आचारसंहिता उल्लंघनमा माधव नेपाललाई कारबाही गर्न आयोगले रौतहट प्रहरीलाई पठायो फाइल

आचारसंहिता उल्लंघनमा माधव नेपाललाई कारबाही गर्न आयोगले रौतहट प्रहरीलाई पठायो फाइल

A+ A A-

निर्वाचन आयोगले आचारसंहिता उल्लंघनमा एकीकृत समाजवादीका अध्यक्ष माधवकुमार नेपाललाई आवश्यक अनुसन्धान गरी कारबाही प्रक्रिया अगाडि बढाउन जिल्ला प्रहरी कार्यालय रौतहटलाई फाइल पठाएको छ । अध्यक्ष नेपालले आयोगलाई दिएको स्पष्टीकरणपत्र, सार्वजनिक कार्यक्रमा बोलेको भिडियोसहित समावेश गरेर फाइल रौतहट पठाएको हो ।

‘सबै डकुमेन्ट रौतहट पठाइएको छ । निर्वाचन कसुर ऐनअनुसार अनुसन्धान गरी कारबाही गर्न भनिएको छ,’ आयोग स्रोतले भन्यो । कात्तिक ३ मा रौतहट प्रहरीलाई काटिएको पत्र रोकेर आयोगले अर्को निर्णय गरेको हो । ‘३ गते काटेको पत्र गएन । अर्को निर्णय गरेर फाइल पठाइएको हो,’ स्रोतले भन्यो ।

अध्यक्ष नेपाललाई कारबाही गर्न फाइल पठाउने वा नपठाउने भन्नेमा प्रमुख आयुक्त दिनेश थपलिया र अन्य आयुक्तबीच कुरा नमिल्दा फाइल आयोगमै रोकिएको थियो । आयोग उच्च स्रोतका अनुसार प्रमुख आयुक्त थपलियाको आदेशमा अर्को निर्णय गरेर फाइल रौतहट पठाइएको हो । स्रोतका अनुसार केही आयुक्त उक्त फाइल रौतहट पठाउने निर्णयमा सहमत छैनन् । ‘प्रमुख आयुक्तको आदेशमा फाइल पठाइएको हो,’ आयोग स्रोतले भन्यो ।

पूर्वप्रधानमन्त्रीसमेत रहेका अध्यक्ष नेपालले मतदातालाई फ्रि भिसा फ्रि टिकटमा युवालाई विदेश पठाइदिने भनी प्रलोभन दिएको भन्दै आयोगले स्पष्टीकरण पनि सोधेको थियो । अध्यक्ष नेपालले स्पटीकरणको जवाफ दिएका थिए ।

‘निर्वाचनको सिलसिलामा मैले कुनै उम्मेदवार, मतदाता, निजहरूमध्ये कसैको सरोकार वा स्वार्थ भएको कुनै व्यक्ति, निर्वाचन अधिकृत, निर्वाचनमा संलग्न कुनै कर्मचारीलाई कुनै किसिमको प्रभाव पार्ने कार्य गरेको छैन । कुनै किसिमले लोभ लालच देखाउने वा आर्थिक प्रलोभन देखाउने कुनै काम गरेको छैन । पत्रमा भनिए जस्तो अभिव्यक्ति मैले दिएको छैन,’ अध्यक्ष नेपालले दिएको स्पष्टीकरणमा भनिएको छ ।

आफूविरुद्ध कसैले गलत समाचार र सूचना सम्प्रेषण गरेको हुन सक्ने उनले स्पष्टीकरणमा भनेका छन् । ‘हाम्रो पार्टीले लिएको नीति विचार र कार्यक्रमबाट जनताले हामीलाई गर्ने समर्थन र सहयोगमा प्रतिकूल असर पार्न मेरो विरुद्ध कसैले गलत समाचार र सूचना सम्प्रेषण गरेको हुन सक्दछ । निर्वाचनको स्वतन्त्रता एवम् निष्पक्षतामा प्रतिकूल प्रभाव पार्ने कुनै काम नभएको व्यहोरा प्रष्ट पार्दछु,’ अध्यक्ष नेपालले स्पष्टीकरणमा भनेका छन् ।

अध्यक्ष नेपाल रौतहट १ बाट प्रतिनिधिसभा सदस्यको उम्मेदवार हुन् । उनले चुनाव जिते देश बाहिर युवालाई रोजगारीको अवसर दिने ‘बिना ढेउवा के भिसा मिल्ते हे, टिकट मिल्ते है, काठमाडौंमा तालिम मिल्ते है’ भनी अभिव्यक्ति दिएको भिडियो बाहिरिएपछि आयोगले स्पष्टीकरण र कारबाही प्रक्रिया अगाडि बढाएको थियो । अब उक्त फाइलको अनुसन्धान गरी जिल्ला प्रहरी कार्यालय रौतहटले छिनोफानो गर्नेछ ।

सम्बन्धित समाचार

प्रकाशित मिति: आइतबार, कात्तिक २०, २०७९ २१:३३