प्रचण्डको थप प्रमाण मगाउँदै निर्वाचन आयोग, माधव नेपालको फाइल आयुक्तको ‘च्याम्बर’मा

प्रचण्डको थप प्रमाण मगाउँदै निर्वाचन आयोग, माधव नेपालको फाइल आयुक्तको ‘च्याम्बर’मा

A+ A A-

आचारसंहिता लागू भएको १२ असोजदेखि १६ कात्तिकसम्म निर्वाचन आयोगले ७१ जना व्यक्ति र संस्थालाई स्पष्टीकरण सोधेको छ । तर, स्पष्टीकरणको जवाफप्रति आयोग सन्तुष्ट भने देखिएको छैन ।

बुधबार पत्रकार सम्मेलनमा प्रमुख निर्वाचन आयुक्त दिनेशकुमार थपलियाले व्यंग्य गर्दै भने, ‘अहिले सबै जवाफ भन्न मिल्दैन । निर्वाचन आयोगचाहिँ कुनै आदरणीय व्यक्तिलाई फसाउनको निम्ति त्यस्ता डकुमेन्ट बनाएर सामाजिक सञ्जालमा हालेर हामीलाई सोध्छन् भन्नेजस्ता जवाफ आएका छन् ।’

प्रमुख आयुक्त थपलियाले आचारसंहिता उल्लंघनको सत्य तथ्य प्रमाण पुगेकालाई कारबाही गर्ने चरणमा पुगेको बताए । ‘तथ्य पुगेकोमा कारबाहीको चरणमा छौँ । आयोग नचुकोस् भनेर तथ्य र प्रमाण नपुगेको ठाउँमा थप प्रमाण जुटाउँदै छौँ । देख्ने गरी दण्ड जरिवाना हुन्छ,’ उनले भने ।

कस-कसलाई जरिवाना लगाउन लागिएको हो उनले खुलाउन चाहेनन् । तर, केही दिनभित्रै निर्णय हुने उनले संकेत गरे । ‘भोलि दुई चारवटा होला । पर्सि दुई चारवटा होला । ४ गते अघि सबै कारबाही हुन्छ । ७१ वटाको २५ गते नाघ्दैन,’ उनले भने ।

तस्वीरः सुशील श्रेष्ठ/शिलापत्र

प्रचण्डको आचारसंहिता उल्लंघन प्रकरण : थप प्रमाण जुटाउँदै आयोग

प्रचण्डको बारेमा थप प्रमाण जुटाउँदै आयोग

७१ वटामध्ये हाल १२ जना उम्मेदवारको चित्तबुझ्दो जवाफ नआएपछि आयोगले थप अनुसन्धान गरी प्रमाण जुटाउन सम्बन्धित जिल्ला प्रशासन कार्यालय र मुख्य निर्वाचन कार्यालयलाई आदेश दिएको छ ।

उम्मेदवारहरूले कस्पष्टीकरणको कस्तो-कस्तो जवाफ दिएका छन् त ? पहिलो स्पष्टीकरण आयोगले माओवादी केन्द्रका अध्यक्ष पुष्पकमल दाहाल 'प्रचण्ड'लाई २६ असोजमा सोधेको थियो । अध्यक्ष प्रचण्डले गोरखा २ मा उम्मेदवारी दिन जाँदा आचारसंहिताविपरीत पञ्चेबाजा बजाएर गएको भन्दै आयोगले स्पष्टीकरण सोधेको थियो । प्रचण्डले पञ्चेबाजा बजाएको आफूलाई जानकारीमा नभएको जवाफ आयोगलाई दिएका थिए ।

‘मनोनयन दर्ता गर्ने क्रममा स्थानीयहरू स्वतःस्फुर्त रूपमा उपस्थित भएको हो । सो विषयमा पार्टी र आफूलाई कुनै जानकारी छैन,’ प्रचण्डले स्पष्टीकरणमा भनेका छन् । तर, पञ्चेबाजा बजाएको भिडियो प्रचण्डको फेसबुकबाट नै सार्वजनिक भएको थियो ।

प्रचण्डको जवाफ चित्तबुझ्दो नभएपछि आयोगले यसबारे जिल्ला प्रशासन कार्यालय गोरखा र मुख्य निर्वाचन अधिकृतको कार्यालयलाई लिखित प्रतिवेदन तीन दिनभित्र पेस गर्न आदेश दिएको छ । ‘जिल्लाबाट प्रतिवेदन आएको छैन । प्रतिवेदन आएपछि थप प्रक्रिया अगाडि बढ्छ,’ आयोगका एक अधिकारीले भने ।

माधव नेपालको फाइल आयुक्तको च्याम्बरमा

अर्को पेचिलो बनेको स्पष्टीकरण हो एकीकृत समाजवादीका अध्यक्ष माधवकुमार नेपालको । रौतहट १ को प्रतिनिधिसभा सदस्य उम्मेदवारसमेत रहेका अध्यक्ष नेपालले मतदातालाई फ्रि भिसा फ्रि टिकेटमा युवालाई विदेश पठाइदिने भनी प्रलोभन पारी अभिव्यक्ति दिएको भिडियो सार्वजनिक भएपछि आयोगले स्पष्टीकरण सोधेको थियो ।

साथै आयोगले कारबाही प्रक्रिया अगाडि बढाउन जिल्ला प्रहरी कार्यालय रौतहटलाई पत्र काटेको थियो । उक्त पत्र हालसम्म पनि आयोगमै थन्किएको छ । चलानी भएको पत्र अन्तिम समयमा आयोगले रोकेको थियो । हाल अध्यक्ष नेपालको फाइल आयुक्त रामप्रसाद भण्डारीको च्याम्बरमा पुगेर बसेको छ । आयोग स्रोतका अनुसार अर्को निर्णय गरेर उक्त पत्र निष्क्रिय बनाउने तयारी आयोगको छ ।

स्पष्टीकरणको जवाफ नआउँदै माधव नेपाललाई कारबाही गर्न रौतहट प्रहरीलाई आयोगको निर्देशन

