प्रमुख निर्वाचन आयुक्तकाे प्रश्न : माधव नेपाललाई आयाेगले राष्ट्रिय सम्मानको घोषणा गर्नुपर्ने हो र ?

प्रमुख निर्वाचन आयुक्तकाे प्रश्न : माधव नेपाललाई आयाेगले राष्ट्रिय सम्मानको घोषणा गर्नुपर्ने हो र ?

A+ A A-

निर्वाचन आयोगले एकीकृत ससाजवादीका अध्यक्ष माधवकुमार नेपाललाई आचारसंहिता उल्लंघन गरेको भन्दै २४ घण्टे स्पष्टीकरण सोध्यो । निर्वाचन आचारसंहिता २०७९ अनुसार आयोगले स्पष्टीकरण सोधेको हो । तर अध्यक्ष नेपालले स्पष्टीकरण पत्र नबुझ्दै आयोगले रौतहट प्रहरीलाई आवश्यक कारबाही प्रक्रिया अगाडि बढाउन पत्राचार गर्‍यो । निर्वाचन कसुर तथा सजाय ऐन २०७३ अनुसार अनुसन्धान गर्न आयोगले प्रहरीलाई भनेको छ ।

नेपाल रौतहट १ बाट प्रतिनिधिसभा सदस्यको उम्मेदवार हुन् । आफूले चुनाव जिते देश बाहिर युवालाई रोजगारीको अवसर दिने ‘बिना ढेउवा के भिसा मिल्ते हे, टिकट मिल्ते है, काठमाडौंमा तालिम मिल्ते है’ अभिव्यक्ति दिएको भिडियो बाहिरिएपछि आयोगले कारबाही प्रक्रिया अगाडि बढाएको हो । यसमा आयोग पूर्वाग्रही भएको भन्दै एकीकृत समावजादीका नेताहरूले असन्तुष्टि जनाएका छन् ।

यसबारे हामीले प्रमुख निर्वाचन आयुक्त दिनेशकुमार थपलियासँग संक्षिप्त कुरा गरेका छौँ ।

आयोगले पूर्वाग्रही भएर माधव नेपालालाई स्पष्टीकरण सोध्याे भनिँदैछ नि ?

होइन । आयोगले स्पष्टीकरण सोध्दैमा कोही डराउनु पर्दैन । आचारंहिता विपरीत तपाईंले गरेको हो होइन भनेर सोधेको हो । अहिले प्रारम्भिक चरण हो । कारबाही गर्ने निर्णय भएको छैन । आचारसंहिता विपरीत रहेछ भने कारबाही हुन्छ ।

तर स्पटीकरणको जवाफ नआउँदै कारबाहीको लागि प्रहरीलाई पत्राचार किन ?

निर्वाचन कसुर तथा सजाय ऐन २०७३ अनुसार आयोगले कारबाही गर्न सक्दैन । आयोगले हेर्ने विषय नभएकाले अनुसन्धान गर्न सत्य तथ्य हो होइन हेर्न प्रहरीलाई अनुरोध गरिएको हो ।

एकीकृत समाजवादीका नेताहरूले माधव नेपालमाथि आयोगले प्रतिशाेध साध्यो भनिरहेका छन् नि ?

यस्तो राम्रो मान्छेले यस्तो बोलेको हो भन्नेमा मलाई विश्वास छैन । देश समृद्ध बनाउन उहाँले जीवन खर्चनु भएको छ । देश बनाउन छोडेर युवालाई विदेश जाऊ भनेकोमा पत्यार लागेको छैन । तर भिडियोहरू आएको छ । समाचारमा बोलेको कुरा आएको छ । उहाँ उम्मेदवार समेत हो ।

...अनि ओलीले सोधे–तपाईंहरूले फ्रिमा 'बिना ढेउवाके' अक्सिजन पाउनुहुन्छ भनेर मैले भनिरहनपर्छ?(भिडियाे)

उम्मेदवारले कसैलाई प्रलोभन देखाउन पाइँदैन । अहिलेसम्म ४० भन्दा बढीलाई स्पष्टीकरण सोधिएको छ । तपाईंले गरेको हो होइन भनेर आयोगले सोध्न नपाउने हो ? उहाँलाई आयोगले राष्ट्रिय सम्मान गर्नुपर्ने हो ? निर्वाचन स्वतन्त्र स्वच्छ हुनुपर्छ भन्ने अनि आयोगले स्पष्टीकरण सोध्न पनि नपाउने ? अब स्पष्टीकरण उहाँको सचिवालयलाई सोधेर मात्र हामीले सोध्नुपर्ने हो ? यदि हो भने उहाँहरूले नै प्रस्टीकरण बनाइदिनुपर्‍यो ।

यही विषय प्रधानमन्त्री पत्नी आरजु राणाले पनि बोल्नु भएको थियो नि ?

उहाँलाई मात्र होइन । प्रधानमन्त्री कार्यालयलाई पनि सोधेका छौँ । प्रदेश सरकारलाई पनि सोधेका छौँ । आयोगमा उजुरी परेपछि सोध्ने हो । उहाँ (आरजु) उम्मेदवार पनि होइन । तर उजुरी पर्‍यो भने आयोगले सोध्छ ।

माधव नेपालले स्पष्टीकरणको जवाफ दिनुभएन भने के हुन्छ ?

जवाफ नदिने भन्ने हुँदैन । तर जवाफ आएन भने स्वीकार गरेको ठहरिन्छ ।

अनि कारबाही हुन्छ ?

अहिले प्रारम्भिक चरण हो । स्पष्टीकरणको जवाफ आएपछि हेरेर अनुसन्धान गरेर निर्णय हुन्छ । अहिले नै कारबाही भएको होइन ।

सम्बन्धित समाचार

प्रकाशित मिति: शुक्रबार, कात्तिक ४, २०७९ ०९:१८