स्पष्टीकरणको जवाफ नआउँदै माधव नेपाललाई कारबाही गर्न रौतहट प्रहरीलाई आयोगको निर्देशन

स्पष्टीकरणको जवाफ नआउँदै माधव नेपाललाई कारबाही गर्न रौतहट प्रहरीलाई आयोगको निर्देशन

A+ A A-

निर्वाचन आयोगले आफूले सोधेको स्पष्टीकरणको जवाफ नआउँदै नेकपा एकीकृत समाजवादीका अध्यक्ष माधव कुमार नेपालमाथि कारबाही प्रक्रिया अघि बढाउन प्रहरीलाई निर्देशन दिएको छ ।

रौतहट क्षेत्र नम्बर १ मा आयोजित चुनाव केन्द्रित कार्यक्रममा मतदातालाई प्रलोभनमा पार्ने गरी फ्री भिसा र फ्री टिकटमा विदेश पठाइदिने बताएका थिए ।

मतदातालाई प्रलोभनमा पारेको भन्दै बिहीबार निर्वाचन आयोगले पूर्वप्रधानमन्त्री नेपाललाई २४ घष्टाभित्र जवाफ पेस गर्ने गरी स्पष्टीकरण सोधेको थियो । तर, स्पष्टीकरणको जवाफ नआउँदै बिहीबार नै निर्वाचन आयोगले अध्यक्ष नेपालमाथि कारबाहीको प्रक्रिया अगाडि बढाउन जिल्ला प्रहरी कार्यालय रौतहटलाई पत्राचार गरेको हो ।

'रौतहट जिल्लामा आयोजित कार्यक्रममा तपाईंले आफूले चुनाव जिते देशबाहिर युवालाई रोजगारीको अवसर दिने आश्वासन बाँडेको भन्ने विषयको समाचार प्रकाशन भएको, तपाईंले 'बिना ढेउवा के भिसा मिलते हैं, टिकट मिलते हैं, काठमाडौं तालिम मिलते है' भनि सार्वजनिक वक्तव्य दिएको श्रव्यदृश्य सामग्री सामाजिक सञ्जालमा सार्वजनिक भएको र सामाजिक सञ्जालमार्फत सार्वजनिक भएको सो श्रव्यदृश्य सामग्रीका विषयमा आयोगबाट गठित सामाजिक सञ्जाल अनुगमन टोलीबाट अध्ययन तथा परीक्षण गर्दा तपाईंको होइन भनी भन्न सकिने कुनै आधार कारण नदेखिएकोले उक्त विषयप्रति आयोगको गम्भीर ध्यानाकर्षण भई यो पत्र लेख्ने कार्य भएको छ,' आयोगले नेपाललाई सोधेको स्पष्टीकरणमा उल्लेख छ ।

अध्यक्ष नेपालले निर्वाचन सम्मुखमा युवाहरूलाई विदेश पठाउने भनी सार्वजनिक रूपमा प्रलोभन देखाउने काम गरेको आयोगको ठहर छ । आयोगले नेपाललाई निर्वाचन (कसूर तथा सजाय) ऐन, २०७३ को दफा ३९ बमोजिम आवश्यक कारबाही प्रक्रिया अगाडि बढाउन रौतहट प्रहरीलाई अनुरोधसहित पत्र पठाएको हो ।