‘अर्को निर्णय गरेर फाइल पठाउने तयारी छ । कारबाहीका लागि थप बलियो बनाएर फाइल पठाउन लागिएको हो,’ आयोग स्रोतले भन्यो । अध्यक्ष नेपालले स्पष्टीकरणको जवाफ दिएपछि आयोगले अर्को फाइल तयार गरेको हो ।

अध्यक्ष नेपालले आफूले कसैलाई पनि प्रभाव पार्ने अभिव्यक्ति नदिएको जवाफ दिएका थिए । ‘मैले कसैलाई प्रभाव पार्ने अभिव्यक्ति दिएको छैन । दलले आफ्नो विचारधारा, दर्शन र कार्यक्रम पेस गर्न पाउने अधिकार संविधानले दिएको छ । सोही अधिकारको प्रयोग गरी आफ्ना कार्यक्रम मतदाता समक्ष पेस गरिएको हो,’ नेपालले दिएको स्पष्टीकरणमा भनिएको छ ।

कारबाही गर्न प्रहरीलाई काटेको पत्र आयोगमै रोकियो, माधव नेपालले बुझाएकाे स्पष्टीकरणमा के छ ?

मन्त्री मेटमणि चौधरी र उमाकान्त चौधरी

शहरी विकासमन्त्री मेटमणि चौधरीको बारेमा पनि आयोगले तीन दिनभित्र प्रतिवेदन पेस गर्न जिल्ला आचारसंहिता अनुगमन समिति, मुख्य निर्वाचन अधिकृत र प्रमुख जिल्ला अधिकारीलाई आदेश दिएको छ । आफ्नो निर्वाचन क्षेत्रका बाढीपीडितको नाममा चामल वितरण गरेको भन्दै आयोगले स्पष्टीकरण सोधेको थियो ।

मन्त्री चधौरीले दिएको जवाफमा भनिएको छ, ‘आचारसंहिताको उल्लङ्घन स्थानीय तहका जनप्रतिनिधिमार्फत एकद्वार प्रणालीबाट राहात वितरणको कार्य गरेको हो । समयमा राहत वितरण गर्नु राज्यलगायत समग्र सबैको जिम्मेवारी हो ।’ यो जवाफबाट आयोग सन्तुष्ट हुन नसकेपछि आयोगले थप प्रतिवेदन पेु गर्न जिल्लाका सम्बन्धित निकायलाई आदेश दिएको हो ।

खानेपानी मन्त्री एवं बारा क्षेत्र १ का उम्मेदवार उमकान्त चौधरीले चुनावी प्रचार प्रसारका निम्ती सरकारी गाडीको दुरूपयोग गरेको भन्दै आयोगले स्पष्टीकरण सोधेको थियो । उनले आफूले प्रयोग नगरेको जवाफ आयोगलाई दिएका छन् ।

‘निर्वाचन प्रयोजनको लागि सरकारी नम्बर प्लेट परिवर्तन गरी प्रयोग गरेको होइन,’ उनले जवाफमा भनेका छन् । आयोगले यसबारे जाँचबुझ गरी प्रतिवेदन पेस गर्न जिल्ला प्रहरी कार्यालय बारालाई समेत पत्राचार गरेको छ । लिखित प्रतिवेदन ३ दिनभित्र पेस गर्न जिल्ला आचारसंहिता अनुगमन समिति, मुख्य निर्वाचन अधिकृत र प्रमुख जिल्ला अधिकारीलाई आयोगले आदेश दिएको छ ।

गगनलाई दुईपटक स्पष्टीकरण

निर्वाचन आयोगले कांग्रेस महामन्त्री गगन थापालाई दुईपटक स्पष्टीकरण सोधेको छ । काठमाडौं क्षेत्र नम्बर ४ का उम्मेदवार रहेका थापाले डेंगीको निःशुल्क परीक्षण र परामर्श लिई टोल टोलमा आउँदैछौँ भनेको भन्दै आयोगले स्पष्टीकरण सोधेको थियो ।

गगन थापालाई निर्वाचन आयोगले दोस्रोपटक सोध्यो स्पष्टीकरण

थापाले जवाफमा भनेका छन्, ‘डेंगी प्रकोप फैलिरहेको अवस्थामा आम नागरिकको स्वास्थ्यलाई ख्याल राखी दिएको नियमित जनस्वास्थ्यसम्बन्धी भनाइ र पहिलेदेखि प्रदान भएको सेवाले निर्वाचन आचारसंहिता उल्लंघन भएको वा स्वतन्त्र र धाँधलिरहीत तवरबाट निर्वाचन सम्पन्न गराउन कुनै अवरोध सिर्जना भएको भन्ने नदेखिएको ।’

त्यसैगरी आयोगले अर्का कांग्रेस महामन्त्री विश्वप्रकाश शर्माले आगालागीबाट पीडितलाई रकम दिएको भन्दै स्पष्टीकरण सोधेको थियो । झापा १ का उम्मेदारसमेत रहेका शर्माले आयोगलाई दिएको जवाफमा भनेका छन्, ‘निर्वाचन आचारसंहिता लागू हुनुभन्दा अगाडि नै राहत रकम दिएको फोटो सामाजिक सञ्जालमा पोष्ट भएको हो ।’

अरु कसकसको प्रमाण जुटाउँदै छ आयोग ?

जनमत पार्टीका अध्यक्ष सीके राउत, एमाले नुवाकोटका उम्मेदवार बद्री मैनाली, भक्तपुर २ का नेपाली कांग्रेसका उम्मेदवार दुर्लभ थापा, एमाले बझाङका उम्मेदवार ऐन बहादुर महर, कांग्रेस कैलाली ४ का उम्मेदवार वीर बहादुर बलायर, कैलाली क्षेत्र नम्बर ४ (क) का उम्मेदवार दिर्घबहादुर सोडारी, माओवादी केन्द्रका केन्द्रीय सदस्य लक्षिराम आचार्य, मकवानपुर २ (ख) नेपाली कांग्रेसका उम्मेदवार इन्द्र बानियाँ, मकवानपुर २ का एकीकृत समाजवादीका उम्मेदवार विरोध खतिवडाको जवाफप्रति आयोग सन्तुष्ट नभएपछि लिखित प्रतिवेदन ३ दिनभित्र पेस गर्न जिल्ला आचारसंहिता अनुगमन समिति, मुख्य निर्वाचन अधिकृत र प्रमुख जिल्ला अधिकारीलाई आयोगले आदेश दिएको छ ।

