कारबाही गर्न प्रहरीलाई काटेको पत्र आयोगमै रोकियो, माधव नेपालले बुझाएकाे स्पष्टीकरणमा के छ ?

कारबाही गर्न प्रहरीलाई काटेको पत्र आयोगमै रोकियो, माधव नेपालले बुझाएकाे स्पष्टीकरणमा के छ ?

A+ A A-

एकीकृत समाजवादीका अध्यक्ष माधवकुमार नेपाललाई आवश्यक अनुसन्धान गरी कारबाही प्रक्रिया अगाडि बढाउन निर्वाचन आयोगले जिल्ला प्रहरी कार्यालय रौतहटलाई काटेको पत्र अन्तिम समयमा आयोगमै रोकिएकाे छ । ‘पत्र दर्ता चलानी भएर रोकिएको छ,’ आयोग स्रोतले भन्यो ।

पूर्वप्रधानमन्त्रीसमेत रहेका अध्यक्ष नेपालले मतदातालाई फ्रि भिसा फ्रि टिकेटमा युवालाई विदेश पठाइदिने भनी प्रलोभन दिएको भन्दै आयोगले बिहीबार स्पष्टीकरणका साथै जिल्ला प्रहरी कार्यालय रौतहटलाई निर्वाचन कसुर तथा सजाय ऐन २०७३ अनुसार कारबाहीका लागि पत्रचार गरेको थियो ।

आयोगले प्रहरीलाई काटेको पत्र रोकिएको हो ? भन्ने प्रश्नमा प्रमुख निर्वाचन आयुक्त दिनेशकुमार थपलिया भन्छन्, ‘निर्णय भएको पत्र जान्छ । म पूर्वमा थिएँ । हिजोबेलुका आइपुगेँ। किन रोकिएको हो यसबारे बुझ्छु । आज शनिबार भएर नगएको होला ।’

अध्यक्ष नेपालले पनि आयोगले आफूलाई कारबाहीको पत्र नकाटेको बताएका छन् । ‘कारबाही होइन भनेर आयोगले भनिसकेको छ,’ शिलापत्रसँग अध्यक्ष नेपालले भने, ‘केही कुरा उठेको हुनाले आयोगले बुझ्न मात्र खोजेको भनेको छ ।’ जिल्ला प्रहरी कार्यालय रौतहटले पनि आयोगको पत्र प्राप्त नभएको बताएको छ ।

नेपालले दिए स्पष्टीकरणको जवाफ

पत्र आयोगमै रोकिए पनि अध्यक्ष नेपालले स्पटीकरणको जवाफ भने दिएका छन् । ‘निर्वाचनको सिलसिलामा मैले कुनै उम्मेदवार, मतदाता, निजहरूमध्ये कसैको सरोकार वा स्वार्थ भएको कुनै व्यक्ति, निर्वाचन अधिकृत, निर्वाचनमा संलग्न कुनै कर्मचारीलाई कुनै किसिमको प्रभाव पार्ने कार्य गरेको छैन । कुनै किसिमले लोभ लालच देखाउने वा आर्थिक प्रलोभन देखाउने कुनै काम गरेको छैन । पत्रमा भनिए जस्तो अभिव्यक्ति मैले दिएको छैन,’ अध्यक्ष नेपालले दिएको स्पष्टीकरणमा भनिएको छ ।

आफूविरुद्ध कसैले गलत समाचार र सूचना सम्प्रेषण गरेको हुन सक्ने उनले स्पष्टीकरणमा भनेका छन् । ‘हाम्रो पार्टीले लिएको नीति विचार र कार्यक्रमबाट जनताले हामीलाई गर्ने समर्थन र सहयोगमा प्रतिकूल असर पार्न मेरो विरुद्ध कसैले गलत समाचार र सूचना सम्प्रेषण गरेको हुन सक्दछ । निर्वाचनको स्वतन्त्रता एवम् निस्पक्षतामा प्रतिकूल प्रभाव पार्ने कुनै काम नभएको व्यहोरा प्रष्ट पार्दछु,’ अध्यक्ष नेपालले स्पष्टीकरणमा भनेका छन् । निर्वाचन आचारसंहिता २०७९ अनुसार आयोगले अध्यक्ष नेपाललाई स्पष्टीकरण सोधेको थियो । स्पष्टीकरणको जवाफ नदिँदै कारिबाहीका लागि पत्र काटेपछि एकीकृत समाजवादीका नेताहरूले विराेध जनाएका थिए ।

स्पष्टीकरण नबुझाउदै कार्वाहीको आदेश ? यो त ज्याददति भयो । आयोगको यो कदम लोकतन्त्रको विरुद्ध छ । pic.twitter.com/jXe6yemJAw
— Dr. Vijay Poudel (@drvijaypou) October 20, 2022

अध्यक्ष नेपाल रौतहट १ बाट प्रतिनिधिसभा सदस्यको उम्मेदवार हुन् । उनले चुनाव जिते देश बाहिर युवालाई रोजगारीको अवसर दिने ‘बिना ढेउवा के भिसा मिल्ते हे, टिकट मिल्ते है, काठमाडौंमा तालिम मिल्ते है’ भनी दिएकाे अभिव्यक्ति दिएको भिडियो बाहिरिएपछि आयोगले स्पटीकरण र कारबाही प्रक्रिया अगाडि बढाउन राैतहट प्रहरीलाई पत्रचार गरेको थियो ।

हालसम्म कतिलाई सोधियो स्पष्टीकरण ?

