ट्रिय क्रिकेट टिम र प्रमुख प्रशिक्षकले बधाई पाइरहेका छन् । राष्ट्रपति रामचन्द्र पौडेल र प्रधानमन्त्री पुष्पकमल दाहाल प्रचण्डले त उनीहरूलाई भेटेरै बधाई दिएका छन् । विभिन्न राजनीतिक दलका नेता, कलाकार र सर्वसाधारणलेसमेत खेलाडीहरूलाई बधाई दिएका छन् ।

बधाईसँगै खेलाडीलाई नगद पुरस्कार पनि घोषणा गरिएको छ । संघीय सरकारले टिमका प्रत्येक सदस्यलाई ३ लाख रुपैयाँका दरले नगद पुरस्कार दिने घोषणा गरेको छ । शुक्रबार बिहान टिमलाई भेटेर प्रधानमन्त्री प्रचण्डले जनही ३ लाख रुपैयाँ पुरस्कार दिने घोषणा मात्र गरेनन्, रंगशाला निर्माणका लागि पहल गर्ने प्रतिबद्धता पनि गरे ।

यस्तै, बागमती सरकारले पनि जनही १/१ लाख नगद पुरस्कार दिने घोषणा गरेको छ । उता मधेस सरकारले भने सो प्रदेशबाट राष्ट्रिय टिममा प्रतिनिधित्व गरी बिहीबारको खेलमा नेपाललाई जिताउन महत्त्वपूर्ण भूमिका खेल्ने दुई जना खेलाडीलाई २/२ लाख रुपैयाँ नगद पुरस्कार दिने घोषणा गरेको छ । यूएईविरुद्धको खेलमा अर्धशतक बनाएका मो. आरिफ शेख र गुल्सन झालाई २/२ लाख रुपैयाँ पुरस्कार दिने मधेसका मुख्यमन्त्री सरोज यादवले घोषणा गरेका हुन् ।

उता पर्साको वीरगञ्ज निवासी दुई दाजुभाइ मो. आरिफ शेख र आशिफ शेखलाई वीरगञ्ज महानगरपालिकाले एक/एक मोटरसाइल पुरस्कार दिने घोषणा गरेको छ । मेयर राजेशमान सिंहले शुक्रबार सो पुरस्कारको घोषणा गरेका हुन् ।

यस्तै, ओपनर ब्याटर कुशल भुर्तेललाई रुपन्देहीको तिलोत्तमा नगरपालिकाले ५० हजार नगदसहित सम्मान गर्ने भएको छ । बिहीबार यूएईविरुद्धको खेलमा ५० रन बनाएका भुर्तेललाई नगरपालिकाले ५० हजार नगदसहित सम्मान गर्ने भएको हो । उनी तिलोत्तमा ९ निवासी दीपक भुर्तेलका छोरा हुन ।

प्रकाशित मिति: शुक्रबार, चैत ३, २०७९ १८:५०