हालसम्म निर्वाचन आयोगबाट सोधिएको स्पष्टीकरण

क्रम संख्या	व्यक्ति तथा राजनीतिक दल	स्पष्टीकरणको विषय	जवाफको व्यहोरा
१.	श्री पुष्पकमल दाहाल अध्यक्ष, नेपाल कम्युनिष्ट पार्टी (माओवादी केन्द्र)	मनोनयन दर्ता गर्ने क्रममा बाजागाजा (पञ्चेबाजा) को प्रयोग भएको सम्बन्धमा	मनोनयन दर्ता गर्ने क्रममा स्थानीयहरू स्वतःस्फुर्तरूपमा उपस्थित भएकोहो सो विषयमा पार्टी र आफुलाई कुनै जानकारी नभएको।
२.	श्री श्रम रोजगार तथा सामाजिक सुरक्षा मन्त्रालय	श्रम काउन्सिल र श्रम सहचारीको पदपुर्ती गर्न लागेको	उक्त कार्य स्थगित गर्न लेखि पठाइएको
३.	श्री जलन्धर सिंह जैसवार नगरप्रमुख, पचरौता नगरपालिका नगरपालिकाको कार्यालय, बारा	वार्षिक बजेट तथा कार्यक्रममा स्वीकृत भएका बाहेकका अन्य कार्यक्रम गरेको ।
४.	श्री गोकुल वस्ती अधिकृत सातौ व्यापार तथा निकासी प्रवर्द्धन केन्द्र पुल्चोक, ललितपुर	निज दलको राजनीतिक गतिविधिमा तथा प्रचारप्रसारमा संलग्न भएको	असावधानीका कारण भएको हो। सम्मानीत आयोग समक्ष क्षमा प्राथि छु।
५.	श्री अर्थ मन्त्रालय	संचय कोषको प्रमुख प्रशासक नियुक्ति गर्न खोजेको	उक्त कार्य स्थगित गर्न लेखि पठाइएको
६.	श्री मुख्यमन्त्री तथा मन्त्रिपरिषद्‍को कार्यालय, गण्डकी प्रदेश, पोखरा ।	निर्वाचन आचारसंहिता लागू भैसकेपश्चात स्थानीय तहका कर्मचारीको वृत्तिविकास (बढुवा तथा तहवृद्धि) सम्बन्धी प्रकृया अगाडि बढाएको	निर्वाचन आचारसंहिता लागु हुनुपूर्व नै अध्यादेश आई कार्यान्वयनमा रहेको, कानूनको अभावमा लामो समयदेखि कर्मचारीहरूमा नैरश्यता उत्पन्न भएकोले उक्त प्रक्रिया अगाडी बढाइएको ।साथै वार्षिक नीति तथा कार्यक्रम अनुसारनै कर्माचारीको स्तर तथा तह बृद्धी गर्न लागिएको हो ।
७.	श्री शहरी विकास मन्त्रालय सिंहदरबार, काठमाडौ	NGO Service for Public Awareness Raising Programe in Twelve Municipalities on the basis of Polluter Pays Principle नामको कार्यक्रमलाई छुट्याईएको ६ करोड रकम कन्सल्टेन्सीको नाममा आफ्नो मान्छेको NGO लाई दिएको	वार्षिक स्वीकृत कार्यक्रम अनुसारकै कार्यक्रम गरिएको, कुनै नयाँ कार्यक्रम नगरिएको, उजुरीमा सत्यता नभएको
८.	श्री नेपाल प्रज्ञा प्रतिष्ठान कमलादी, काठमाण्डौ	प्रतिष्टानले आजिवन सदस्यता प्रदान गर्न सिफारिस समिति गठन गर्ने, स्थायी तथा करार सेवाको कर्मचारीहरूलाई सरुवा। बढुवा, नयाँ करार नियुक्ति र म्याद थप, भत्ता तथा ग्रेड वृद्धि लगायतका काम कारवाही भएको ।	निर्वाचन आचारसंहिता लागु हुनु अगावै मिति २०७९।०६।११ गतेको निर्णयबाट प्रतिष्ठानमै कार्यरत कर्मचारीहरूको कार्य जिम्मेवारी मात्र हेरफेर गरिएको हो । कर्मचारीहरूको ग्रेड वृद्धीका सम्बन्धमा प्रोत्साहन स्वरूप केही कर्मचारीको ग्रेड वृद्धी गरिएको र उक्त वृद्धी आयोगको निर्देशानुसार हाललाई स्थगित गरिएको ।
९.	श्री अर्थ मन्त्रालय सिंहदरबार, काठमाडौं	निर्वाचन आचारसंहिता लागू भैसकेपश्चात नेपाल सरकारले नेपाल धितोपत्र बोर्ड र विमा कम्पनी मार्फत लाईसेन्स वितरण गर्न लागेको सम्बन्धमा ।	उक्त विषयमा सम्पुर्ण कार्य गर्ने अधिकार तत् तत् निकायलाई रहेको ।
१०.	श्री धितोपत्र बोर्ड खुमलटार, ललितपुर	निर्वाचन आचारसंहिता लागू भैसकेपश्चात नेपाल सरकारले नेपाल धितोपत्र बोर्ड र विमा कम्पनी मार्फत लाईसेन्स वितरण गर्न लागेको सम्बन्धमा ।	विभिन्न समयमा भएका निर्णयहरूको कार्यान्वयन गरिएको र उक्त कार्य बोर्डको नियमित काम समेत भएको
११.	श्री बिमा समिति रामशाहपथ, काठमाण्डौ	निर्वाचन आचारसंहिता लागू भैसकेपश्चात नेपाल सरकारले नेपाल धितोपत्र बोर्ड र विमा कम्पनी मार्फत लाईसेन्स वितरण गर्न लागेको सम्बन्धमा ।	विमा कम्पनीला२ इजाजत दिने सम्बन्धमा हाल सम्म कुनै निर्णय नभएको र २०७९।०८।४ सम्म लाइसेन्स वितरण सम्बन्धी कुनै पनि निर्णय नगरिने ।