आयोगले शुक्रबारसम्म आचारसंहिता उल्लंघनमा एकीकृत माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधव नेपाल र कांग्रेस महामन्त्री विश्पव्रकाश शर्मा लगायत ४८ जनालाई स्पष्टीकरण सोधेको छ ।

एकीकृत माओवादी अध्यक्षसमेत रहेका प्रचण्डले गोरखा २ मा उम्मेदवारी दर्ता गर्ने क्रममा पञ्चेबाजा बजाएको भन्दै आयोगदले पहिलो स्पष्टीकरण सोधेको थियो । अध्यक्ष प्रचण्डले आयोगलाई स्पष्टीकरणको जवाफ पनि दिएका छन् ।

‘स्थानीयहरू स्वतः स्फुर्तरुपमा भएको सो विषयमा पार्टीे र आफूलाई जानकारी छैन,’ प्रचण्डले दिएको स्पष्टीकरणमा भनिएको छ । तर प्रचण्डले पञ्चेबाजासहति २५ जनाभन्दा बढी उपस्थित भएको भिडियो आफ्नो फेसबुक पेजमै सार्वजनिक गरेका थिए ।

सम्बन्धित समाचार

निर्वाचन आयोगलाई प्रचण्डको जवाफ- पञ्चेबाजा बजाएको थाहा छैन

त्यसैगरी श्रम रोजगार तथा सामाजिक सुरक्षा मन्त्रालय, पचरौता नगरपालिकाका प्रमुख जलन्धरसिंह जैसवार, व्यापार तथा निकासी प्रवर्द्धन केन्द्रका अधिकृत गोकुल वस्ती, अर्थ मन्त्रालय, गण्डकी प्रदेशका मुख्यमन्त्री तथा मन्त्रिपरिषद्को कार्यालय, शहरी विकास मन्त्रालय काठमाडौं, नेपाल प्रज्ञा प्रतिष्ठान, अर्थ मन्त्रालय, धितोपत्र बोर्ड, बीमा समितिलाई स्पष्टीकरण सोधेको छ ।

त्यैगरी जनमत पार्टीका अध्यक्ष सीके राउत, एमालेका उम्मेदवार बद्री मैनाली, हाम्रो नेपाली पार्टीका अध्यक्ष अनन्तराज घिमिरे, हाम्रो नेपाली पार्टी मधुसुदन पाठक, प्रख्यात बन्जाडे, शिवशंकर यादाव, योगेशकुमार सिंह, विजय कालिकोटे, वीरवंश बैठा, राजलालय यादव, राज कुमार तिमिल्सिनालाई आयोगले स्पष्टीकरण सोधेको छ । आयोगले शहरी विकासमन्त्री मेटमणि चौधरी, राष्ट्रिय स्वतन्त्र पार्टीका पुकार बम, शिशिर खनाललाई पनि स्पष्टीकरण सोधेको छ ।

बागमती प्रदेश नुवाकोट क्षेत्र नम्बर १ ख का उम्मेदवार दिपेश ढुंगना, जनस्वास्थ्य केन्द्रीय विभाग, सिरहाका शिक्षक जिवछ यादव, भरतपुर अस्पताल, स्वास्थ्य सेवा विभाग टेकु, प्रधानमन्त्री तथा मन्त्रिपरिषद्को कार्यालय, बारा क्षेत्र नम्बर ४ का उम्मेदवार कृष्णकुमार श्रेष्ठ, हरिपूर्वा नगरपालिकाका प्रशासकीय अधिकृत, भक्तपुर क्षेत्र नम्बर २ का उम्मेदवार दुर्लभ थापालाई आयोगले स्पष्टीकरण सोधेको छ ।

त्यसैगरी काठमाडौं महानगरपालिका वडा नम्बर १६ का वडाध्यक्ष मुकुन्द रिजाल, अछामका शिक्षक तिलक कुँवर, प्रेस काउन्सिल नेपाल, बझाङका उम्मेदवार ऐन महर, ग्वार्कोको इन्टरनेसनल म्यानपावर, मुख्यमन्त्री तथा मन्त्रिपरिषद्को कार्यालय गण्डकी, आर्थिक मामिला तथा योजना मन्त्रालय गण्डकी, मुख्य सचिव मुख्यमन्त्री तथा मन्त्रिपरिषद्को कार्यालय गण्डकी, सचिव आर्थिक मामिला तथा योजना मन्त्रालय गण्डकीलाई आयोगले स्पष्टीकरण सोधेको छ ।

त्यसैगरी कैलाली क्षेत्र नम्बर ४ का उम्मेदवार वीरबहादुर बलायर, कैलाली क्षेत्र नम्बर ४ क का उम्मेदवार दीर्घबहादुर सोडारी र माओवादी केन्द्रका केन्द्रीय सदस्य लक्ष्मिराम आचार्यालाई आयोगले स्पष्टीकरण सोधको छ । स्पष्टीकरण सोधेकामा हालसम्म ३२ जनाले आयोगलाई जवाफ दिइसकेका छन् । आयोगलाई दिएको जवाफ र उजुरीको अध्ययन गरेर आयोगले आचारसंहितविपरीत भएमा कारबाही गर्ने जनाएको छ ।

सम्बन्धित समाचार

प्रकाशित मिति: शनिबार, कात्तिक ५, २०७९ १८:०३