१२.	डा. चन्द्रकान्त राउत अध्यक्ष, जनमत पार्टी	निर्वाचन आचारसंहिताको प्रतिकुल हुने गरी उम्मेदवार दर्ताको क्रममा संयौ भन्दा बढि मान्छेको भिड जम्मा गर्ने तथा निजको दलको चुनाव अंकित टिशर्ट लगाई प्रदर्शन गर्ने गतिविधि	उम्मेदवारी दर्ताको दिन राष्ट्रिय अध्यक्षको नाताले आफ अबेरसम्म देशभरिकै मनोनयनपत्र वितरणमा व्यस्त रहेको र आफूले कुनै भीड जम्मा नगरेको तथा चुनावचिन्ह अंकित टिसर्ट लगाएर प्रदर्शनको आयोजना नगरेको।
१३.	श्री बद्री मैनाली, नेपाल कम्युनिष्ट पार्टी (एकीकृत माक्सवादी लेनिनवादी) प्रतिनिधि सभा सदस्य निर्वाचनको उम्मेदवार	निर्वाचन आचारसंहिता, २०७९ को दफा १३ को उपदफा (१) को खण्ड (झ) विपरित औषधी उपचारको बहानामा नगद वितरण गरेको ।	हाल मैले विरामीलाई कुनै किसिमको रकम वितरण गरेको छैन, मैले पहिलेनै विरामीलाई रकम वितरण गरेको तस्विर हाल सामाजिक सञ्जालमा राखेको हो ।
१४.	श्री अनन्तराज घिमिरे अध्यक्ष, हाम्रो नेपाली पार्टी	निजको दलबाट उम्मेदवार भएका व्यक्तिले आफूहरू स्वतन्त्र अभियानको अङ्ग भएको वा देशभरका स्वतन्त्रहरू लौरो निर्वाचन चिन्हको छातामा रहने भनी प्रचारप्रसार हुँदा निज र निजको दल किन मौन बसेको ?	उम्मेदवारहरूपार्टीका उम्मेदवार भएको र निजहरू हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
१५.	श्री मधुसुदन पाठक प्रतिनिधि सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "लौरो" स्वतन्त्र अभियान भनी प्रचारप्रसार गरेको	काठमाडौं निर्वाचन क्षेत्र नं.५ को निर्वाचन कार्यालयमा परेको उजुरीमा मिति २०७९।६।२५ मा स्पष्टीकरण दिई सकेको छु ।सो पश्चात आफ्नो दलको नाम र चुनाव चिन्ह प्रयोग गरी निर्वाचन प्रचार प्रसार गरेको ।
१६.	श्री प्रख्यात बन्जाडे प्रतिनिधि सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "लौरो" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
१७.	श्री शिव शंकर यादव प्रतिनिधि सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "लौरो" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वत्त्रको हैसियतमा प्रचार प्रसार नगरेको ।
१८.	श्री योगेश कुमार सिंह प्रदेश सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह"लौरो" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
१९.	श्री विजय कालिकोटे प्रदेश सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "लौरो" स्वतन्त्र अभियान भनी प्रचारप्रसार गरेको
२०.	श्री वीर वशं वैठा प्रतिनिधि सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह"लौरो" स्वतन्त्र अभियान भनी प्रचारप्रसार गरेको
२१.	श्री राज लाल यादव प्रदेश सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "लौरो" स्वतन्त्र अभियान भनी प्रचारप्रसार गरेको	निर्वाचन आचार संहिताको विपरित हुने गरी कुनै कार्य नगरेको र मैले दलीय आवद्धता सहित प्रचार प्रसार गर्नेछु।
२२.	श्री राज कुमार तिमिल्सिना प्रदेश सभा सदस्यका उम्मेदवार हाम्रो नेपाली पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह"लौरो" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
२३.	माननीय श्री मेटमणि चौधरीज्यू, मन्त्री, शहरी विकास मन्त्रालय, सिंहदरबार, काठमाण्डौ।	निजले आफ्नो निर्वाचन क्षेत्रका बाढी पिडितको नाममा चामल वितरण गर्ने कार्यले निर्वाचन आचारसंहिताको उल्लङ्घन	स्थानीय तहका जनप्रतिनिधि मार्फत एकद्वार प्रणालीबाट राहात वितरणको कार्य गरेको हो । समयमा राहात वितरण गर्नु राज्य लगायत समग्र सबैको जिम्मेवारी हो ।
२४.	श्री पुकार बम प्रतिनिधि सभा सदस्यका उम्मेदवार राष्ट्रिय स्वतन्त्र पार्टी	निजले निर्वाचन प्रचारप्रसारको क्रममा आफ्नो नाम अंकित टिशर्टको प्रयोग गरेको	निर्वाचन चिन्ह अंकित टिशर्ट प्रयोग नगरिएको तर मेरा समर्थकहरूले मेरो नाम उल्लेख गरेको टिसर्ट प्रयोग गरेका हुन् ।
२५.	श्री शिशिर खनाल प्रतिनिधि सभा सदस्यका उम्मेदवार राष्ट्रिय स्वतन्त्र पार्टी	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "गोलाकार भित्र घण्टी" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
२६.	श्री दिपेश ढुङ्गाना, बाग्मती प्रदेश नुवाकोट क्षेत्र नं. १ (ख)	आफ्नो दलीय आबद्धतालाई स्पष्ट नगरी स्वतन्त्र उम्मेदवार रहेको तथा आफ्नो निर्वाचन चिन्ह "गोलाकार भित्र घण्टी" स्वतन्त्र अभियान भनी प्रचारप्रसार गरेको	हाम्रो नेपाली पार्टीको उम्मेदवार भए पश्चात स्वतन्त्र हैसियतमा प्रचार प्रसार नगरेको ।
२७.	श्री जनस्वास्थ्य केन्द्रीय विभाग त्रिभुवन विश्वविद्यालय चिकित्सा शास्त्र अध्ययन संस्थान	उक्त विभागबाट शिक्षक सहायक (शिक्षक) पद करारमा पदपूर्ति गर्ने सम्बन्धमा गोरखापत्रमा सूचना प्रकाशित भएको ।	अध्ययन संस्थान कार्यान्वयन समेत्तिले मिति २०७९।०३।२२ मै उक्त निर्णय गरेको र भर्ना भएका विद्यार्थीको पठनपाठनमा गम्भिर असर पर्ने भएकोले प्रक्रिया अगाडी बढाइएको हो । हाल उक्त नियुक्ति प्रक्रिया स्थगित गरिसकेको ।
२८.	श्री जिवछ यादव शिक्षक, श्री आधारभूत विद्यालय लहान न.पा. वडा नं. १०, सिरहा	सरकारी विद्यालयको शिक्षक रहेको व्यक्ति दलको राजनीतिक गतिविधिमा तथा प्रचारप्रसारमा संलग्न भएको तथा शिक्षक पदमा बहाल रहँदै कुनै दलको सदस्य बनेको ।	भुलवस कुनै आचारसंहिता विपरितका पोष्टहरू भएको भए माफी माग्दै आगामा दिनमा आचारसंहिता विपरितको कार्य नगर्ने ।
२९.	श्री भरतपुर अस्पताल चितवन भरतपुर, चितवन	भरतपुर अस्पतालमा कार्यरत डा. प्रसन्न नापितलाई स्वास्थ्य सेवा विभाग, टेकूमा कामकाज गर्न मिति २०७९।६।२५ को रमाना दिई आचारसंहिताको उल्लङ्घन गरेको ।
३०.	श्री स्वास्थ्य सेवा विभाग टेकू, काठमाडौ	आचारसंहिता विपरित कर्मचारीको सरुवा तथा रमाना दिएको र त्रियुगा नगरपालिकामा व्हिलचेयर र अन्य समाग्री वितरण गरेको।	मिति २०७९।०६।०५ को विभागको निर्णयानुसार सरुवा रमाना तथा सरुवा भई आउनु भएका कर्मचारीलाई हाजिर गराइएको।त्रियुगा नगरपालिकाले गरेको कार्यक्रममा सहयोगका लागि कर्मचारी सहभागी भएका ।
३१.	श्री प्रधानमन्त्री तथा मन्त्रिपरिषद्को कार्यालय	दुरगामी महत्वका निर्णय गरेको सम्बन्धमा पत्रपत्रिकामा समाचार प्रकाशित भएकोले र आयोगको सहमति वेगर त्यस्ता कार्य नगर्नु नगराउनु ।	नेपाल सरकार प्रधानमन्त्री तथा मन्त्रिपरिषद्को कार्यालयबाट नयाँ नीति तथा कार्यक्रम पारित नभएको र सो सम्बन्धमा कुनै कार्यक्रम घोषणा समेत नगरिएको । निर्वाचन आचारसंहिताको पालनामा पूर्ण प्रतिबद्ध रहेको ।
३२.	श्री कृष्णकुमार श्रेष्ठ, प्रतिनिधिसभा सदस्य उम्मेदवार, क्षेत्र नं. ४ बारा	फ्री भिसा फ्रि टिकेटमा विदेश पठाइदिने भनि प्रलोभन देखाएको ।	आफ्नो निर्वाचन क्षेत्रमा चुनावी कार्यक्रम तथा मतदाता भेटघाट कार्यक्रममा व्यस्त रहेकोले सो विषयमा कुनै जानकारी नभएको।
३३.	हरिपुर्वा नगरपालिका, नगरप्रमुख र प्रमुख प्रशासकीय अधिकृत	दोस्रो नगरसभाको विशेष नगर अधिवेशन आव्हान गरेको सम्बन्धमा।	कर्मचारी र शिक्षकहरूलाई तलब तथा चाडपर्व खर्च भुक्तानिका लागि र नगरपालिकाको दैनिक कार्य सञ्चालनका लागि अधिवेशन बोलाइएकोमा हाल निर्वाचन आयोगको पत्रानुसार स्थगित गरिएको ।
३४.	श्री दुर्लभ थापा, प्रतिनिधिसभा सदस्य उम्मेदवार, क्षेत्र नं. २ भक्तपुर	दलको झण्डा र चुनाव चिन्ह आफ्नो निर्वाचन क्षेत्रको विभिन्न स्थानमा टाँस गरेको ।	निर्वाचन आचारसंहिता लाग्नुभन्दा अगाडीनै राखिएको व्यानर हुन् र त्यस्ता निर्वाचन चिन्ह र झण्डा तथा व्यानर हटाउदै आएको र अन्य सबै पनि हटाउने प्रतिबद्धता व्यक्त गर्दछु ।
३५.	श्री मुकुन्द रिजाल, वडा अध्यक्ष, काठमाडौं महानगरपालिका वडा नं. १६	सामाजिक सञ्जालमा उमेदवारलाई भोट दिई जिताउन अनुरोध गरेको ।	आफु बहाल रहेको स्थानीय तहमा कुनै पनि प्रचार प्रसारमा सहभागी नभएको
३६.	श्री माधव कुमार नेपाल, प्रतिनिधिसभा सदस्य उम्मेदवार, क्षेत्र नं. १ रौतहट	मतदातालाई फ्री भिसा फ्रि टिकेटमा युवालाई विदेश पठाइदिने भनि प्रलोभन पारी अभिव्यक्ति दिएको।	मैले कसैलाई प्रभाव पार्ने अभिव्यक्ति दिएको छैन ।दलले आफ्नो विचारधारा, दर्शन र कार्यक्रम पेश गर्न पाउने अधिकार संविधानले दिएको छ सोही अधिकारको प्रयोग गरी आफ्ना कार्यक्रम मतदाता समक्ष पेश गरिएको हो।
३७.	श्री तिलक कुवँर, प्रधानाध्यापक, राष्ट्रिय माध्यामिक विद्यालय साफैबगर नगरपालिका वडा नं. १३ अछाम	प्रधानाध्यापक एमालेको चुनाव प्रचार प्रसारमा लागेको	म ट्रेड युनियनकर्मी भएकोले मलाई उम्मेदवार चुन्ने र मन परेको उम्मेदवारको प्रचार प्रसार गर्न पाउने अधिकार रहेको र मलाई आचारसंहिताको बारेमा जानकारी पनि थिएन ।
३८.	श्री प्रेश काउन्सिल नेपाल, सिनामङ्गल,काठमाडौं	पौरखी नेपाल तथा मेरो नेपाल नामक फेसबुक पेजबाट निज निवेदक रञ्जिता सिलवालको चरित्र हत्या हुने गरी प्रचारप्रसार गरेको ।	निवेदकको बारेका सामाग्री मेचीकाली खबर नामक अनलाइनबाट प्रकाशित भएकोले उक्त सामाग्री हटाउन लगाई उक्त अनलाइनलाई कारवाही गर्न लेखि पठाइएको ।
३९.	श्री ऐन बहादुर महर, प्रतिनिधि सभा सदस्यका उम्मेदवार, बझाङ्ग ।	बझाङ जिल्ला स्तरीय खुल्ला प्रतियोगिताका बिजेतालाई प्रथम पुरस्कार भनी नगद रु. ४१०००। प्रदान गरी सामाजिक सञ्जालमा प्रचार प्रसार गरेको ।	कहिँ कतै नगद पुरस्कार दिने घोषणा गरेको छैन र दिएको पनि छैन।बिना कारण विवादमा ल्याउनको लागि यो सब गरिएको हो।
४०.	श्री International Manpower Recruitment Company, ग्वार्को	मतदातालाई प्रभावित पार्ने हिसावले मलेसियामा ८०० युवाहरूलाई फ्रि भिसा र टिकटमा रोजगारीका लागि पठाउने भनी फारम संकलन गरेको ।	निर्वाचनको लागि उठेका उम्मेदवारलाई जिताउन वा हराउन वा कुनै प्रत्यक्ष वा अप्रत्यक्ष रूपले सहयोग गर्ने कार्य कम्पनिले नगरेको।
४१.	श्री मुख्यमन्त्री तथा मन्त्रिपरिषद्‍को कार्यालय, गण्डकी प्रदेश, पोखरा ।	प्रदेश सरकारले करका दरहरूमा हेरफेर गरेको।	आचारसंहिता लागु हुनुपूर्व मिति २०७९।०६।०७ गतेको बैठकले करका दरहरू परिणत गरेको, प्रस्ताव तयार गर्ने र लागु गर्ने जिम्मेवारी सम्बन्धित मन्त्रालयको भएकोले यस कार्यालयको कुनै भुमिका समेत नरहेको ।
४२.	श्री आर्थिक मामिला तथा योजना मन्त्रालय गण्डकी प्रदेश, पोखरा ।	प्रदेश सरकारले करका दरहरूमा हेरफेर गरेको।	निर्वाचन आचारसंहिता नलाग्दै मिति २०७९।०६।०२ गते अर्थ मन्त्रालयबाट उक्त विषयलाई मात्र सम्बोधन गरी मन्त्रीपरिषदमा पेश गरिएको हो।
४३.	प्रमुख सचिव, मुख्यमन्त्री तथा मन्त्रिपरिषद्‍को कार्यालय, गण्डकी प्रदेश, पोखरा ।	प्रदेश सरकारले करका दरहरूमा हेरफेर गरेको।	आचारसंहिता लागु हुनुपूर्व मिति २०७९।०६।०७ गतेको बैठकले करका दरहरू परिणत गरेको, प्रस्ताव तयार गर्ने र लागु गर्ने जिम्मेवारी सम्बन्धित मन्त्रालयको भएकोले यस कार्यालयको कुनै भुमिका समेत नरहेको ।
४४.	सचिव, आर्थिक मामिला तथा योजना मन्त्रालय गण्डकी प्रदेश, पोखरा ।	प्रदेश सरकारले करका दरहरूमा हेरफेर गरेको।	गण्डकी प्रदेशका प्रमुख सचिवज्यूबाट मिति २०७९।६।७ मा भएको निर्णय कार्यान्वयनका लागि लेखि आएकोले माननीय मन्त्रिस्तर (मिति २०७९।०६।२६) को निर्णयानुसार निमित्त सचिवज्यू मार्फत राजपत्रमा प्रकाशनका लागि पठाइएको ।
४५.	श्री विरबहादुर बलायर, प्रतिनिधिसभा सदस्य उम्मेदवार, क्षेत्र नं.४ कैलाली	आयोग र आयोगका पदाधिकारीको बारेमा लाञ्छनापूर्ण अभिव्यक्ति दिएको।	पत्रपत्रिका मार्फत प्रकाशित भएका कुराहरू कपोकल्पित भएको र सम्मानीत आयोगप्रति कहिँ कतै पनि गलत अभिव्यक्ति नदिएको। आयोगका माननीयज्यूहरू प्रति तथा राष्ट्र सेवक कर्मचारीहरू प्रति आँच आउने अभिव्यक्ति नदिएको
४६.	श्री दिर्घबहादुर सोडारी,प्रदेशसभा सदस्य उम्मेदवार, क्षेत्र नं. ४ (क) कैलाली	आयोग र आयोगका पदाधिकारीको बारेमा लाञ्छनापूर्ण अभिव्यक्ति दिएको।	पत्रपत्रिका मार्फत प्रकाशित भएका कुराहरू कपोकल्पित भएको र सम्मानीत आयोगप्रति कहिँ कतै पनि गलत अभिव्यक्ति नदिएको। आयोगका माननीयज्यूहरू प्रति तथा राष्ट्र सेवक कर्मचारीहरू प्रति आँच आउने अभिव्यक्ति नदिएको
४७.	श्री विश्वप्रकाश शर्मा, प्रतिनिधिसभा सदस्य उम्मेदवार, क्षेत्र नं.१ झापा	आगालागीबाट पीडित केवल निरौलाको घर निर्माणका लागि रकम वितरण गरी सामाजिक सञ्जालमा पोष्ट गरेको	निर्वाचन आचारसंहिता लागु हुनु भन्दा अगाडी नै राहात रकम दिएको फोटो सामाजिक सञ्जालमा पोष्ट भएको हो ।
४८.	श्री लक्षिराम आचार्य, केन्द्रीय सदस्य, नेपाल कम्युनिष्ट पार्टी (माओवादी केन्द्र)	आयोग र आयोगका पदाधिकारीको बारेमा लाञ्छनापूर्ण अभिव्यक्ति दिएको।	पत्रपत्रिका मार्फत प्रकाशित भएका कुराहरू कपोकल्पित भएको र सम्मानीत आयोगप्रति कहिँ कतै पनि गलत अभिव्यक्ति नदिएको। आयोगका माननीयज्यूहरू प्रति तथा राष्ट्र सेवक कर्मचारीहरू प्रति आँच आउने अभिव्यक्ति नदिएको
४९.	श्री इन्द्र बानियाँ प्रदेश सभा सदस्य उम्मेदवार‚ मकवानपुर‚ क्षेत्र नं. २ (ख) नेपाली काँग्रेस।	आफ्नो निर्वाचन क्षेत्रभित्र पर्ने मनहरी बहुमुखी क्याम्पसका विद्यार्थीहरूलाई भ्रमणका लागि अग्रिम सहयोग रकम १५०००⁄१५००० रूपैयाँ उपलब्ध गराएको ।	उक्त समाचारमा कुनै सत्यता नभएको आफुले कुनै रकम वितरण नगरेको ।
५०.	श्री विरोध खतिवडा प्रतिनिधि सभा सदस्यका उम्मेदवार‚ मकवानपुर‚ क्षेत्र नं. २ एकीकृत समानवादी।	आफ्नो निर्वाचन क्षेत्रभित्र पर्ने मनहरी बहुमुखी क्याम्पसका विद्यार्थीहरूलाई भ्रमणका लागि अग्रिम सहयोग रकम १५०००⁄१५००० रूपैयाँ उपलब्ध गराएको ।	उक्त समाचारमा कुनै सत्यता नभएको आफुले कुनै रकम वितरण नगरेको ।
५१.	मा. उमाकान्त चौधरी, मन्त्री, खानेपानी मन्त्रालय, एवं प्रतिनिधि सभा सदस्य बारा क्षेत्र नं. १	चुनावी प्रचार प्रसारका निम्ती सरकारी गाडीको दुरूपयोग गरेको ।	निर्वाचन प्रयोजनको लागि सरकारी नंबर प्लेट परिवर्तन गरि प्रयोग गरेको होइन।
५२.	डा. प्रदिप पराजुली सहप्राध्यापक पाटन संयुक्त क्याम्पस	नेपाली कांग्रेस पार्टीको सचिवको रूपमा कार्यरत रहेको	कुनै पनि राजनैतिक दलको साधारण सदस्यता⁄क्रियाशील सदस्यता वा सक्रिय सदस्यता नलिएको‚ क्याम्पसमा मिति २०७९।०४।२६ मा जानकारी गराई नेपाली काँग्रेस केन्द्रीय कार्यालयमा गैर राजनीतिक पद (विज्ञ) सचिवमा आंशिक रूपमा कार्यरत रहेको।
५३.	श्री गगनकुमार थापा, प्रतिनिधिसभा सदस्यका उम्मेदवार काठमाडौं क्षेत्र नं. ४ महामन्त्री नेपाली कांग्रेस	ट्युटर मार्फत मतदातालाई प्रभाव पार्ने गरी डेंगुको निशुल्क परिक्षण र परामर्श लिई टोल टोलमा आउँदैछौँ भनी मोबाइल नम्बर समेत प्रकाशन गरेको ।	डेंगी प्रकोप फैलिरहेको अवस्थामा आम नागरिकको स्वास्थ्यलाई ख्याल राखी दिएको नियमित जनस्वास्थ्य सम्बन्धी भनाई र पहिलेदेखि प्रदान भएको सेवाले निर्वाचन आचारसंहिता उलंघन भएको वा स्वतन्त्र र धाँधलिरहित तवरबाट निर्वाचन सम्पन्न गराउन कुनै अवरोध सिर्जना भएको भन्ने नदेखिएको।
५४.	श्री भगवती चौधरी,प्रतिनिधिसभा सदस्यका उम्मेदवार सुनसरी क्षेत्र नं. ३ नेकपा एमाले	एक कार्यक्रममा विपक्षीलाई गोलि ठोक्ने र छुरा रोप्ने एमाले नेतृ भगवती चौधरीको धम्की ।	विपक्षी वा कुनै व्यक्ति कसैलाई पनि तोकेर गोलि ठोक्ने र छुरा रोप्ने अभिव्यक्ति नदिएको।आफ्ला अभिव्यक्तिलाई इलेक्ट्रोनिक्स टेक्नोलोजिको माध्यमबाट दुरूपयोग गराई आफूलाई बदनाम गराउन मात्र खोजेको हो।
५५.	श्री लिला बहादुर न्यौपाने‚ प्रतिनिधिसभा सदस्यका उम्मेदवार रसुवा	फेसबुक ग्रूपमार्फत व्यक्तिगत चरित्र हत्या गर्न लगाएको।	रविन्द्र पौडेललाई मैले अन्य उम्मेदवारहरूको बारेमा कुनै पनि कार्य गर्नु भनि भनेको छैन⁄होइन⁄निजले के कुन व्यहोराको फेसबुक ग्रूप मार्फत व्यक्तिगत चरित्र हत्या गर्न लगाएको हो मलाई जानकारी भएन।निज मेरो चुनावी अभियानमा लाग्ने नजिककव व्यक्ति पनि होइनन्।
५६.	श्री जुली कुमारी महतो‚ प्रतिनिधिसभा सदस्यका उम्मेदवार‚ धनुषा क्षेत्र नं ३	तपाईँको तस्वीर सहितको फ्लेक्स अटो रिक्साको पछाडी राखी सूर्य निर्वाचन चिन्हमा मत मागेको फोटो।	कुनै पनि अटो रिक्साको पछाडी फ्लेक्स बोर्ड लगाउने कार्य भएको छैन न त फ्लेक्स बोर्ड सहितको रिक्सा प्रयोग गरी कुनै र्याली आयोजना भएको छ। तस्वीर सहितको फ्लेक्स अटो रिक्सामा कसले राखे ज्ञात हुन सकेन।
५७.	श्री सूर्य बहादुर थापा क्षेत्री‚ प्रतिनिधिसभा सदस्यका उम्मेदवार‚ प्युठान	निर्वाचन प्रचारप्रसारका लागि बालबालिकाको प्रयोग गरेको।	उक्त प्रचारप्रसार मैले गराएको र निर्देशन गरेको होइन।सो सामग्री स्थानीय बासिन्दाहरूले स्वत: स्फुर्त रूपमा सामानिक संजालमा प्रचारप्रसार गरेको हुनसक्छ।
५८.	श्री गगनकुमार थापा, प्रतिनिधिसभा सदस्यका उम्मेदवार काठमाडौं क्षेत्र नं. ४ महामन्त्री नेपाली कांग्रेस	डेंगी विरुद्ध अभियान किन चलाएको भनि स्पस्टीकरण सोधेको तर आफू अझपनि त्यस्तो अभियान भलाउने भन्ने वक्तव्य दिएको।	डेंगी प्रकोप फैलिरहेको अवस्थामा आम नागरिकको स्वास्थ्यलाई ख्याल राखी दिएको नियमित जनस्वास्थ्य सम्बन्धी भनाई र पहिलेदेखि प्रदान भएको सेवाले निर्वाचन आचारसंहिता उलंघन भएको वा स्वतन्त्र र धाँधलिरहित तवरबाट निर्वाचन सम्पन्न गराउन कुनै अवरोध सिर्जना भएको भन्ने नदेखिएको।
५९.	मा.श्री राजिव गुरुङ्ग‚ मन्त्री युवा तथा खेलकुद मन्त्रालय‚ गण्डकी प्रदेश	निर्वाचन आयोगले ३३ लाख ३० लाख भन्दा बढी खर्च गर्नु हुँदैन भनेको छ ३० लाखमा नेपनलमा चुनाव जित्छ यार मनाङ्गमा एक दिन नोमिनेसन गर्न जाँदा १५ लाखको त रक्सी खाईदिन्छ।	आफ्नो निर्वाचन क्षेत्रमा छट्टाएको खर्चको सीमा बमोजिमको रकम खर्च गर्ने व्यक्तिगत हैसियत समेत आफूमा नरहेको।निर्वाचनको समयमा रक्सी उपर आयोगले प्रतिबन्ध लगाउनु पर्छ भन्ने हो अन्यथा उम्मेदवारलाई मर्का पर्छ भन्ने आशय हो।
६०.	श्री मनोज कुमार यादव‚ शाखा अधिकृत‚राजविराज न.पा.‚सप्तरी	सप्तरी जिल्ला (प्रतिनिधि सभा क्षेत्र नं.२) का उम्मेदवार श्री उपेन्द्र यादवको प्रचारप्रसार गरेकोर
६१.	श्री उदय सुवेदी‚ अध्यक्ष‚ राष्ट्रिय भूमि आयोग‚ पर्वत	निर्वाचन सम्बन्धी दलका बैठक‚ कार्यक्रम र भेला लगायतमा सहभागी भएको।
६२.	श्री राम शर्मा लामिछाने‚ अध्यक्ष‚ कुश्मा न.पा. वार्ड नं.९‚ पर्वत	निर्वाचन सम्बन्धी दलका बैठक‚ कार्यक्रम र भेला लगायतमा सहभागी भएको।
६३.	श्री राजु आचार्य‚ अध्यक्ष‚ जलजला गाउँपालिका‚ पर्वत	निर्वाचन सम्बन्धी दलका बैठक‚ कार्यक्रम र भेला लगायतमा सहभागी भएको।
६४.	श्री सुभन्तराज सुवेदी‚ शिक्षक‚ नारायणी मा.वि.‚ कुश्मा न.पा. वार्ड नं.८‚ पर्वत	निर्वाचन सम्बन्धी दलका बैठक‚ कार्यक्रम र भेला लगायतमा सहभागी भएको।
६५.	श्री प्रधानाध्यापकज्यू‚ पञ्‍चकोशी मा.वि.‚ कुश्मा न.पा. वार्ड नं.१४‚ आर्थर‚ पर्वत	विद्यालयमा केही दिन पहिले तरुण दलको नामबाट विद्यार्थीहरूलाई कपि कलम वितरण गरेर अभिभावकहरूलाई प्रभावित गर्न कोशिश गरेको।
६६.	श्री अर्जुन प्रसाद जोशी‚ नेपाली काँग्रेस तर्फबाट प्रतिनिधिसभा सदस्य उम्मेदवार‚ पर्वत	विद्यालयमा केही दिन पहिले तरुण दलको नामबाट विद्यार्थीहरूलाई कपि कलम वितरण गरेर अभिभावकहरूलाई प्रभावित गर्न कोशिश गरेको।
६७.	श्री कृष्ण तिवारी‚ शिक्षक‚ सरस्वती मा.वि.‚ मध्यबिन्दु न.पा. वार्ड नं.१३‚ नवलपरासी (वर्दाघाट सुस्ता पूर्व )	नेपाली काँग्रेसको विभिन्न चुनावी सभा तथा कार्यक्रममा दलको प्रतिनिधिको रूपमा सहभागि भइरहेको।
६८.	श्री अनन्तलाल भण्डारी‚ प्रधानाध्यापक‚ महेन्द्र आदर्श मा.वि.‚ मुसिकोट न.पा. वार्ड नं.७‚ वामीटक्सार‚ गुल्मी	एकीकृत समाजवादी पार्टीको लुम्बिनी प्रदेश कमिटी सदस्यको जिम्मेवारीमा रहेको तथा निर्वाचन घोषणा भएपश्चात चुनावी कर्यक्रम तथा बैठकमा सहभागी हुँदै आएको।
६९.	एमालेका उम्मेदवार योगेश भट्टराई	आचारसंहिता विपरीत हुनेगरी २५ जनाभन्दा बढी साथमा लिई घरदैलो कार्यक्रम गरेको	बाँकी
७०.	(माओवादी केन्द्र) का उम्मेदवार विना मगर	२५ जनाभन्दा बढीको भेला गरेको र उक्त विषय आफ्नो फेसबुक पेजबाट समेत सार्वजनिक भएको	बाँकी
७१.	जयपृथ्वी एफ.एम. बझाङ	कारबाही गर्न प्रेस काउन्सिललाई आयोगको पत्र	बाँकी